ຈີນໄດ້ກາຍເປັນຕະຫລາດແຫລ່ງນັກທ່ອງທ່ຽວໃຫຍ່ທີ່ສຸດໃນທົ່ວໂລກ ໃນອີກ 5 ປີຕໍ່ໜ້ານີ້ຈໍານວນນັກທ່ອງທ່ຽວຈີນທີ່ໄປທ່ຽວຕ່າງປະເທດອາດຈະບັນລຸເຖິງ 4 ຮ້ອຍລ້ານເທື່ອຄົນ
ວັນທີ 22 ຕຸລານີ້, ເວທີປຶກສາຫາລືສາກົນກ່ຽວກັບທ່າອ່ຽງແລະການຕິດຕາມເບິ່ງການທ່ອງທ່ຽວຂອງອົງການການທ່ອງທ່ຽວໂລກ ຫລື UNWTO ແລະສະມາຄົມການທ່ອງທ່ຽວອາຊີ-ປາຊິຟິກ ຫລື PATA ຄັ້ງທີ 7 ໄດ້ຈັດຂຶ້ນຢູ່ນະຄອນກຸ້ຍຫລິນເຂດກວາງຊີ ທີ່ເປັນເມືອງທ່ອງທ່ຽວທີ່ມີຊື່ສຽງຂອງຈີນ. ທ່ານມາຊິວ ຟາວິລາ, ຜູ້ອໍານວຍການໃຫຍ່ UNWTO ກ່າວວ່າ, ປີ 2012, ນັກທ່ອງທ່ຽວທີ່ໄປທ່ຽວຕ່າງປະເທດໃນທົ່ວໂລກໄດ້ບັນລຸເຖິງ 1 ຕື້ເທື່ອຄົນ ເຊິ່ງໄດ້ເຮັດໃຫ້ລາຍໄດ້ດ້ານການທ່ອງທ່ຽວມີຫລາຍກວ່າ 1000 ຕື້ໂດລາ, ໃນນັ້ນຈີນມີນັກທ່ອງທ່ຽວທີ່ເດີນທາງໄປທ່ອງທ່ຽວຕ່າງປະເທດເຖິງ 78 ລ້ານຄົນ, ໄດ້ກາຍເປັນຕະຫລາດແຫລ່ງນັກທ່ອງທ່ຽວໃຫຍ່ທີ່ສຸດຂອງໂລກ ແລະປະກອບສ່ວນ 102 ຕື້ໂດລາເຂົ້າໃນເສດຖະກິດການທ່ອງທ່ຽວໃນທົ່ວໂລກ.
ມື້ດຽວກັນ, ມີຜູ້ຕາງໜ້າ ຂອງອົງການຈັດຕັ້ງແລະສະມາຄົມສາກົນ, ເຈົ້າໜ້າທີ່ລັດຖະບານ, ນັກວິຊາການຂອງສະຖາບັນຄົນຄວ້າ ຈໍານວນ 150 ກວ່າຄົນທີ່ມາຈາກ 20 ກວ່າປະເທດແລະພາກພື້ນໄດ້ເຂົ້າຮ່ວມເວທີປຶກສາຫາລືຄັ້ງນີ້. ທ່ານອູເວິນເສວ, ຮອງຫົວໜ້າກົມທ່ອງທ່ຽວແຫ່ງຊາດຈີນກ່າວໃນເວທີປຶກສາຫາລືວ່າ, ໃນອີກ 5 ປີຕໍ່ໜ້ານີ້, ຄົນຈີນໄປທ່ອງທ່ຽວຕ່າງປະເທດມີຄວາມອາດສາມາດຈະບັນລຸເຖິງ 4 ຮ້ອຍລ້ານເທື່ອຄົນ, ຈໍານວນນັກທ່ອງທ່ຽວຕ່າງປະເທດທີ່ມາທ່ຽວຈີນແລະນັກທ່ອງທ່ຽວຈີນໄປທ່ຽວຕ່າງປະເທດຕ່າງກໍມີຄວາມອາດສາມາດບັນລຸເຖິງ 1 ຮ້ອຍລ້ານເທື່ອຄົນໃນປີ 2015. ຄາດວ່າຮອດປີ 2020, ຄຸນນະພາບຂອງຂະແໜງການທ່ອງທ່ຽງຂອງຈີນຈະກ້າວຂຶ້ນສູ່ລະດັບປະເທດເຂັ້ມແຂງດ້ານການທ່ອງທ່ຽວໃນໂລກ.
