ການເຈລະຈາລະຫວ່າງລັດຖະບານມຽນມາແລະອົງການຈັດຕັ້ງກະຊິນໄດ້ບັນລຸຄວາມຮັບຮູ້ທີ່ເປັນເອກະສັນກັນ 7 ຂໍ້
ວັນທີ 10 ຕຸລານີ້, ລັດຖະບານມຽນມາເປີດເຜີຍວ່າ, ຜູ້ຕາງໜ້າຂອງລັດຖະບານມຽນມາແລະອົງການຈັດຕັ້ງກະຊິນໄດ້ບັນລຸຄວາມຮັບຮູ້ທີ່ເປັນເອກະສັນກັນ 7 ຂໍ້ໃນຕອນບ່າຍວັນດຽວກັນ ໂດຍຜ່ານການເຈລະຈາເປັນເວລາ 3 ມື້ຢູ່ເມືອງມີຈີນາ.
ລັດຖະບານມຽນມາລາຍງານວ່າ, ສອງຝ່າຍເຫັນດີຈະສືບຕໍ່ທໍາຄວາມພະຍາຍາມເພື່ອບັນລຸການຍຸດຍິງໃນທົ່ວປະເທດ ແລະສ້າງພື້ນຖານການເຈລະຈາດ້ານການເມືອງ. ສອງຝ່າຍຍັງໄດ້ເຫັນດີຈະສືບຕໍ່ເຮັດວຽກ, ສ້າງຕັ້ງຄະນະກໍາມະການຕິດຕາມກວດກາຮ່ວມກັນ ເພື່ອຍຸດຕິການປະທະກັນດ້ວຍກໍາລັງອາວຸດທັງໝົດ.ສອງຝ່າຍຍັງໄດ້ບັນລຸຄວາມຮັບຮູ້ທີ່ເປັນເອກະສັນກັນກ່ຽວກັບການຈັດສັນຊາວອົບພະຍົບແລະການສ້າງທາງ.
ກອງທັບເອກະລາດກະຊິນມຽນມາເຄີຍບັນລຸສັນຍາຍຸດຍິງກັບລັດຖະບານມຽນມາໃນເດືອນກຸມພາປີ 1994, ແຕ່ວ່າສອງຝ່າຍໄດ້ເກີດການປະທະກັນໃນເດືອນມິຖຸນາ ປີ 2011 ເຊິ່ງໄດ້ທໍາລາຍສັນຕິພາບທີ່ໄດ້ມີຂຶ້ນເປັນເວລາ 17 ປີ. ນັບແຕ່ເດືອນທັນວາປີ 2011 ເປັນຕົ້ນມາ, ສອງຝ່າຍໄດ້ຈັດການເຈລະຈາກັນຫລາຍຮອບແລ້ວ.
