ຈີນປະທ້ວງຢ່າງເຄັ່ງຂຶມແລະກ່າວປະນາມຢ່າງຮຸນແຮງຕໍ່ສະມາຊິກລັດຖະບານຍີ່ປຸ່ນໄປໄຫວ້ຫໍໄຫວ້ຢາຊູຄູນີ
ຕາມຂ່າວCRI: ວັນທີ18ຕຸລານີ້, ທ່ານນາງຮວ້າຊຸ່ນຢິງ, ໂຄສົກກະຊວງການຕ່າງປະເທດຈີນກ່າວຢູ່ນະຄອນຫຼວງປັກກິ່ງວ່າ, ຈີນສະແດງການຄັດຄ້ານຢ່າງເດັດດ່ຽວຕໍ່ສະມາຊິກລັດຖະບານຍີ່ປຸ່ນໄປໄຫວ້ຫໍໄຫວ້ຢາຊູຄູນີຢ່າງບັງອາດ, ສະແດງການປະທ້ວງຢ່າງເຄັ່ງຂຶມແລະກ່າວປະນາມຢ່າງຮຸນແຮງຕໍ່ຍີ່ປຸ່ນ.
ທ່ານນາງຮວ້າຊຸ່ນຢິງຍັງໄດ້ກ່າວຢ້ຳຫຼັກໝັ້ນຂອງຈີນວ່າ, ຍີ່ປຸ່ນພຽງແຕ່ປະເຊີນໜ້າຢ່າງຖືກຕ້ອງແລະສຳນຶກປະຫວັດການຮຸກຮານຂອງຕົນ, ຖືປະຫວັດສາດເປັນແວ່ນແຍງຢ່າງແທ້ຈິງ, ການພົວພັນລະຫວ່າງຍີ່ປຸ່ນກັບປະເທດໃກ້ຄຽງໃນອາຊີຈຶ່ງສາມາດກ້າວເດີນໄປສູ່ອະນາຄົດ. ຈີນເຕືອນຍີ່ປຸ່ນຢ່າງເຂັ້ມງວດອີກເທື່ອໜຶ່ງວ່າຕ້ອງເຄົາລົບການສະແດງທ່າທີແລະຄ້ຳໝັ້ນສັນຍາຂອງຕົນກ່ຽວກັບການສຳນຶກຄືນປະຫວັດການຮຸກຮານ, ໃຊ້ການກະທຳຕົວຈິງເພື່ອສ້າງຄວາມເຊື່ອໝັ້ນໃຫ້ແກ່ປະເທດໃກ້ຄຽງໃນອາຊີແລະປະຊາຄົມໂລກ.
ທ່ານນາງຮວ້າຊຸນອິງກ່າວວ່າ, ທ່ານຫຼິວເຈີ້ມິນ, ລັດຖະມົນຕີຊ່ວຍວ່າການກະຊວງການຕ່າງປະເທດຈີນໄດ້ຮຽກທ່ານເອກອັກຄະລັດຖະທູດຍີ່ປຸ່ນປະຈຳຈີນເຂົ້າພົບເພື່ອສະແດງການຕໍ່ວ່າທັກທ້ວງຢ່າງເຄັ່ງຂຶມ, ກ່າວປະນາມຢ່າງເຄັ່ງຂຶມຕໍ່ເລື່ອງທີ່ສະມາຊິກລັດຖະບານຍີ່ປຸ່ນໄປໄຫວ້ຫໍໄຫວ້ຢາຊູຄູນີ.
ຂ່າວແຈ້ງວ່າ, ທ່ານໂຢຊີທາຄາ ຊີນໂດ, ລັດຖະມົນຕີວຽກງານສັງລວມຍີ່ປຸ່ນກັບສະມາຊິກຂອງສະຫະພັນສະມາຊິກລັດຖະສະພາຂ້າມພັກການເມືອງ"ຄົນທັງຫຼາຍໄປໄຫວ້ຫໍໄຫວ້ຢາຊູຄູນີ"ປະມານ160ຄົນໄປໄຫວ້ຫໍໄຫວ້ຢາຊູຄູນີໃນວັນທີ18ຕຸລານີ້.
