ນາຍົກລັດຖະມົນຕີຈີນພົບປະກັບເລຂາທິການໃຫຍ່ສູນກາງພັກກອມມູນິດຫວຽດນາມ
ຕອນເຊົ້າວັນທີ 14 ຕຸລານີ້, ທ່ານຫລີເຄີ້ສຽງ, ນາຍົກລັດຖະມົນຕີຈີນ ໄດ້ພົບປະກັບທ່ານຫງວຽນຟູຈອງ, ເລຂາທິການໃຫຍ່ສູນກາງພັກກອມມູນິດຫວຽດນາມ ຢູ່ນະຄອນຫລວງຮ່າໂນ້ຍ ຫວຽດນາມ.
ທ່ານຫລີເຄີ້ສຽງກ່າວວ່າ, ຈີນກັບຫວຽດນາມມີສາຍພູແລະແມ່ນໍ້າຕິດຈອດກັນ, ມີວັດທະນະທໍາທີ່ຄ້າຍຄືກັນ, ລະບອບກໍຄືກັນ; ການແລກປ່ຽນແລະການຮ່ວມມືໃນຂົງເຂດຕ່າງໆໄດ້ກ້າວເຂົ້າສູ່ລວງເລິກ. ປັດຈຸບັນນີ້ຈີນແລະຫວຽດນາມລ້ວນແຕ່ຢູ່ໃນໄລຍະສໍາຄັນຂອງການພັດທະນາ, ຈີນຍິນດີຮັກສາການແລກປ່ຽນຊັ້ນສູງດ້ານຍຸດທະສາດກັບຫວຽດນາມ, ເພີ່ມທະວີການແລກປ່ຽນບົດຮຽນດ້ານການຄຸ້ມຄອງລັດແລະການບໍລິຫານວຽກງານ, ຍຶດໝັ້ນຫລັກການທີ່ໃຫ້ບຸລິມະສິດດ້ານເສດຖະກິດແລະຊີວິດການເປັນຢູ່ຂອງປະຊາຊົນເປັນອັນດັບໜຶ່ງ, ລົງເລິກການຮ່ວມມືທີ່ຕິດແທດກັບຕົວຈິງ, ຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດໃຫ້ກ້າວຂຶ້ນສູ່ລະດັບໃໝ່.
ທ່ານຫລີເຄີ້ສຽງຊີ້ອອກວ່າ, ຈະສາມາດແກ້ໄຂບັນຫາທະເລຈີນໃຕ້ໄດ້ດີຫລືບໍ່ ບໍ່ພຽງແຕ່ກ່ຽວພັນກັບມິດຕະພາບລະຫວ່າງປະຊາຊົນສອງຊາດເທົ່ານັ້ນ, ຍັງກ່ຽວພັນກັບສະພາບແວດລ້ອມດ້ານການເມືອງແລະຄວາມໝັ້ນຄົງຂອງການຮ່ວມມືຂະໜາດໃຫຍ່ຕ່າງໆລະຫວ່າງສອງປະເທດ ເຊັ່ນການເປີດກວ້າງການລົງທຶນດ້ານການກໍ່ສ້າງພື້ນຖານໂຄງລ່າງ ແລະອື່ນໆ. ກ່ອນໜ້ານີ້, ທ່ານໄດ້ບັນລຸຄວາມຮັບຮູ້ທີ່ເປັນເອກະສັນກັນທີ່ສໍາຄັນກັບທ່ານ ຫງວຽນເຕິນຢູງ, ນາຍົກລັດຖະມົນຕີຫວຽດນາມ ກ່ຽວກັບການເຮັດໃຫ້ການຮ່ວມມືທາງທະເລ, ທາງບົກ ແລະ ທາງດ້ານເງິນລະຫວ່າງສອງປະເທດພັດທະນາໄປພ້ອມກັນ. ສອງຝ່າຍເຫັນດີເປັນເອກະສັນກັນວ່າຈະຄຸ້ມຄອງຂໍ້ຂັດແຍ້ງຢ່າງເໝາະສົມ, ບໍ່ໃຫ້ບັນຫາທະເລຈີນໃຕ້ລົບກວນການຮ່ວມມືລະຫວ່າງສອງປະເທດ, ຊຸກຍູ້ການຮ່ວມມືທີ່ຕິດແທດກັບຕົວຈິງໃນຂົງເຂດຕ່າງໆລະຫວ່າງສອງປະເທດ ແລະສ້າງຄວາມສຸກໃຫ້ແກ່ປະຊາຊົນສອງຊາດກໍຄືພາກພື້ນນີ້ ບົນພື້ນຖານເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ ແລະຮັດແໜ້ນໄມຕີຈິດມິດຕະພາບອັນເປັນມູນເຊື້ອ.
ທ່ານຫງວຽນຟູຈອງກ່າວວ່າ, ຝ່າຍຫວຽດນາມຈະຈົດຈໍາຈີນທີ່ໄດ້ໃຫ້ການສະໜັບສະໜູນແລະການຊ່ວຍເຫລືອທີ່ລໍ້າຄ່າ. ຫວຽດນາມກັບຈີນມີຜົນປະໂຫຍດຮ່ວມທີ່ກວ້າງຂວາງ ແລະກໍປະເຊີນໜ້າກັບໂອກາດແລະສິ່ງທ້າທາຍຮ່ວມກັນ. ສອງຝ່າຍໄດ້ບັນລຸຄວາມຮັບຮູ້ທີ່ເປັນເອກະສັນກັນກ່ຽວກັບການຮ່ວມມືທາງທະເລ, ທາງບົກ ແລະທາງດ້ານການເງິນໃນຄັ້ງນີ້; ໄດ້ວາງທິດການຮ່ວມມືລະຫວ່າງສອງປະເທດຢ່າງຈະແຈ້ງ. ຝ່າຍຫວຽດນາມຍິນດີຮ່ວມກັບຝ່າຍຈີນ, ຈັດຕັ້ງປະຕິບັດຄວາມຮັບຮູ້ດັ່ງກ່າວຢ່າງຮອບດ້ານ, ປັບປຸງໄມຕີຈິດມິດຕະພາບຖານບ້ານໃກ້ເຮືອນຄຽງຕື່ມອີກ, ລົງເລິກການຮ່ວມມືຮອບດ້ານ, ເພີ່ມທະວີຄວາມສຸກຂອງປະຊົນສອງຊາດ.
ຕອນເຊົ້າວັນດຽວກັນ, ທ່ານຫລີເຄີ້ສຽງໄດ້ເຂົ້າວາງພວງມາລາຢູ່ສຸສານໂຮຈີມິນ.
