ຈັດພິທີເລີ່ມກໍ່ສ້າງໂຮງແຮມຣີຊອດສາກົນທີ່ເປັນທຶນຈີນແຫ່ງທຳອິດຢູ່ຫຼວງພະບາງ
ວັນທີ17ຕຸລານີ້, ໂຮງແຮມຣີຊອດສາກົນທີ່ເປັນທຶນຈີນແຫ່ງທຳອິດຢູ່ແຂວງຫຼວງພະບາງ ຊຶ່ງມີຊື່ວ່າ ໂຮງແຮມຣີຊອດສາກົນ Pullman ໄດ້ຈັດພິທີເລີ່ມກໍ່ສ້າງ. ຜູ້ໃຫ້ກຽດເຂົ້າຮ່ວມພິທີມີທ່ານຄຳແພງ ໄຊສົມແພງ,ກຳມະການສູນກາງພັກປະຊາຊົນປະຕິວັດລາວ, ເລຂາຄະນະພັກ, ເຈົ້າແຂວງແຂວງຫຼວງພະບາງ, ທ່ານລີເຄີອູ, ກົງສູນໃຫຍ່ຈີນປະຈຳຫຼວງພະບາງ, ທ່ານຈ່ຽງການຊວງ,ຜູ້ອຳນວຍການໃຫຍ່ພະແນກຄຸ້ມຄອງການລົງທຶນຂອງບໍລິສັດອຸດສາຫະກຳທອງແດງຈີນຈຳກັດ, ທ່ານກາວກຸ້ຍຊ່າວ, ຮອງຜູ້ອຳນວຍການໃຫຍ່ກຸ່ມບໍລິສັດອຸດສາຫະກຳທອງແດງຢຸນນານຈຳກັດ, ນອກນີ້ ຍັງມີພາກສ່ວນທີ່ກ່ຽວຂ້ອງຂອງຫຼວງພະບາງແລະສື່ມວນຊົນເກືອບ200ທ່ານໄດ້ເຂົ້າຮ່ວມພິທີດັ່ງກ່າວ.
ທ່ານຄຳແພງ ໄຊສົມແພງ, ເລຂາຄະນະພັກ, ເຈົ້າແຂວງແຂວງຫຼວງພະບາງ
ໃນພິທີ, ຜູ້ຮັບຜິດຊອບຝ່າຍລົງທຶນໃຫ້ຮູ້ວ່າ, ໂຄງການກໍ່ສ້າງໂຮງແຮມແຫ່ງນີ້ເປັນໂຄງການທີ່ຜູ້ນຳຂັ້ນສູງຂອງປະເທດລາວກັບເຈົ້າໜ້າທີ່ອົງການປົກຄອງແຂວງຢຸນນານຈີນຕົກລົງຮ່ວມກັນເພື່ອສົ່ງເສີມການຮ່ວມມືເສດຖະກິດຈີນ-ລາວ, ເຊິ່ງຜູ້ລົງທຶນແມ່ນກຸ່ມບໍລິສັດອຸດສາຫະກຳທອງແດງຢຸນນານຈຳກັດ. ໂຄງການດັ່ງກ່າວກວມເນື້ອທີ່ 16,08 ເຮັກຕາ, ຫຼັງຈາກສ້າງສຳເລັດແລ້ວຈະມີຫ້ອງນອນ 155 ຫ້ອງ, ບ່ອນນັ່ງສຳລັບຄົນຮັບປະທານອາຫານ 600 ບ່ອນນັ່ງ, ບ່ອນນັ່ງສຳລັບປະຊຸມ 650 ບ່ອນນັ່ງ, ຈະສ້າງສຳເລັດໃນປີ2015, ເປັນໂຮງແຮມທັນສະໄໝທີ່ມີບໍລິການຢ່າງຄົບຊຸດ, ເຊັ່ນ, ການພັກເຊົາ, ກິນດື່ມ, ບັນເທີງ, ຈັດກອງປະຊຸມແລະພັກຜ່ອນຢ່ອນໃຈ. ຫຼັງຈາກສ້າງສຳເລັດກໍ່ຈະເພີ່ມຄວາມສວຍງາມໃຫ້ແກ່ເມືອງແລະແຂວງຫຼວງພະບາງ.
ຜູ້ຮັບຜິດຊອບຝ່າຍລົງທຶນ
ທ່ານຄຳແພງ ໄຊສົມແພງ, ເລຂາຄະນະພັກ, ເຈົ້າແຂວງແຂວງຫຼວງພະບາງກ່າວວ່າ, ນັບແຕ່ລົງມືປະຕິບັດໂຄງການດັ່ງກ່າວເປັນຕົ້ນມາ, ສູນກາງແລະອົງການປົກຄອງແຂວງຫຼວງພະບາງໄດ້ໃຫ້ຄວາມເອົາໃຈໃສ່ໃນລະດັບສູງ, ແລະພະຍາຍາມຊຸກຍູ້ໂຄງການດັ່ງກ່າວ, ຫວັງວ່າໂຄງການກໍ່ສ້າງໂຮງແຮມທີ່ເປັນຂະໜາດໃຫຍ່ທີ່ສຸດແລະມູນຄ່າລົງທຶນສູງສຸດຢູ່ແຂວງຫຼວງພະບາງນີ້ຈະໄດ້ຮັບຜົນສຳເລັດຢ່າງຈົບງາມ,ໃຫ້ການບໍລິການລະດັບສາກົນໃຫ້ແກ່ຜູ້ບໍລິໂພກ, ທັງສ້າງວຽກເຮັດງານທຳໃຫ້ແກ່ປະຊາຊົນທ້ອງຖິ່ນ.
