"ພັກຝ່າຍຕ່າງໆຂອງໄທມີຄວາມເຫັນເປັນເອກະສັນກັນກ່ຽວກັບການຊຸກຍູ້ມິດຕະພາບໄທ-ຈີນ" -- ການສໍາພາດຕໍ່ປະທານສະພາແຫ່ງຊາດ ທັງເປັນປະທານຜູ້ແທນລາຊະດອນຂອງໄທ
ວັນທີ 17 ຕຸລານີ້, ໃນເວລາໃຫ້ສໍາພາດຕໍ່ນັກຂ່າວ, ທ່ານສົມສັກ ກຽດສຸລານົນ ປະທານສະພາແຫ່ງຊາດ ທັງເປັນປະທານ ຜູ້ແທນລາຊະດອນຂອງໄທກ່າວວ່າ, ພັກຝ່າຍຕ່າງໆຂອງໄທມີຄວາມເຫັນເປັນເອກະສັນກັນກ່ຽວກັບການຊຸກຍູ້ໄມຕີຈິດມິດຕະພາບລະຫວ່າງໄທ-ຈີນ.
ແຕ່ວັນທີ 11 ຫາວັນທີ 13 ຕຸລານີ້, ທ່ານຫລີເຄີ້ສຽງ, ນາຍົກລັດຖະມົນຕີຈີນໄດ້ເດີນທາງໄປຢ້ຽມຢາມໄທຢ່າງເປັນທາງການ. ຕອນບ່າຍວັນທີ 11 ຕຸລານີ້, ເວລາຢ້ຽມຢາມສະພາແຫ່ງຊາດໄທ, ທ່ານຫລີເຄີ້ສຽງໄດ້ກ່າວປາຖະກະຖາທີ່ມີຫົວຂໍ້ວ່າ "ເຮັດໃຫ້ດອກໄມ້ແຫ່ງມິດຕະພາບຈີນ-ໄທແຕກດອກອອກຜົນທີ່ຫລາຍກວ່າເກົ່າ" ໂດຍໄດ້ຕີລາຄາສູງຕໍ່ໄມຕີຈິດມິດພະພາບຈີນ-ໄທ ແລະເບິ່ງອະນາຄົດອັນດີງາມຂອງການພົວພັນລະຫວ່າງສອງປະເທດ. ການກ່າວປາຖະກະຖາຄັ້ງນີ້ໄດ້ເຮັດໃຫ້ສະມາຊິກສະພາທີ່ເຂົ້າຮ່ວມເຫັນດີແລະມີຄວາມຮູ້ສຶກເປັນເອກະພາບນໍາເປັນຢ່າງດີ ແລະໄດ້ຮັບສຽງຕົບມືຢ່າງບໍ່ຢຸດຢັ້ງ.
ທ່ານສົມສັກກ່າວວ່າ, ການດໍາເນີນກອງປະຊຸມສະພາໃນເວລາທົ່ວໄປແມ່ນມີບັນຍາກາດເຄັ່ງຕຶງສະເໝີ, ພັກກໍາອໍານາດແລະພັກຝ່າຍຄ້ານເກີດການຖົກຖຽງກັນຢ່າງເນື່ອງນິດຍ້ອນຄວາມເຫັນທີ່ແຕກຕ່າງກັນ. ແຕ່ໃນມື້ທີ່ທ່ານຫລີເຄີ້ສຽງມາຢ້ຽມຢາມ, ສະມາຊິກສະພາຂອງພັກຝ່າຍຕ່າງໆລ້ວນແຕ່ໄດ້ສະແດງຄວາມຈູບຈ້າວຫາວຫັນເປັນຢ່າງຍິ່ງ. ທ່ານສົມສັກກ່າວຕື່ມວ່າ, ນີ້ແມ່ນຍ້ອນວ່າພັກຝ່າຍຕ່າງໆຂອງໄທມີຄວາມເຫັນເປັນເອກະສັນກັນກ່ຽວກັບການຮັກສາການພົວພັນໄມຕີຈິດມິດຕະພາບກັບຈີນ ແລະເຫັນວ່າຝ່າຍຕ່າງໆລ້ວນແຕ່ມີພັນທະແລະຄວາມຮັບຜິດຊອບໃນການພະຍາຍາມເພື່ອຊຸກຍູ້ການພົວພັນໄມຕີຈິດມິດຕະພາບໄທ-ຈີນ.
ທ່ານສົມສັກກ່າວວ່າ, ການຢ້ຽມຢາມຂອງທ່ານຫລີເຄີ້ສຽງໃນຄັ້ງນີ້ສະແດງໃຫ້ເຫັນວ່າ, ຈີນໃຫ້ຄວາມສໍາຄັນຫລາຍຕໍ່ການຮ່ວມມືກັບໄທ. ໃນຖານະທີ່ເປັນປະເທດຖານອ້າຍນ້ອງກັນ, ໄທກັບຈີນຕ້ອງຮ່ວມກັນກ້າວໄປໜ້າແລະທໍາຄວາມພະຍາຍາມເພື່ອສ້າງຄວາມສຸກໃຫ້ແກ່ປະຊາຊົນສອງຊາດ.
