ກອງປະຊຸມນັກວິຊາການດ້ານຮັກສາສັນຕິພາບຄັ້ງທີ 6 ຂອງເວທີປຶກສາຫາລືພາກພື້ນອາຊຽນຈັດຂຶ້ນຢູ່ນະຄອນຫລວງປັກກິ່ງ
ວັນທີ 16 ຕຸລານີ້, ກອງປະຊຸມນັກວິຊາການດ້ານຮັກສາສັນຕິພາບຄັ້ງທີ 6 ຂອງເວທີປຶກສາຫາລືພາກພື້ນອາຊຽນໄດ້ຈັດຂຶ້ນຢູ່ນະຄອນຫລວງປັກກິ່ງຂອງຈີນ. ກອງປະຊຸມຄັ້ງນີ້ຈັດໂດຍຫ້ອງການວຽກງານຮັກສາສັນຕິພາບກະຊວງປ້ອງກັນປະເທດຈີນ ເຊິ່ງມີຫົວຂໍ້ທີ່ວ່າ "ເພີ່ມທະວີການຮ່ວມມືຕິດແທດກັບຕົວຈິງກ່ຽວກັບການຝຶກອົບຮົມ, ຍົກລະດັບການເຝິກຫັດດ້ານການຮັກສາສັນຕິພາບ" ແລະມີຜູ້ຕາງໜ້າ 80 ກວ່າຄົນທີ່ມາຈາກອົງການສະຫະປະຊາຊາດແລະ 22 ປະເທດສະມາຊິກຂອງເວທີປຶກສາຫາລືພາກພື້ນອາຊຽນເຂົ້າຮ່ວມ.
ທ່ານຊູນຈ້ຽນກົວ, ຮອງເສນາທິການໃຫຍ່ກອງທັບປົດປ່ອຍປະຊາຊົນຈີນໄດ້ລິເລີ່ມໃນກອງປະຊຸມຄັ້ງນີ້ວ່າ, ຕ້ອງສະໜັບສະໜູນບົດບາດນໍາພາຂອງອົງການສະຫະປະຊາຊາດໃນການເຝິກຫັດດ້ານການຮັກສາສັນຕິພາບ, ເສີມຂະຫຍາຍບົດບາດປະສານສົມທົບຂອງອົງການຈັດຕັ້ງໃນພາກພື້ນໃນການເຝິກຫັດດ້ານການຮັກສາສັນຕິພາບ. ຈີນຍິນດີປະກອບສ່ວນຫລາຍກວ່າເກົ່າເຂົ້າໃນການການເຄື່ອນໄຫວຮັກສາສັນຕິພາບແລະສັນຕິພາບຂອງໂລກ.
ທ່ານເຮີຟ ລັດໂຊສ ຮອງເລຂາທິການໃຫຍ່ອົງການສະຫະປະຊາຊາດທີ່ຮັບຜິດຊອບວຽກງານຮັກສາສັນຕິພາບກ່າວວ່າ, ໜ້າທີ່ຮັກສາສັນຕິພາບຂອງອົງການສະຫະປະຊາຊາດນັບມື້ນັບສັບສົນແລະຫັນເປັນຫລາຍຢ່າງ. ປະເທດສະມາຊິກທີ່ປະກອບສ່ວນດ້ານກໍາລັງທະຫານຂອງອົງການສະຫະປະຊາຊາດຕ້ອງເພີ່ມທະວີການຮ່ວມມື ເພື່ອຮັບມືກັບການເຄື່ອນໄຫວແລະໜ້າທີ່ຮັກສາສັນຕິພາບທີ່ມີຫລາກຫລາຍແລະສັບສົນ.
