ແຂວງຢຸນານຈີນກັບລາວເຊັນສັນຍາກ່ຽວກັບການຮ່ວມມືແລະການແລກປ່ຽນດ້ານການສຶກສາແລະດ້ານອື່ນໆ
(GMT+08:00) 2013-10-13 13:48:52 cri
ວັນທີ 12 ຕຸລານີ້, ບົນພື້ນຖານບົດບັນທຶກຊ່ວຍຈຳທີ່ເຊັນໃນເດືອນທັນວາປີ 2012, ພະແນກສຶກສາທິການແຂວງຢຸນນານຈີນກັບກະຊວງສຶກສາທິການແລະການກິລາລາວໄດ້ເຊັນຂໍ້ມາດຕາເພີ່ມຕື່ມຂອງບົດບັນທຶກຊ່ວຍຈຳດັ່ງກ່າວ, ເພື່ອຊຸກຍູ້ການແລກປ່ຽນແລະການຮ່ວມມືລະຫວ່າງສອງຝ່າຍໃນດ້ານການສຶກສາ, ວັດທະນະທຳ, ສາທາລະນະສຸກແລະສື່ສານມວນຊົນ.
ອີງຕາມຂໍ້ມາດຕາເພີ່ມຕື່ມ, ພະແນກສຶກສາທິການແຂວງຢຸນນານຈີນຈະຮ່ວມກັບກະຊວງສຶກສາທິການແລະການກິລາລາວຖ່າຍທຳລາຍການໂທລະພາບ, ເຊິ່ງມີເນື້ອໃນລວມທັງການຮຽນພາສາຈີນ, ການເຜີຍແຜ່ວັດທະນະທຳ, ການສຶກສາວິຊາສະເພາະຕ່າງໆ, ແລະການສຶກສາວິຊາຊີບ, ຈະອອກອາກາດໂດຍຜ່ານໂທລະພາບແຫ່ງຊາດລາວມື້ລະ 1 ຊົ່ວໂມງແຕ່ວັນຈັນຫາວັນສຸກ.
ປີ 2009 ພະແນກສຶກສາທິການແຂວງຢຸນນານຈີນກັບພາກສ່ວນທີ່ກ່ຽວຂ້ອງຂອງລາວໄດ້ເຊັນສັນຍາການຮ່ວມມືດ້ານການສຶກສາຢ່າງເປັນທາງການ, ຫລັງຈາກນັ້ນການຮ່ວມມືລະຫວ່າງສອງຝ່າຍໄດ້ດຳເນີນຢ່າງວ່ອງໄວ. ປີ 2012, ພະແນກສຶກສາທິການແຂວງຢຸນນານໄດ້ຈັດງານໂຄສະນາເຜີຍແຜ່ການຮ່ວມມືດ້ານການສຶກສາລະຫວ່າງແຂວງຢຸນນານຈີນກັບລາວຢູ່ນະຄອນຫລວງວຽງຈັນ, ໄດ້ເພີ່ມທະວີການຮ່ວມມືດ້ານການສຶກສາກັບລາວຈາກສາມດ້ານຄື: ເພີ່ມຈຳນວນນັກສຶກສາທີ່ໄປຮຽນຢູ່ປະເທດຝ່າຍກົງກັນຂ້າມ, ເພີ່ມທະວີການຮ່ວມມືດ້ານການສິດສອນວິຊາແພດ, ແລະເຜີຍແຜ່ການສຶກສາດ້ານກະສິກຳ.ເດືອນກໍລະກົດປີ 2013, ພະແນກສຶກສາທິການແຂວງຢຸນນານໄດ້ຄັດເລືອກແລະອົບຮົມນາຍແປພາສາຈີນ-ລາວ ຢູ່ແຂວງຢຸນນານແລະລາວຈຳນວນ 50 ຄົນເພື່ອ ໃຫ້ການບໍລິການທີ່ດີກວ່າເກົ່າແກ່ການແລກປ່ຽນແລະການຮ່ວມມືລະຫວ່າງສອງປະເທດໃນຫລາຍລະດັບແລະໃນຂົງເຂດກວ້າງຂວາງກວ່າເກົ່າ.
