ໃນເວລາເຂົ້າຮ່ວມກອງປະຊຸມສຸດຍອດອາຊີຕາເວັນອອກຄັ້ງທີ 8, ທ່ານຫລີເຄີ້ສຽງກ່າວເນັ້ນການເອົາໃຈໃສ່ການພັດທະນາ, ການເປີດປະຕູສູ່ພາຍນອກແລະຄວາມໂອບອ້ອມອາລີ, ການຮ່ວມມືແລະຕ່າງຝ່າຍຕ່າງມີຜົນປະໂຫຍດ ຊຸກຍູ້ການຮ່ວມມືອາຊີຕາເວັນອອກໃຫ້ພັດທະນາໄປໜ້າ
ວັນທີ 10 ຕຸລານີ້, ທ່ານຫລີເຄີ້ສຽງ, ນາຍົກລັດຖະມົນຕີຈີນໄດ້ເຂົ້າຮ່ວມກອງປະຊຸມສຸດຍອດອາຊີຕາເວັນອອກຄັ້ງທີ 8 ຢູ່ນະຄອນຫລວງບັນດາເສລີເບກາວັນ ບຣູໄນ ດາຣູຊາລາມ. ຜູ້ນໍາຫລືຜູ້ຕາງໜ້າຂອງ 10 ປະເທດອາຊຽນແລະສ.ເກົາຫລີ, ຍີ່ປຸ່ນ, ອາເມລິກາ, ລັດເຊຍ, ອິນເດຍ, ອົສຕຼາຣີ, ນູແວນເຊີລັງ ກໍໄດ້ເຂົ້າຮ່ວມກອງປະຊຸມຄັ້ງນີ້. ຜູ້ນໍາປະເທດຕ່າງໆໄດ້ແລກປ່ຽນຄໍາຄິດຄໍາເຫັນໂດຍປິ່ນອ້ອມການພັດທະນາການຮ່ວມມືຂອງອາຊີຕາເວັນອອກ, ບັນຫາພາກພພື້ນແລະສາກົນທີ່ກ່ຽວຂ້ອງ ແລະຫົວຂໍ້ທີ່ມີລັກສະນະທົ່ວໂລກ.
ໃນການກ່າວຄໍາປາໄສ, ທ່ານຫລີເຄີ້ສຽງສະເໜີວ່າ ຈະເພີ່ມທະວີການຮ່ວມມືຍຸດທະສາດ, ຮ່ວມກັນຮັບມືກັບສິ່ງທ້າທາຍ. ຄວນໃຫ້ຄວາມສໍາຄັນຫລາຍກວ່າເກົ່າຕໍ່ການຮ່ວມມືໃນຂົງເຂດຕ່າງໆເຊັ່ນຄວາມປອດໄພດ້ານສະບຽງອາຫານແລະພະລັງງານ, ໄພທໍາມະຊາດ, ການປ່ຽນແປງຂອງດິນຟ້າອດກາດ, ສາທາລະນະສຸກ. ຈີນຍິນດີເພີ່ມທະວີການຮ່ວມມືກັບປະເທດທີ່ກ່ຽວຂ້ອງແລະໃຫ້ການບໍລິການດ້ານຂໍ້ມູນຂ່າວສານແລະການສ້າງຄວາມສາມາດ ແລະອື່ນໆ. ຝ່າຍຈີນມີຈຸດຢືນທີ່ວ່າ ການເຊື່ອມໂຍງເຂົ້າກັນຂອງເສດຖະກິດພາກພື້ນຄວນຍຶດໝັ້ນຫລັກການທີ່ເປີດປະຕູສູ່ພາຍນອກ, ໂອບອ້ອມອາລີແລະໂປ່ງໃສ, ຍິນດີຮ່ວມກັບສະມາຊິກຂອງສັນຍາຄູ່ເສດຖະກິດຮອບດ້ານຂອງພາກພື້ນ ຫລື RCEP ທໍາຄວາມພະຍາຍາມ ເພື່ອສໍາເລັດການເຈລະຈາຢ່າງຮອບດ້ານກ່ອນທ້ານປີ 2015 ແລະບັນລຸສັນຍາດ້ານການຄ້າເສລີທີ່ທັນສະໄໝ, ຮອບດ້ານ, ມີຄຸນນະພາບສູງ ແລະອໍານວຍຜົນປະໂຫຍດໃຫ້ກັນ.
ທ່ານຫລີເຄີ້ສຽງຍັງສະເໜີຕື່ມວ່າ ຈະເພີ່ມທະວີຄວາມໄວ້ເນື້ອເຊື່ອໃຈດ້ານຄວາມໝັ້ນຄົງແລະຮັກສາສັນຕິພາບແລະສະຖຽນລະພາບຂອງພາກພື້ນ. ຈີນມີເຈດຈໍານົງໃຫ້ເຜີຍແຜ່ທັດສະນະໃໝ່ດ້ານຄວາມໝັ້ນຄົງ ຄື ຄວາມໝັ້ນຄົງສັງລວມ, ຄວາມໝັ້ນຄົງຮ່ວມກັນ ແລະຄວາມໝັ້ນຄົງດ້ານການຮ່ວມມື, ຊຸກຍູ້ການເຈລະຈາແລະການຮ່ວມມືທີ່ຊື່ກົງໃນຂົງເຂດຄວາມໝັ້ນຄົງທີ່ເປັນມູນເຊື້ອແລະຄວາມໝັ້ນຄົງທີ່ບໍ່ເປັນມູນເຊື້ອ ເພື່ອໃຫ້ອາຊີຕາເວັນອອກມີສະຖຽນລະພາບແລະຄວາມສະຫງົບຖາວອນ.
ທ່ານຫລີເຄີ້ສຽງຍັງໄດ້ອະທິບາຍຫລັກໝັ້ນຫລັກການຂອງຈີນໃນບັນຫາທະເລຈີນໃຕ້. ທ່ານກ່າວວ່າ, ການເດີນເຮືອຢູ່ທະເລຈີນໃຕ້ແມ່ນມີເສລີພາບ ຄວາມປອດໄພຂອງການເດີນເຮືອຢູ່ທະເລຈີນໃຕ້ແມ່ນມີການຮັບປະກັນ. ຈີນຍິນດີຮ່ວມກັບປະເທດຕ່າງໆໃນພາກພື້ນນີ້ ປົກປັກຮັກສາຄວາມເສລີພາບແລະຄວາມປອດໄພຂອງການເດີນເຮືອຢູ່ທະເລຈີນໃຕ້. ຈີນກັບອາຊຽນໄດ້ບັນລຸຄວາມຮັບຮູ້ທີ່ເປັນເອກະສັນກັນ ຂໍ້ຂັດແຍ້ງທີ່ກ່ຽວຂ້ອງຄວນແກ້ໄຂໂດຍຝ່າຍທີ່ກ່ຽວຂ້ອງໂດຍກົງດ້ວຍວິທີປຶກສາຫາລີແລະເຈລະຈາກັນ. ການຍື່ນຂໍ້ຂັດແຍ້ງໃຫ້ສານສາກົນຕັດສິນພຽງຝ່າຍດຽວແມ່ນເປັນການລະເມີດຖະແຫລງການວ່າດ້ວຍການປະພຶດຂອງບັນດາຝ່າຍຢູ່ທະເລຈີນໃຕ້ທີ່ເຊັນໂດຍຈີນກັບບັນດາປະເທດອາຊຽນ. ຈີນຈະຮ່ວມກັບປະເທດອາຊຽນ ທໍາຄວາມພະຍາຍາມ, ຮັກສາສັນຕິພາບແລະສະຖຽນລະພາບຂອງທະເລຈີນໃຕ້ ແລະສືບຕໍ່ປະຕິບັດຖະແຫລງການວ່າດ້ວຍການປະພຶດຂອງບັນດາຝ່າຍຢູ່ທະເລຈີນໃຕ້ຢ່າງຮອບດ້ານແລະມີປະສິດທິຜົນ, ຊຸກຍູ້ການປຶກສາຫາລືກ່ຽວກັບຫລັກການປະພຶດຢູ່ທະເລຈີນໃຕ້ຢ່າງຕັ້ງໜ້າ.
