ການຢ້ຽມຢາມປະເທດອາຊີຕາເວັນອອກສຽງໃຕ້ຂອງທ່ານຫຼີເຄີ້ສ໋ຽງສະແດງເຖິງຄວາມຈິງອົກຈິງໃຈຂອງຈີນຢ່າງເຕັມສ່ວນ
ຫວ່າງບໍ່ດົນມານີ້, ທ່ານຫຼີເຄີ້ສ໋ຽງ, ນາຍົກລັດຖະມົນຕີຈີນ ໄດ້ສຳເລັດການຢ້ຽມຢາມປະເທດອາຊີຕາເວັນອອກສຽງໃຕ້, ມາຮອດປັດຈຸບັນ, ຜູ້ຊ່ຽວຊານ ນັກວິຊາການຈີນກໍຍັງຍ້ອງຍ້ອງຍໍຊົມເຊີຍໝາກຜົນທີ່ໄດ້ຮັບອັນອຸດົມສົມບູນໃນການຢ້ຽມຢາມຂອງທ່ານໃນຄັ້ງນີ້, ໂດຍເຫັນວ່າ, ການສະແດງເຖິງຄວາມຈິງອົກຈິງໃຈແລະການເຮັດແທ້ທຳຈິງແມ່ນຈຸດພິເສດອັນພົ້ນເດັ່ນຂອງການຢ້ຽມຢາມປະເທດອາຊີຕາເວັນອອກສຽງໃຕ້ຂອງທ່ານຫຼີເຄີ້ສ໋ຽງໃນຄັ້ງນີ້.
ຫົວຂໍ້ກ່ຽວກັບການບຸກເບີກພັດທະນາທະເລຈີນໃຕ້ຮ່ວມກັນໄດ້ມີຢູ່ແຕ່ຕົ້ນຕະຫຼອດ ປາຍໃນການຢ້ຽມຢາມຂອງທ່ານຫຼີເຄີ້ສ໋ຽງໃນຄັ້ງນີ້. ໃນການຢ້ຽມຢາມປະເທດບຼູໄນ ເຊິ່ງເປັນ ປະເທດທຳອິດໃນການຢ້ຽມຢາມຂອງທ່ານຫຼີເຄີ້ສ໋ຽງໃນຄັ້ງນີ້, ສອງປະເທດຈີນແລະບຼູໄນໄດ້ເຫັນດີເປັນເອກະພາບກັນໃນການເພີ່ມທະວີການຮ່ວມມືເທິງທະເລ ແລະ ຊຸກຍູ້ການບຸກເບີກຮ່ວມກັນ ໃນຖະແຫຼງການຮ່ວມຂອງສອງປະເທດ. ທ່ານອູຊື້ສູນ, ຫົວໜ້າສະຖາບັນຄົ້ນຄວ້າທະເລຈີນໃຕ້ຈີນ ກ່າວວ່າ: ການກະທຳດັ່ງກ່າວຈະເສີມຂະຫຍາຍບົດບາດເປັນການນຳທາງຕໍ່ຫຼັກການທີ່ "ໂຈະບັນຫາຂັດແຍ່ງໄວ້ ແລະ ບຸກເບີກຮ່ວມກັນ" ທີ່ລັດຖະບານຈີນລິເລີ່ມມາໂດຍຕະຫຼອດ.
ໃນການຢ້ຽມຢາມຫວຽດນາມ ເຊິ່ງເປັນປະເທດສຸດທ້າຍໃນການເດີນທາງໄປຢ້ຽມຢາມປະເທດອາຊີຕາເວັນອອກສຽງໃຕ້ໃນຄັ້ງນີ້, ທ່ານຫຼີເຄີ້ສ໋ຽງ ໄດ້ຜ່ານຜ່າຄວາມຫຍຸ້ງຍາກໃນບັນຫາທະເລຈີນໃຕ້ ເຊິ່ງເປັນບັນຫາຂັດຂວາງຕໍ່ການພັດທະນາການພົວພັນລະຫວ່າງສອງປະເທດຈີນ-ຫວຽດນາມ. ລັດຖະບານທັງສອງປະເທດໄດ້ບັນລຸຄວາມຮັບຮູ້ທີ່ເປັນເອກະສັນກັນໃນການຢ້ຽມຢາມໃນຄັ້ງນີ້, ຕົກລົງສ້າງຕັ້ງໜ່ວຍງານປຶກສາຫາລືການບຸກເບີກທາງທະເລຮ່ວມກັນ. ສື່ມວນຊົນຫຼາຍແຫ່ງເຫັນວ່າ, ການກະທຳນີ້ໄດ້ສົ່ງສັນຍານຕໍ່ພາຍນອກວ່າ ຈີນ-ຫວຽດນາມຍິນດີຜ່ານການຮ່ວມມືເພື່ອແກ້ໄຂບັນຫາຫຍຸ້ງຍາກ. ນອກຈາກນີ້ແລ້ວ, ທ່ານຫຼີເຄີ້ສ໋ຽງ ຍັງໄດ້ສະເໜີຂໍ້ລິເລີ່ມການສ້າງຕັ້ງໜ່ວຍງານ ຮ່ວມມືດ້ານການທະນາຄານຈີນ-ຫວຽດນາມ, ເພື່ອປົກປັກຮັກສາການພັດທະນາຢ່າງໝັ້ນທ່ຽງດ້ານເສດຖະກິດແລະການທະນາຄານຂອງສອງປະເທດ ກໍຄືຂອງພາກພື້ນ.
ໃນການຢ້ຽມຢາມຄັ້ງນີ້, ຄົນທັງຫຼາຍມີວາມປະທັບໃຈຢ່າງເລິກເຊິ່ງ ທີ່ທ່ານຫຼີເຄີ້ສ໋ຽງ ແນະນຳເຕັກໂນໂລຊີທາງລົດໄຟຄວາມໄວ້ສູງຂອງຈີນໃຫ້ທ່ານນາງ ຍິ່ງລັກ ຊິນນະວັດໄດ້ຮັບຊາບ. ໃນແຜນການໄລຍະຍາວທີ່ຈີນແລະໄທຮ່ວມກັນປະກາດນັ້ນ ໄດ້ລະບຸຢ່າງຈະແຈ້ງວ່າ, ຈີນຍິນດີເຂົ້າຮ່ວມການກໍ່ສ້າງໂຄງການລະບົບທາງລົດໄຟຄວາມໄວສູງຂອງໄທ. ຕໍ່ເລື່ອງນີ້, ທ່ານຈ່າງຈິວຫວນ, ອະດີດເອກອັກຄະລັດຖະທູດຈີນປະຈຳໄທ ກ່າວວ່າ: ຈີນແລະໄທໄດ້ບັນລຸຄວາມຮັບຮູ້ທີ່ເປັນເອກະສັນກັນໃນການກໍ່ສ້າງທາງລົດໄຟຄວາມໄວສູງ ແລະ ຈະຮ່ວມມືກັນໃນທີ່ສຸດ, ຈະມີບົດບາດອັນສຳຄັນຕໍ່ການເຊື່ອມຈອດເຊິ່ງກັນແລະກັນ ແລະ ຊຸກຍູ້ການຮ່ວມມືໃນຂົງເຂດຕ່າງໆ ລະຫວ່າງຈີນ-ໄທ ແລະລະຫວ່າງຈີນ-ອາຊຽນເຊັ່ນກັນ.
ທ່ານຫຼິວຈ່ຽງຢົງ, ຮອງຫົວໜ້າສະຖາບັນຄົ້ນຄວ້າການພົວພັນສາກົນສະໄໝປັດຈຸບັນ ມະຫາວິທະຍາໄລຊິ່ງຮວາຈີນ ກ່າວວ່າ: ການສະແດງເຖິງຄວາມຈິງອົກຈິງໃຈ ແລະ ການເຮັດແທ້ທຳຈິງແມ່ນຈຸດພິເສດອັນພົ້ນເດັ່ນຂອງການຢ້ຽມຢາມຂອງທ່ານຫຼີເຄີ້ສ໋ຽງໃນຄັ້ງນີ້,ຈະມີຜົນສະທ້ອນຕໍ່ການພັດທະນາການພົວພັນລວມລະຫວ່າງຈີນກັບປະເທດທີ່ທ່ານໄປຢ້ຽມ ຢາມໃນຄັ້ງນີ້ ແລະ ການພົວພັນລະຫວ່າງຈີນກັບພາກພື້ນອາຊຽນໃນອະນາຄົດ, ສາມາດເວົ້າໄດ້ວ່າແມ່ນໝາກຜົນວຽກງານການຕ່າງປະເທດອັນສຳຄັນໃນການຊຸກຍ້ວຽກງານູການຕ່າງປະເທດກັບປະເທດອ້ອມຂ້າງຂອງຈີນ.
