ຈີນແລະສິງກະໂປເພີ່ມທະວີການຮ່ວມມືດ້ານການທະນາຄານ
ວັນທີ 22 ຕຸລານີ້, ທະນາຄານປະຊາຊົນຈີນ ຫຼື ທະນາຄານກາງຈີນແລະກົມຄຸ້ມຄອງການທະນາຄານສິງກະໂປ ໄດ້ປະກາດວ່າ: ຈີນແລະສິງກະໂປຈະເພີ່ມທະວີຊຸກຍູ້ການຮ່ວມມືດ້ານການທະນາຄານລະຫວ່າງສອງປະເທດຕື່ມອີກ, ຈີນຈະຂະຫຍາຍຂອບເຂດທົດລອງອົງການຈັດຕັ້ງນອກແດນຜູ້ລົງທຶນດ້ວຍເງິນຢວນທີ່ໄດ້ຕາມມາດຕະຖານ ໄປຮອດສິງກະໂປ, ຕະຫຼາດເງິນຕາຕ່າງປະເທດລະຫວ່າງທະນາຄານຂອງສອງປະເທດກໍຈະດຳເນີນການຄ້າຂາຍໂດຍກົງລະຫວ່າງເງິນຢວນຂອງຈີນກັບເງິນໂດລາສິງກະໂປ.
ວັນທີ 22 ຕຸລານີ້, ກອງປະຊຸມຄະນະກຳມະການປະສົມການຮ່ວມມືລະຫວ່າງ ຈີນ-ສິງກະໂປຄັ້ງທີ 10 ເຊິ່ງແມ່ນທ່ານຈ່າງກາວລີ, ຮອງນາຍົກລັດຖະມົນຕີຈີນແລະທ່ານເຕວຈີຮຽນ, ຮອງນາຍົກລັດຖະມົນຕີສິງກະໂປ ໄດ້ຮ່ວມກັນເປັນປະທານນັ້ນ ໄດ້ຈັດຂຶ້ນຢູ່ສິງກະໂປ. ພາຍຫຼັງກອງປະຊຸມ, ທະນາຄານປະຊາຊົນຈີນ ແລະກົມຄຸ້ມຄອງການທະນາຄານສິງກະໂປໄດ້ອອກແຈ້ງການ ໂດຍກ່າວວ່າ, ສອງປະເທດຈີນ-ສິງກະໂປໄດ້ບັນລຸໝາກຜົນສຳຄັນຈຳນວນໜຶ່ງໃນການເພີ່ມທະວີການຮ່ວມມືດ້ານການທະນາຄານລະຫວ່າງສອງຝ່າຍ. ໃນນັ້ນສິ່ງສຳຄັນທີ່ສຸດກໍແມ່ນ ຈີນຈະຂະຫຍາຍຂອບເຂດທົດລອງອົງການຈັດຕັ້ງນອກແດນຜູ້ລົງທຶນດ້ວຍເງິນຢວນທີ່ໄດ້ຕາມມາດຕະຖານ ໄປສູ່ສິງກະໂປ, ໂດຍມູນຄ່າການລົງທຶນແມ່ນ 50 ຕື້ຢວນ. ນອກນີ້, ສອງຝ່າຍຈີນ-ສິງກະໂປຍັງຈະດຳເນີນການຄ້າຂາຍໂດຍກົງລະຫວ່າງເງິນຢວນຂອງຈີນກັບເງິນໂດລາສິງກະໂປໃນຕະຫຼາດທະນາຄານສອງປະເທດ, ຝ່າຍຈີນກໍຈະສະໜັບສະໜູນເຂດນິຄົມອຸດສາຫະກຳຊູ່ໂຈ່ວ ແລະ ເມືອງແຫ່ງຊີວະພາບທຽນສິນ ດຳເນີນກິດຈະການດ້ວຍເງິນຢວນທີ່ປະດິດສ້າງແບບຂ້າມຊາດກັບສິງກະໂປ.
ກົມຄຸ້ມຄອງການທະນາຄານສິງກະໂປ ກ່າວວ່າ, ມາດຕະການດັ່ງກ່າວຈະສາມາດຂະຫຍາຍການໃຊ້ເງິນຢວນຢູ່ສິງກະໂປໃຫ້ກວ້າງອອກຕື່ມອີກ. ພ້ອມດຽວກັນນັ້ນ, ສອງປະເທດຈີນ-ສິງກະໂປກໍໄດ້ປະກາດວ່າຈະລົງເລິກການຮ່ວມມືໃນຂະແໜງການທະນາຄານຕື່ມອີກ, ເພີ່ມທະວີການຮ່ວມມືແລະການແລກປ່ຽນກັນດ້ານການຕິດຕາມຄຸ້ມຄອງ, ຮັບຮູ້ຕໍ່ບັນຫາທີ່ສອງປະເທດສົນໃຈຮ່ວມກັນໃຫ້ເລິກເຊິ່ງກວ່າເກົ່າ ເຊັ່ນ: ການປະຕິຮູບການຕິດຕາມຄຸ້ມຄອງການທະນາຄານສາກົນ ເປັນຕົ້ນ, ເພື່ອລົງເລິກການປະສານງານແລະການປະສານສົມທົບກັນລະຫວ່າງສອງປະເທດໃນການວາງກະຕິກາການຕິດຕາມຄຸ້ມຄອງການທະນາຄານສາກົນ.
