ນາຍົກລັດຖະມົນຕີອິນເດຍຫວັງວ່າການພົວພັນອິນເດຍ-ຈີນຈະພັດທະນາແບບຍືນຍົງແລະຮອບດ້ານ
ທ່ານຊິງ, ນາຍົກລັດຖະມົນຕີອິນເດຍຈະເດີນທາງມາຢ້ຽມຢາມຈີນຢ່າງເປັນທາງການແຕ່ວັນທີ 22 ຫາວັນທີ 24 ຕຸລານີ້. ເວລາໃຫ້ສໍາພາດຕໍ່ສື່ມວນຊົນຈີນປະຈໍາອິນເດຍກ່ອນຈະເດີນທາງມາຢ້ຽມຢາມຈີນ, ທ່ານຊິງກ່າວວ່າ, ທ່ານຫວັງວ່າຈະທໍາຄວາມພະຍາຍາມຮ່ວມກັບຈີນ ເພື່ອຊຸກຍູ້ການພົວພັນອິນເດຍ-ຈີນໃຫ້ພັດທະນາແບບຍືນຍົງແລະຮອບດ້ານ.
ທ່ານຊິງກ່າວວ່າ, ການຮ່ວມມືດ້ານເສດຖະກິດການຄ້າລະຫວ່າງອິນເດຍກັບຈີນໄດ້ພັດທະນາຢ່າງວ່ອງໄວ, ສອງປະເທດລ້ວນແຕ່ໄດ້ຖືການພັດທະນາເສດຖະກິດຂອງປະເທດຕົນແລະການປັບປຸງຊີວິດການເປັນຢູ່ຂອງປະຊາຊົນເປັນໜ້າທີ່ສໍາຄັນທີ່ສຸດ. ການທີ່ເຮັດໃຫ້ການພົວພັນສອງຝ່າຍມີຄວາມໝັ້ນທ່ຽງ ມີຄວາມສໍາຄັນທີ່ສຸດຕໍ່ສອງປະເທດ, ຫວັງວ່າການຢ້ຽມຢາມຈີນຄັ້ງນີ້ຈະສາມາດຮັດແໜ້ນການພົວພັນສອງຝ່າຍທີ່ປິ່ນໜ້າສູ່ອະນາຄົດ. ພ້ອມນັ້ນ, ທ່ານຊິງກ່າວວ່າ, ຍິນດີຕ້ອນຮັບວິສາຫະກິດຈີນມາລົງທຶນແລະສ້າງໂຮງງານຢູ່ດິນເດຍ, ຝ່າຍອິນເດຍກໍາລັງພິຈາລະນາຈະສ້າງເຂດນິຄົມອຸດສາຫະກໍາຈີນ ແລະຊຸກຍູ້ການຮ່ວມມືລະຫວ່າງສອງປະເທດໃນດ້ານການກໍ່ສ້າງພື້ນຖານໂຄງລ່າງ. ສອງປະເທດຍັງໄດ້ຮັບໝາກຜົນທີ່ອຸດົມສົມບູນໃນການຮ່ວມມືໃນຂົງເຂດຫລາຍຝ່າຍຕ່າງໆ ເຊັ່ນປະເທດບຼິກສ ແລະອື່ນໆ, ອິນເດຍຍິນດີຮ່ວມກັບຈີນ ເພີ່ມທະວີການຮ່ວມມືກັບປະເທດອື່ນໆໃນພາກພື້ນນີ້ ແລະກໍາລັງພິຈາລະນາຢ່າງຕັ້ງໜ້າກ່ຽວກັບການສ້າງແລວທາງເສດຖະກິດບັງກະລາເດັດ, ຈີນ, ອິນເດຍ ແລະມຽນມາ.
