ນາຍົກລັດຖະມົນຕີຈີນແລະຫວຽດນາມຈັດການເຈລະຈາ, ນາຍົກຈີນກ່າວເນັ້ນວ່າຈະຊຸກຍູ້ການຮ່ວມມືທາງທະເລ, ທາງບົກແລະດ້ານການເງິນລົງເລິກການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນກັບຫວຽດນາມ
ຕອນບ່າຍວັນທີ 13 ຕຸລານີ້ຢູ່ທີ່ນະຄອນຫຼວງຮາໂນ້ຍ, ທ່ານຫຼີ້ເຄີ້ສຽງ, ນາຍົກລັດຖະ ມົນຕີຈີນໄດ້ເຈລະຈາກັບທ່ານຫງວຽນເຕິນຢຸງ, ນາຍົກລັດຖະມົນຕີຫວຽດນາມ, ສອງຝ່າຍໄດ້ແລກປ່ຽນຄວາມເຫັນຢ່າງເລິກເຊິ່ງກ່ຽວກັບການຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນກັບຫວຽດນາມແລະໄດ້ກ້າວເຖິງຂັ້ນມີຄວາມເຫັນເປັນເອກະສັນກັນໃນຫຼາຍດ້ານທີ່ສຳຄັນ.
ທ່ານຫຼີ້ເຄີ້ສຽງກ່າວວ່າ, ໃນຖານະເປັນປະເທດບ້ານໃກ້ເຮືອນຄຽງທີ່ດີຕໍ່ກັນ, ຮັກສາການພົວພັນລະຫວ່າງຈີນກັບຫວຽດນາມໃຫ້ຂະຫຍາຍຕົວຢ່າງໝັ້ນທ່ຽງແລະແຂງແຮງແລະສອດຄ່ອງກັບຜົນປະໂຫຍດຂອງປະຊາຊົນສອງຊາດ, ມີຜົນດີຕໍ່ການພັດທະນາສັນຕິພາບແລະຄວາມຈະເລີນຮຸ່ງເຮືອງຂອງພາກພື້ນ, ສອງຝ່າຍຄວນພະຍາຍາມສ້າງຈິນຕະນາການໃໝ່, ແກ້ໄຂບັນຫາທີ່ຕົກທອດມາແຕ່ປະຫວັດສາດພຽງໜຶ່ງດຽວລະຫວ່າງຈີນກັບຫວຽດນາມຄືບັນຫາທະເລຈີນໄຕ້. ສອງຝ່າຍກ້າວເຖິງຂັ້ນມີຄວາມເຫັນເປັນເອກະສັນກັນເທື່ອນີ້, ແລະສ້າງໜ່ວຍງານປະສົມສາມໜ່ວຍທາງທະເລ, ທາງບົກແລະການເງິນ, ແລະເລີ່ມດຳເນີນວຽກງານພາຍໃນປີນີ້, ດຳເນີນການຮ່ວມມືໃນສາມຂົງເຂດດັ່ງກ່າວໄປພ້ອມໆກັນ.
ທ່ານຫຼີ້ເຄີ້ສຽງໄດ້ບັນລະຍາຍການພິຈາລະນາພື້ນຖານຂອງຈີນກ່ຽວກັບການຮ່ວມມືໃນສາມຂົງເຂດຄື:
ໜຶ່ງ, ຕັ້ງໜ້າຊຸກຍູ້ການພັດທະນາຮ່ວມກັນທາງທະເລລະຫວ່າງຈີນກັບຫວຽດນາມ, ສ້າງໜ່ວຍງານປຶກສາຫາລືການພັດທະນາຮ່ວມກັນທາງທະເລຈີນຫວຽດນາມ.
ສອງ, ເພີ່ມທະວີການວາງແຜນຍຸດທະສາດ, ສ້າງໜ່ວຍງານຮ່ວມມືໃນການສ້າງພື້ນຖານໂຄງລ່າງ. ຄວນຊຸກຍູ້ການຮ່ວມມືລະຫວ່າງສອງປະເທດໃນຂົງເຂດການເຊື່ອມຈອດກັນ, ຂົງເຂດເສດຖະກິດການຄ້າແລະຂົງເຂດການລົງທຶນເປັນຕົ້ນ.
ສາມ, ເພີ່ມທະວີການຮ່ວມມືດ້ານການເງິນ, ສ້າງໜ່ວຍງານຮ່ວມມືດ້ານການເງິນຈີນຫວຽດນາມ. ຄົ້ນຄວ້າປຶກສາຫາລືການເຊັນສັນຍາກ່ຽວກັບການແລກປ່ຽນເງິນຕາແລະຊຳລະບັນຊີດ້ວຍເງິນຕາຂອງປະເທດຕົນ, ຮັກສາການພັດທະນາຢ່າງໝັ້ນທ່ຽງຂອງສອງປະເທດກໍຄືຂອງພາກພື້ນໃນດ້ານເສດຖະກິດແລະການເງິນ.
ຈີນຍັງຍິນດີເພີ່ມທະວີການແລກປ່ຽນດ້ານວັດທະນະທຳກັບຫວຽດນາມ, ຊຸກຍູ້ການໄປມາຫາສູ່ກັນລະຫວ່າງຊາວໜຸ່ມສອງປະເທດແລະການຮ່ວມມືດ້ານວັດທະນະທຳແລະການສຶກສາ, ສ້າງພື້ນຖານສັງຄົມຂອງການຂະຫຍາຍການພົວພັນລະຫວ່າງສອງປະເທດຢ່າງແຂງແຮງແລະໝັ້ນທ່ຽງໃຫ້ດີ.
ທ່ານຫງຽວນເຕິນຢຸງຕາງໜ້າພັກ, ລັດຖະບານແລະປະຊາຊົນຫວຽດນາມຍິນດີຕ້ອນຮັບຢາງສຸດອົກຕໍ່ທ່ານຫຼີ້ເຄີ້ສຽງຢ້ຽມຢາມຫວຽດນາມຢ່າງເປັນທາງການ, ຂອບໃຈນຳຝ່າຍຈີນໃຫ້ການສະໜັບສະໜູນແລະຊ່ວຍເຫຼືອອັນລ້ຳຄ່າແລະຫຼວງຫຼາຍແກ່ຫວຽດນາມໃນໄລຍະຍາວນານມານີ້. ທ່ານຫງວຽນເຕິນຢຸງກ່າວວ່າ, ເຫັນດີນຳຂໍ້ສະເໜີຂອງທ່ານຫຼີ້ເຄີ້ສຽງກ່ຽວກັບການຂະຫຍາຍການພົວພັນລະຫວ່າງສອງປະເທດຕື່ມອີກ, ກ່າວວ່າຝ່າຍຫວຽດນາມເອົາໃຈໃສ່ໃນລະດັບສູງຕໍ່ການພົວພັນກັບຈີນ, ຍິນດີເພີ່ມທະວີການຕິດຕໍ່ພົວພັນລະດັບສູງກັບຈີນໃຫ້ໃກ້ຊິດກວ່າເກົ່າ, ເພີ່ມຄວາມໄວ້ເນື້ອເຊື່ອໃຈເຊິ່ງກັນແລະການດ້ານການເມືອງ, ແລະຊຸກຍູ້ການຮ່ວມມືທາງທະເລ, ທາງບົກແລະດ້ານການເງິນ, ພະຍາຍາມເຮັດໃຫ້ໄດ້ຮັບໝາກຜົນອັນຕັ້ງໜ້າໂດຍໄວ, ເພີ່ມທະວີການປະສານສົມທົບໃນວຽກງານພາກພື້ນແລະສາກົນ, ແກ້ໄຂຄວາມຂັດແຍ່ງຢ່າງເໝາະສົມ, ຊຸກຍູ້ໃຫ້ການພົວພັນມິດຕະພາບແລະການຮ່ວມມືລະຫວ່າງຫວຽດນາມຈີນຂະຫຍາຍໄປຂ້າງໜ້າຢ່າງຮອບດ້ານ.
ພາຍຫຼັງການເຈລະຈາສິ້ນສຸດລົງ, ນາຍົກລັດຖະມົນຕີທັງສອງໄດ້ຮ່ວມກັນພົບປະກັບນັກຂ່າວ, ແລະໄດ້ເປັນສັກຊີພິຍານໃນພິທີລົງນາມເອກະສານຮ່ວມມືໃນຂົງເຂດທາງທະເລ, ການເງິນ, ເສດຖະກິດການຄ້າແລະການກໍ່ສ້າງພື້ນຖານໂຄງລ່າງເປັນຕົ້ນ.
