ທ່ານບານກີມູນກ່າວປະນາມເຫດການຫລອນໂຈມຕີດ້ວຍລະເບີດຢູ່ອີຣັກ
ວັນທີ 12 ຫາວັນທີ 13 ຕຸລານີ້, ໄດ້ເກີດເຫດການຫລອນໂຈມຕີຮຸນແຮງດ້ວຍລະເບີດທີ່ ລົດຍົນຫລາຍຄັ້ງຢູ່ອີຣັກ ແລະໄດ້ເຮັດໃຫ້ມີຜູ້ໄດ້ຮັບບາດເຈັບແລະເສຍຊີວິດຮ້ອຍກວ່າຄົນ. ວັນທີ 14 ຕຸລານີ້, ທ່ານບານກີມູນ, ເລຂາທິການໃຫຍ່ອົງການສະຫະປະຊາຊາດໄດ້ອອກຖະແຫລງການໂດຍຜ່ານໂຄສົກ ກ່າວປະນາມເຫດການຫລອນໂຈມຕີດ້ວຍລະເບີດຫລາຍຄັ້ງທີ່ເກີດຂຶ້ນໃນມໍ່ໆນີ້ຢູ່ອີຣັກ, ທ່ານໄດ້ຮຽກຮ້ອງໃຫ້ອີຣັກບັນລຸຄວາມເປັນເອກະພາບດ້ານການເມືອງຈົນສຸດຄວາມສາມາດ ແລະຫລີກເວັ້ນຄວາມຮຸນແຮງລະຫວ່າງຝ່າຍຕ່າງ.
ຖະແຫລງການກ່າວວ່າ, ທ່ານບານກີມູນໄດ້ສະແດງຄວາມຢື້ຢາມຖາມຂ່າວຕໍ່ຄອບຄົວຂອງຜູ້ເສຍຊີວິດແລະລັດຖະບານອີຣັກ ແລະຫວັງວ່າຜູ້ທີ່ໄດ້ໄດ້ຮັບບາດເຈັບຈະໄດ້ຮັບການຟື້ນຟູສຸຂະພາບໂດຍໄວ. ທ່ານບານກີມູນກ່າວວ່າ, ເຫດການຫລອນໂຈມຕີທີ່ເກີດຂຶ້ນໃນໂອກາດບຸນເອດ ອານ-ອາດຮາ ແມ່ນຕໍ່າຕ້ອຍທີ່ສຸດ. ພ້ອມນັ້ນ, ທ່ານຍັງໄດ້ຮຽກຮ້ອງໃຫ້ຜູ້ນໍາຝ່າຍຕ່າງໆຂອງອີຣັກທໍາຄວາມພະຍາຍາມເພື່ອບັນລຸຄວາມເປັນເອກະພາບດ້ານການເມືອງ ແລະບໍ່ໃຫ້ປະເທດຕົກຢູ່ຄວາມຮຸນແຮງຂອງຝ່າຍຕ່າງໆອີກ.
