ຫ້ອງການກົງສູນລາວທີ່ນະຄອນຊຽງຮຸ່ງຍ້າຍສຳນັກງານໃຫມ່
(ທ່ານສົມດີ ບຸນຄຸ້ມ ເອກອັກຄະລັດຖະທູດວິສາມັນຜູ່ມີອຳນາດເຕັມແຫ່ງ ສປປ ລາວໃຫ້ກຽດເຂົ້າຮ່ວມພິທີ)
ຕອນເຊົ້າວັນທີ 19 ຕຸລາ 2013 ນີ້, ຫ້ອງການກົງສູນລາວທີ່ນະຄອນຊຽງຮຸ່ງ ທີ່ຂຶ້ນກັບສະຖານກົງສູນໃຫຍ່ ສປປ ລາວໃນນະຄອນຄຸນມິງໄດ້ຍ້າຍສຳນັກງານໃຫມ່ ແລະຈັດພິທີເປີດຢ່າງເປັນທາງການຂຶ້ນຢູ່ເຂດໂຄງການພັດທະນາເກົ້າຈອມ ສິບສອງຫມູ່ບ້ານ ນະຄອນຊຽງຮຸ່ງ ກິ່ງແຂວງສິບສອງພັນນາແຂວງຢຸນນານສປ ຈີນ.
ໃຫ້ກຽດເຂົ້າຮ່ວມໃນພິທີຄັ້ງນີ້ມີທ່ານສົມດີ ບຸນຄຸ້ມ ເອກອັກຄະລັດຖະທູດວິສາມັນຜູ່ມີອຳນາດເຕັມແຫ່ງ ສປປ ລາວ ປະຈຳ ສປ ຈີນ, ທ່ານບຸນລຽບ ຮຸ່ງວົງສອນ ກົງສູນໃຫຍ່ ສປປ ລາວປະຈຳນະຄອນຄຸນມິງ,ທ່ານເຫລຢົງເຫີ ຮອງເຈົ້າກິ່ງແຂວງສິບສອງພັນນາ ພ້ອມດ້ວຍບັນດາຫົວຫນ້າ, ຮອງຫົງຫນ້າຈາກພະແນກການຕ່າງປະເທດແຂວງຜົ້ງສາລີ, ອຸດົມໄຊ, ບໍ່ແກ້ວ, ບັນດາຫົວຫນ້າ, ຮອງຫົວຫນ້າຈາກຫ້ອງການຕ່າງປະເທດນະຄອນພູເອີ, ນະຄອນຊຽງຮຸ່ງ ຕາແສງເມືອງຫລ້າ, ກຸ່ມບໍລິສັດຫາຍເສິງ ແຂວງຢຸນນານຈີນ ພ້ອມດ້ວຍນັກສຶກສາລາວທີ່ກຳລັງສຶກສາຢູ່ນະຄອນຊຽງຮຸ່ງກໍ່ໄດ້ເຂົ້າຮ່ວມໃນພິທີ.
ໃນພິທີດັ່ງກ່າວ, ທ່ານສົມຄິດ ວັນຄຳ ຫົວຫນ້າຫ້ອງການກົງສູນລາວ ທີ່ນະຄອນຊຽງຮຸ່ງ ໄດ້ຂຶ້ນກ່າວເປີດກົງສູນຫລັງໃຫມ່ຢ່າງເປັນທາງການ ໂດຍທ່ານໄດ້ກ່າວເຖິງຄວາມເປັນມາແລະຜົນງານການເຄື່ອນໄຫວຂອງຫ້ອງການກົງສູນໃນໄລຍະຜ່ານມາ ເຊິ່ງໄດ້ສະແດງໃຫ້ເຫັນເຖິງຄວາມເອົາໃຈໃສ່ຂອງລັດຖະບານລາວແລະການໃຫ້ຄວາມຮ່ວມມືເປັນຢ່າງດີຂອງອຳນາດການປົກຄອງແລະພາກສ່ວນທີ່ກ່ຽວຂ້ອງຂອງ ສປ ຈີນ.
ຫ້ອງການກົງສູນລາວທີ່ນະຄອນຊຽງຮຸ່ງ ທີ່ຂຶ້ນກັບສະຖານກົງສູນໃຫຍ່ ສປປລາວ ທີ່ນະຄອນຄຸນມິງໄດ້ສ້າງຕັ້ງຂຶ້ນໃນເດືອນກັນຍາ 2010 ເຊິ່ງໄລຍະຜ່ານມາ, ໄດ້ຕັ້ງຫນ້າປະກອບສ່ວນເຂົ້າໃນວຽກງານເສີມຂະຫຍາຍສາຍພົວພັນຄູ່ຮ່ວມມືຍຸດທະສາດຮອບດ້ານລະຫວ່າງສອງປະເທດ, ໂດຍສະເພາະແມ່ນການພົພວັນຮ່ວມມືລະຫວ່າງບັນດາແຂວງພາກເຫນືອຂອງລາວກັບກິ່ງແຂວງສິບສອງພັນນາແລະນະຄອນພູເອີຂອງແຂວງຢຸນນານຈີນ ໃຫ້ນັບມື້ນັບແຫນ້ນແຟ້ນແລະມີຫມາກມີຜົນຕົວຈິງຫລາຍຂຶ້ນ, ເຮັດໃຫ້ການໄປມາຫາສູ່ກັນລະຫວ່າງປະຊາຊົນສອງປະເທດມີຄວາມສະດວກແລະນັບມື້ນັບຫລາຍຂຶ້ນ.
