ຊ່ຽວຊານເຫັນວ່າຂອບການຮ່ວມມືແບບ"2+7"ເຮັດໃຫ້"ປະຊາຄົມຊາຕາກຳຈີນ-ອາຊຽນ"ມີເນື້ອໃນລະອຽດ
(GMT+08:00) 2013-10-12 10:28:23 cri
ຕາມຂ່າວ cri: ເນື່ອງໃນໂອກາດທີ່ທ່ານຫລີເຄີ້ສຽງ ນາຍົກລັດຖະມົນຕີຈີນເຂົ້າຮ່ວມກອງປະຊຸມສຸດຍອດຈີນ-ອາຊຽນຄັ້ງທີ 16 ທີ່ຈັດຂຶ້ນຢູ່ບັນດາເຊລີເບກາວັນໃນຫວ່າງມໍ່ໆມານີ້, ທ່ານໄດ້ບັນຍາຍນະໂຍບາຍຂອງລັດຖະບານຈີນກ່ຽວກັບການພັດທະນານະໂຍບາຍການພົວພັນກັບອາຊຽນໃນ 10 ປີຕໍ່ຫນ້ານີ້, ຄື:ຄວາມຮັບຮູ້ທີ່ຄືກັນທາງການເມືອງ 2 ຂໍ້ແລະແນວຄວາມຄິດການຮ່ວມມືໃນ 7 ຂົງເຂດ, ອັນໄດ້ພາໃຫ້ວົງການຕ່າງໆມີຄວາມສົນໃຈຢ່າງສູງ. ໃນເວລາໃຫ້ສຳພາດຕໍ່ນັກຂ່າວ cri, ທ່ານຊີສິ່ງ, ຫົວຫນ້າສະຖາບັນຄົ້ນຄວ້າບັນຫາສາກົນຈີນກ່າວວ່າ, ຂອບການຮ່ວມມື ແບບ "2+7" ໄດ້ເພີ່ມເນື້ອໃນລະອຽດໃຫ້ແກ່"ປະຊາຄົມຊາຕາກຳຈີນ-ອາຊຽນ"ທີ່ທ່ານສີຈິ້ນຜິງ ປະທານປະເທດຈີນສະເຫນີ ອອກໃນເວລາກ່າວປາຖະກະຖາຢູ່ສະພາແຫ່ງຊາດອິນໂດເນເຊຍໃນຫວ່າງກ່ອນນີ້ບໍ່ດົນ, ແລະໄດ້ສ້າງພື້ນຖານທີ່ຫມັ້ນແກ່ນທີ່ສຸດໃຫ້ແກ່ທົດສະວັດເພັດມະນີຂອງການພົວພັນລະຫວ່າງຈີນ-ອາຊຽນ.
ທ່ານຊີສິ່ງວິເຄາະວ່າ:"ຄວາມຮັບຮູ້ຄືກັນ 2 ຂໍ້ສະຫລຸບແລ້ວກໍ່ແມ່ນ:ໄວ້ເນື້ອເຊື່ອໃຈເຊິ່ງກັນແລະກັນທາງດ້ານຍຸດທະສາດ, ແລະໄດ້ຮັບຜົນປະໂຫຍດຮ່ວມກັນທາງດ້ານເສດຖະກິດ. ຄວາມໄວ້ເນື້ອເຊື່ອໃຈເຊິ່ງກັນແລະກັນທາງດ້ານຍຸດທະສາດແມ່ນພື້ນຖານຂອງທຸກສິ່ງທຸກຢ່າງ, ຖ້າບໍ່ມີພື້ນຖານນີ້, ການຮ່ວມມືໃນບາດກ້າວຕໍ່ໄປນັ້ນກໍ່ຈະດຳເນີນໄປບໍ່ໄດ້. ການໄດ້ຮັບຜົນປະໂຫຍດຮ່ວມກັນທາງດ້ານເສດຖະກິດແມ່ນສ້າງຂຶ້ນບົນພື້ນຖານຂອງຜົນປະໂຫຍດ, ຫມົດທຸກຄົນສາມາດໄດ້ຮັບຜົນປະໂຫຍດ, ແລະຕ່າງໄດ້ຮັບຜົນດີຈາກອີກຝ່າຍຫນຶ່ງ. ສະນັ້ນ, ຂ້າພະເຈົ້າເຫັນວ່າຄວາມຮັບຮູ້ທີ່ຄືກັນ 2 ຂໍ້ນີ້, ຂໍ້ຫນຶ່ງແມ່ນຫລັກຖານ, ອີກຂໍ້ຫນຶ່ງແມ່ນພື້ນຖານ."
ທ່ານຊີສິ່ງເຫັນວ່າ, ແນວຄວາມຄິດຂອງທ່ານຫລີເຄີ້ສຽງກ່ຽວກັບການຮ່ວມມືໃນ 7 ຂົງເຂດລວມທັງພື້ນຖານການເມືອງ,ແລະເນື້ອໃນອື່ນໆເຊັ່ນ: ເສດຖະກິດການຄ້າ, ພື້ນຖານໂຄງລ່າງ, ການຮ່ວມມືດ້ານການທະນາຄານ, ການຮ່ວມມືທາງທະເລ,ການຮ່ວມມືດ້ານຄວາມຫມັ້ນຄົງແລະການແລກປ່ຽນດ້ານວັດທະນະທຳເປັນຕົ້ນ, ເຊິ່ງມີຄວາມຄົບຖ້ວນສົມບູນຫລາຍ, ແລະສາມາດປະຕິບັດໄດ້.
ທ່ານກ່າວເນັ້ນວ່າ, ຂອບການຮ່ວມມືແບບ"2+7"ແມ່ນໄດ້ຕອບສະຫນອງຄວາມສົນໃຈຂອງບັນດາປະເທດໃນອາຊຽນ, ໄດ້ເພີ່ມທະວີຄວາມຫມັ້ນໃຈຂອງບັນດາປະເທດອາຊຽນທີ່ຢູ່ຮ່ວມກັບຈີນໂດຍສັນຕິແລະມີມິດຕະພາບ. ທ່ານເວົ້າວ່າ, ຖືການຄົ້ນຄວ້າການເຊັນສົນທິສັນຍາວ່າດ້ວຍມິດຕະພາບແລະການຮ່ວມມືຖານບ້ານໃກ້ເຮືອນຄຽງລະຫວ່າງຈີນກັບປະເທດອາຊຽນເປັນຕົວຢ່າງ, ນີ້ຫມາຍຄວາມວ່າໄດ້ກຳນົດການພົວພັນມິດຕະພາບຖານບ້ານໃກ້ເຮືອນຄຽງລະຫວ່າງສອງຝ່າຍດ້ວຍກົດຫມາຍ, ກຳຈັດຄວາມອາດເປັນໄປໄດ້ທີ່ແກ້ໄຂຄວາມຂັດແຍ້ງກັນດ້ວຍກຳລັງອາວຸດ, ນີ້ມີຄວາມຫມາຍເລິກເຊິ່ງຍາວໄກຫລາຍ.
ພາຍໃຕ້ສະຖານະການອັນໃຫມ່, ໃນເວລາເກີດມີຖ້ອຍຄຳທີ່ວ່າ"ຈີນເປັນໄພຂົ່ມຂູ່", ທ່ານນາຍົກລັດຖະມົນຕີຫລີເຄີ້ສຽງໄດ້ສະເຫນີໃຫ້ເຊັນສົນທິສັນຍາວ່າດ້ວຍມິດຕະພາບແລະການຮ່ວມມືຖານບ້ານໃກ້ເຮືອນຄຽງລະຫວ່າງຈີນ-ອາຊຽນ.ນີ້ສາມາດເວົ້າໄດ້ວ່າແມ່ນບໍ່ດ້ອຍກວ່າຄວາມສຳຄັນຂອງຫລັກ 5 ປະການຢູ່ຮ່ວມກັນໂດຍສັນຕິທີ່ທ່ານໂຈວເອີນລາຍ ອະດີດນາຍົກລັດຖະມົນຕີຈີນໄດ້ສະເຫນີອອກໃນອະດີດມາແລ້ວ.
