ຈີນກາຍເປັນປະເທດແຫລ່ງນັກທ່ອງທ່ຽວໃຫຍ່ທີ່ສຸດຂອງໄທ
ໜັງສືພິມຫລຽນເຮີຈາວປ້າວຂອງສິງກະໂປລາຍງານວ່າ, ໃນປີກາຍນີ້, ມີນັກທ່ອງທ່ຽວຈີນປະມານ 2 ລ້ານ 7 ແສນຄົນໄປທ່ຽວໄທ ເຊິ່ງໄດ້ເຮັດໃຫ້ນັກທ່ຽວຈີນທີ່ໄປທ່ຽວໄທຫລາຍກວ່ານັກທ່ອງທ່ຽວມາເລເຊຍເປັນຄັ້ງທໍາອິດ, ຈີນໄດ້ກາຍເປັນຕະຫລາດແຫລ່ງນັກທ່ອງທ່ຽວໃຫຍ່ທີ່ສຸດຂອງໄທ. ພຽງແຕ່ 6 ເດືອນຕົ້ນ ປີ 2013 ນີ້ເທົ່ານັ້ນ, ນັກທ່ອງທ່ຽວຈີນທີ່ໄປທ່ຽວໄທກໍບັນລຸເຖິງ 2 ລ້ານ 2 ແສນເທື່ອຄົນແລ້ວ, ຄາດວ່າໝົດປີຈະຫລາຍກວ່າ 4 ລ້ານຄົນ, ຈີນແລະໄທໄດ້ເຫັນດີຈະປຶກສາຫາລືກ່ຽວກັບການຍົກເວັ້ນວິຊາເຊິ່ງກັນແລະກັນ.
ຂ່າວແຈ້ງວ່າ, ປັດຈຸບັນນີ້ນັກທ່ອງທ່ຽວຈີນໄປທ່ຽວໄທມີວິຊາສອງປະເພດ, ໜຶ່ງແມ່ນຫລັງຈາກໄປຮອດແລ້ວຈຶ່ງເຮັດວິຊາກັບດ່ານ, ອີກປະເພດໜຶ່ງແມ່ນເຮັດວິຊາລ່ວງໜ້າ. ປັດຈຸບັນນີ້, ມີແຕ່ຄະນະທ່ອງທ່ຽວເທົ່ານັ້ນທີ່ສາມາດເຮັດວິຊາຫລັງຈາກໄປເຖິງດ່ານໄດ້, ຖ້າແມ່ນບຸກຄົນທົ່ວໄປຕ້ອງເຮັດວິຊາລ່ວງໜ້າ. ການເຮັດວິຊາລ່ວງໜ້າຕ້ອງໃຊ້ເວລາສາມຫາຫ້າມື້, ລາຍຈ່າຍແມ່ນ 230 ຢວນ.
