ທ່ານຫລີເຄີ້ສຽງກ່າວເນັ້ນວ່າຕ້ອງສືບທອດມິດຕະພາບລະຫວ່າງຈີນໄທ ຊຸກຍູ້ການຮ່ວມມືຢ່າງຕິດແທດຕົວຈິງ
（ທ່ານຫລີເຄີ້ສຽງ ນາຍົກລັດຖະມົນຕີຈີນພົບປະເຈລະຈາກັບທ່ານນາງຍິງຣັກ ຊິນນະວັດ ນາຍົກລັດຖະມົນຕີໄທ）
ຕາມຂ່າວ cri: ວັນທີ 11 ຕຸລານີ້, ທ່ານຫລີເຄີ້ສຽງ ນາຍົກລັດຖະມົນຕີຈີນໄດ້ພົບປະເຈລະຈາກັບທ່ານນາງຍິງລັກ ຊິນນະວັດ ນາຍົກລັດຖະມົນຕີໄທຢູ່ທີ່ນະຄອນຫລວງບາງກອກ.ຫລັງຈາກນັ້ນ, ທັງສອງທ່ານໄດ້ຈັດກອງປະຊຸມຂ່າວຮ່ວມກັນ.
ທ່ານຫລີເຄີ້ສຽງກ່າວວ່າ, ຈີນຊົມເຊີຍໄທທີ່ໄດ້ເສີມຂະຫຍາຍບົດບາດຢ່າງຕັ້ງຫນ້າໃນຖານະເປັນປະເທດປະສານການພົວພັນຈີນ-ອາຊຽນ. ລັດຖະບານຈີນຍິນດີຮ່ວມກັບປະເທດໄທຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ກ້າວໄປຫນ້າເລື້ອຍໆ.ເຊື່ອວ່າການພົວພັນລະຫວ່າງຈີນກັບໄທຈະມີຄວາມສະຫນິດສະຫນົມແລະແຫນ້ນແຟ້ນກວ່າເກົ່າບົນພື້ນຖານທີ່ມີໄມຕີຈິດມິດຕະພາບອັນເປັນມູນເຊື້ອ,ການຮ່ວມມືລະຫວ່າງຈີນກັບໄທຈະສ້າງຄວາມຜາສຸກໃຫ້ແກ່ປະຊາຊົນຂອງທັງສອງປະເທດກໍ່ຄືທົ່ວພາກພື້ນ.
ທ່ານນາງຍິງລັກກ ຊິນນະວັດກ່າວວ່າ, ທ່ານຫລີເຄີ້ສຽງຢ້ຽມຢາມປະເທດໄທເທື່ອນີ້ໄດ້ຊີ້ທິດໃຫ້ແກ່ແຜນການພັດທະນາການພົວພັນລະຫວ່າງໄທຈີນໃນເວລາຍາວໄກ.ໄທຍິນດີເພີ່ມທະວີການຮ່ວມມືກັບຈີນໃນທຸກຂົງເຂດ, ພະຍາຍາມບັນລຸເປົ້າຫມາຍທີ່ຍອດມູນຄ່າການຄ້າລະຫວ່າງສອງຝ່າຍໃຫ້ມີເຖິງ 100 ຕື້ໂດລາໃນປີ 2015. ໄທຊົມເຊີຍຈີນເຂົ້າຮ່ວມການກໍ່ສ້າງໂຄງການລົດໄຟຄວາມໄວສູງຂອງໄທ, ແລະສະຫນັບສະຫນູນຂໍ້ລິເລີ່ມຂອງຈີນກ່ຽວກັບການສ້າງທະນາຄານລົງທຶນພື້ນຖານໂຄງລ່າງອາຊີ. ໄທຍິນດີຮ່ວມກັບຈີນທຳຄວາມພະຍາຍາມຕັ້ງຫນ້າຊຸກຍູ້ການພົວພັນລະຫວ່າງອາຊຽນ-ຈີນໃຫ້ໄດ້ຮັບການພັດທະນາທີ່ໃຫຍ່ຫລວງກວ່າເກົ່າ.
