ນະຄອນຫຼວງວຽງຈັນຈັດກອງປະຊຸມສາຫາລືກ່ຽວກັບວຽກງານຄົນພິການລາວປະຈຳປີ 2013
ວັນທີ 15 ຕຸລານີ້, ທີ່ໂຮງແຮມດອນຈັນພາເລດ, ນະຄອນຫຼວງວຽງຈັັນ, ກະຊວງແຮງງານ ແລະ ສະຫວັດດີການສັງຄົມ ຮ່ວມກັບອົງການສາກົນເພື່ອຄົນພິການ ຈັດກອງປະຊຸມກ່ຽວກັບວຽກງານຄົນພິການລາວ ປະຈຳປີ 2013 ຂື້ນ, ໂດຍການເປັນປະທານຂອງທ່ານ ນາງ ອ່ອນຈັນ ທຳມະວົງ ລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ຮອງປະທານຄະນະກຳມະການແຫ່ງຊາດ ເພື່ອຄົນພິການ, ເປັນກຽດເຂົ້າຮ່ວມທ່ານ ນາງ ອານ ຣູຟ ຄັຽບ ຜູ່ອຳນວຍການອົງການສາກົນເພື່ອຄົນພິການປະຈຳລາວ, ມີບັນດາຜູ້ຕາງໜ້າຂອງກະຊວງຕ່າງໆ, ຄູ່ຮ່ວມມືເພື່ອພັດທະນາ, ອົງການຈັດຕັ້ງຄົນພິການ ແລະ ພາກສ່ວນກ້ອງຂ້ອງເຂົ້າຮ່ວມຢ່າງພ້ອມພຽງ.
ໃນກອງປະຊຸມ, ທ່ານ ນາງ ອ່ອນຈັນ ທຳມະວົງກ່າວວ່າ: ຈຸດປະສົງຂອງກອງປະຊຸມເພື່ອປຶກສາຫາລືກ່ຽວກັບວຽກງານຂອງຄົນພິການປີ 2013, ແມ່ນເພື່ອຕອບສະໝອງການປຶກສາຫາລືສຳລັບລັດຖະບານ, ອົງການຈັດຕັ້ງສັງຄົມ, ຄູ່ຮ່ວມງານ ແລະ ພາກສ່ວນທີ່ກ່ຽວຂ້ອງຕ່າງໆ ຮ່ວມກັນແລກປ່ຽນການປະຕິບັດທີ່ດີ ແລະ ເພື່ອປຶກສາຫາລືກຳນົດຂອບເຂດການພັດທະນາຄົນພິການແບບມີສ່ວນຮ່ວມຢູ່ໃນລາວ. ໃຫ້ສອດຄ່ອງກັບສົນທິສັນຍາສະຫະປະຊາຊາດ ກ່ຽວກັບການປົກປ້ອງສິດທິ, ຜົນປະໂຫຍດຂອງຄົນພິການ ແລະ ແຜນຍຸດທະສາດອິນຊອນ ວ່າດ້ວຍການປະຕິບັດງານສຳລັບຄົນພິການ ແລະ ການພັດທະນາແຕ່ນີ້ຮອດປີ 2022.
ໃນພິທີດັ່ງກ່າວ, ທ່ານ ນາງ ອານ ຣູຟ ຄັຽບກ່າວວ່າ: ໃນໄລຍະຜ່ານມາພວກເຮົາເນັ້ນເຖິງຄວາມສຳຄັນຂອງການຮັບປະກັນໃນການເຂົ້າເຖິງ ສຳລັບຄົນພິການ ໃນທຸກຂົງເຂດວຽກງານ ແລະ ການມີສ່ວນຮ່ວມທາງດ້ານສັງຄົມ ສ້າງວຽກເຮັດງານທຳຂອງຄົນພິການຂອງລາວ ໃຫ້ມີການພັດທະນາເລື້ອຍໆ.
