ສື່ມວນຊົນຍີ່ປຸ່ນກ່າວວ່າ, ລັດຖະບານຍີ່ປຸ່ນເຄີຍຫລົບຫລີກບັນຫານາງບໍາເລີຂອງອາຊີຕາເວັນອອກສຽງໃຕ້
ວັນທີ 13 ຕຸລານີ້, ໜັງສືພິມອາຊາຮີຊິມບູນຂອງຍີ່ປຸ່ນແຈ້ງຂ່າວວ່າ, ລັດຖະບານຍີ່ປຸ່ນເຄີຍຈົງໃຈຫລົບຫລີກບັນຫານາງບໍາເລີຂອງອາຊີຕາເວັນອອກສຽງໃຕ້ໃນຊຸມປີ 90 ສະຕະວັດແລ້ວນີ້ ເພື່ອຫລຸດຜ່ອນຄວາມສົນໃຈຂອງປະຊາຄົມໂລກຕໍ່ບັນຫານີ້.
ໜັງສືພິມອາຊາຮີຊິມບູນໄດ້ລາຍງານຂ່າວນີ້ເປັນຂ່າວທີ 1 ໃນໜ້າທໍາອິດຂອງໜັງສືພິມໃນມື້ດຽວກັນ. ຂ່າວດັ່ງກ່າວໄດ້ຍົກເອົາໂທລະເລກລັບຂອງກະຊວງການຕ່າງປະເທດຍີ່ປຸ່ນສະບັບວັນທີ 30 ກໍລະກົດ ປີ 1993 ມາລາຍງານວ່າ, ທ່ານມູໂຕ ກາບຸນ ທີ່ເປັນລັດຖະມົນຕີວ່າການກະຊວງການຕ່າງປະເທດຍີ່ປຸ່ນໃນໄລຍະນັ້ນ ໄດ້ສັ່ງໃຫ້ສະຖານທູດຍີ່ປຸ່ນປະຈໍາອິນໂດເນເຊຍ, ມາເລເຊຍແລະຟິລິບປິນວ່າ, "ການສໍາຫລວດສາມາດປຸກປັ່ນອາລົມຂອງປະຊາຊົນ, ສະນັ້ນຕ້ອງ ຫລົບຫລີກການສໍາຫລວດໃນ 3 ປະເທດນີ້ຈົນສຸດຄວາມສາມາດ". ຂ່າວຊີ້ອອກວ່າ, ເຖິງວ່າລັດຖະບານຍີ່ປຸ່ນໄດ້ທໍາທ່າທີ່ຈະສໍາຫລວດບັນຫານາງບໍາເລີຢ່າງຮອບດ້ານກໍຕາມ, ແຕ່ໃນຕົວຈິງແລ້ວບໍ່ໄດ້ເຮັດຕາມແນວນັ້ນ. ເຈົ້າໜ້າທີ່ຊັ້ນສູງຂອງລັດຖະບານຍີ່ປຸ່ນໃນໄລຍະນັ້ນເຄີຍກ່າວວ່າ, ການສໍາຫລວດບັນຫານາງບໍາເລີບໍ່ຈໍາກັດແຕ່ຢູ່ແຫລມເກົາຫລີເທົ່ານັ້ນ.
ຕໍ່ເລື່ອງທີ່ຍີ່ປຸ່ນບໍ່ໄດ້ສໍາຫລວດບັນຫານາງບໍາເລີຢ່າງເຕັມທີ່, ລັດຖະບານອິນໂດເນເຊຍເຄີຍອອກຖະແຫລງການໃນປີ 1992 ເພື່ອກ່າວປະນາມລັດຖະບານຍີ່ປຸ່ນ.
