ການທີ່ບໍ່ໃຫ້ນັກວິທະຍາສາດເຂົ້າຮ່ວມການແລກປ່ຽນສາກົນໂດຍຖືສັນຊາດເປັນຂໍ້ອ້າງນັ້ນແມ່ນບໍ່ເຫມາະສົມ
(GMT+08:00) 2013-10-13 13:45:20 cri
ວັນທີ 12 ຕຸລານີ້, ໂຄສົກສະມາຄົມວິທະຍາສາດເຕັກນິກຂອງຈີນໃຫ້ສຳພາດຕໍ່ນັກຂ່າວໂດຍກ່າວວ່າ, ການຢັບຢັ້ງໂອກາດແລະສິດຂອງນັກຄົ້ນຄວ້າວິທະຍາສາດໃນການເຂົ້າຮ່ວມການແລກປ່ຽນສາກົນໂດຍຖືສັນຊາດເປັນຂໍ້ອ້າງນັ້ນແມ່ນບໍ່ເຫມະສົມ.
ຫວ່າງມໍ່ໆນີ້, ການຮ້ອງຂໍເຂົ້າຮ່ວມກອງປະຊຸມໂຄງການກ້ອງຊ່ອງອະວະກາດແຄັບຕັນທີ່ຈະຈັດຂຶ້ນຢູ່ອາເມລິກາໃນເດືອນຫນ້າຂອງນັກຄົ້ນຄວ້າຈີນ 6 ຄົນຖືກປະຕິເສດ, ເຊິ່ງເຮັດໃຫ້ຫາງສຽງໃຫ້ຄວາມສົນໃຈຢ່າງກວ້າງຂວາງ.ວົງການວິທະຍາສາດເຕັກນິກຈີນແລະຕ່າງປະເທດມີປະຕິກິລິຍາຢ່າງຮຸນແຮງຕໍ່ເລື່ອງນີ້, ແລະສະແດງຄວາມບໍ່ພໍໃຈຕໍ່ການກະທຳຈຳແນກດັ່ງກ່າວ.
ໂຄສົກສະມາຄົມວິທະຍາສາດເຕັກນິກຂອງຈີນເຫັນວ່າ, ການຊອກຄົ້ນຊັ້ນຈັກກະວານແມ່ນພາລະກິດຮ່ວມຂອງທົ່ວມວນມະນຸດ, ແມ່ນການຊອກຄົ້ນໂລກທີ່ຍັງບໍ່ທັນຮູ້ນັ້ນ.ການແລກປ່ຽນດ້ານວິຊາການແມ່ນແຫລ່ງທີ່ມາແຫ່ງການປະດິດສ້າງ, ການແລກປ່ຽນແລະການຮ່ວມມືກັນໃນສາກົນແມ່ນວິທີແລະຊ່ອງທາງທີ່ສຳຄັນໃນການຊຸກຍູ້ວິທະຍາສາດເຕັກນິກກ້າວໄປຫນ້າ.
ໂຄສົກຜູ່ກ່າວວ່າ, ຫວັງວ່າປະເທດແລະອົງການວິຊາການທີ່ກ່ຽວຂ້ອງຈົ່ງແກ້ໄຂບັນຫາທີ່ເກີດຂຶ້ນໃນປັດຈຸບັນໃຫ້ດີ, ເພື່ອເສີມຂະຫຍາຍບົດບາດທີ່ມີລັກສະນະສ້າງສັນໃນການເປີດປະຕູແລະການຮ່ວມມືກັນໃນດ້ານການຄົ້ນນຄວ້າວິທະຍາສາດເຕັກນິກ. ວົງການວິທະຍາສາດຈີນຍິນດີຮ່ວມກັນປະເທດຕ່າງໆໃນໂລກຊົມໃຊ້ບົດຮຽນທີ່ຊຸກຍູ້ເສດຖະກິດພັດທະນາດ້ວຍເຕັກນິກການບິນອະວະກາດ, ຍຶດຖືນ້ຳໃຈຮ່ວມມືກັນພັດທະນາແລະຊົມໃຊ້ຊັ້ນອະວະກາດ, ເພີ່ມທະວີການແລກປ່ຽນແລະການຮ່ວມມືກັນໃນສາກົນ, ນຳໃຊ້ອະວະກາດໂດຍສັນຕິ, ສະແຫວງຫາຄວາມສຸກໃຫ້ແກ່ທົ່ວມວນມະນຸດ.
