ກອງປະຊຸມສະໄໝສາມັນຂອງລັດຖະບານຈີນຈັດວາງມາດຕະການຊຸກຍູ້ການປະຕິຮູບແລະຫັນປ່ຽນໂຄງປະກອບການພັດທະນາເສດຖະກິດ
ຕາມຂ່າວສານຊິນຮວາ: ວັນທີ 18 ຕຸລານີ້, ທ່ານຫຼີເຄີ້ສຽງ, ນາຍົກລັດຖະມົນຕີຈີນໄດ້ເປັນປະທານກອງປະຊຸມສະໄໝສາມັນຂອງລັດຖະບານຈີນ, ເພື່ອຮັບຟັງການລາຍງານສະພາບການຈັດຕັ້ງປະຕິບັດມາດຕະການການຊຸກຍູ້ການປະຕິຮູບ ແລະ ຫັນປ່ຽນໂຄງປະກອບການພັດທະນາເສດຖະກິດທີ່ລັດຖະບານໄດ້ວາງອອກເປັນເວລາເຄິ່ງປີມານີ້, ຈັດວາງວຽກງານທີ່ກ່ຽວຂ້ອງເພື່ອສ້າງພື້ນຖານການພັດທະນາເສດຖະກິດໃຫ້ໜັກແໜ້ນກວ່າເກົ່າ.
ກອງປະຊຸມຊີ້ອອກວ່າ, ໂດຍປະເຊີນໜ້າກັບສະຖານະການເສດຖະກິດພາຍໃນແລະຕ່າງປະເທດອັນສັບສົນ, ລັດຖະບານໄດ້ວາງແຜນ ການໃຫຍ່ເຊິ່ງມີເນື້ອໃນກວມລວມການພັດທະນາຢ່າງໝັ້ນທ່ຽງ, ຫັນປ່ຽນໂຄງປະກອບການພັດທະນາ, ຊຸກຍູ້ການປະຕິຮູບ, ຮັກສາຄວາມທຸ່ນທ່ຽງ ແລະ ປະຕິບັດນະໂຍບາຍອັນໝັ້ນທ່ຽງ ໂດຍອີງຕາມທິດທາງພື້ນຖານລວມຂອງການເຮັດວຽກແບບພັດທະນາກ້າວເດີນໄປໜ້າໃນສະພາບຄວາມໝັ້ນທ່ຽງ. ຕົວເລກຂໍ້ມູນສະຖິຕິທີ່ໄດ້ປະກາດໃນຫວ່າງມໍ່ໆມານີ້ ສະແດງໃຫ້ເຫັນວ່າ, ເສດຖະກິດຈີນໃນໄຕມາດທີ 3 ປີນີ້ໄດ້ມີການພັດທະນາໄປພາຍໃຕ້ສະພາບຄວາມໝັ້ນທ່ຽງ.
ໃນກອງປະຊຸມໄດ້ຄົ້ນຄວ້າບັນຫາທີ່ຍັງຄົງຄ້າງຢູ່ໃນການຈັດຕັ້ງປະຕິບັດມາດຕະການການຊຸກຍູ້ການປະຕິຮູບ ແລະ ຫັນປ່ຽນໂຄງປະ ກອບ, ໂດຍຊີ້ອອກວ່າ, ຕ້ອງເພີ່ມຄວາມແຮງຫຼາຍ ກວ່າເກົ່າໃນການຊຸກຍູ້ການປະຕິຮູບແລະຫັນປ່ຽນໂຄງປະກອບ, ສືບຕໍ່ຈັດຕັ້ງປະຕິບັດມາດຕະການຕ່າງໆທີ່ໄດ້ວາງອອກແລ້ວນັ້ນໃຫ້ດີ, ເຮັດໃຫ້ການປະຕິຮູບບັງເກີດເງິນປັນຜົນຢ່າງບໍ່ຢຸດຢັ້ງ, ເຮັດໃຫ້ນະໂຍບາຍມີປະສິດທິ ພາບຢ່າງຕໍ່ເນື່ອງ, ມີຜົນດີໃນໄລຍະສັ້ນແລະຍິ່ງມີຜົນດີໃນໄລຍະຍາວ, ສ້າງພື້ນຖານການພັດທະນາເສດຖະກິດໃຫ້ໜັກແໜ້ນກວ່າເກົ່າ, ຊຸກຍູ້ການຍົກສູງຄຸນນະພາບແລະເພີ່ມປະສິດທິຜົນຂອງເສດຖະກິດ, ເພີ່ມພະລັງພາຍໃນດ້ານການພັດທະນາແລະພະລັງຊຸກດັນໄລຍະຍາວນານ.
