ນາຍົກລັດຖະມົນຕີຈີນກັບນາຍົກລັດຖະມົນຕີລັດເຊຍຮ່ວມກັນພົບປະກັບນັກຂ່າວ
ຕອນທ່ຽງວັນທີ 22 ຕຸລານີ້, ທ່ານຫລີເຄີ້ສຽງ, ນາຍົກລັດຖະມົນຕີຈີນ ກັບທ່ານດີມິຕຼີ ເມດເວເດຟ, ນາຍົກລັດຖະມົນຕີລັດເຊຍໄດ້ຮ່ວມກັນພົບປະກັບນັກຂ່າວຢູ່ນະຄອນຫລວງປັກກິ່ງ.
ທ່ານຫລີເຄີ້ສຽງໄດ້ສະເໜີຄວາມຮັບຮູ້ຮ່ວມກັນແລະໝາກຜົນທີ່ໄດ້ຮັບໃນການພົບປະລະຫວ່າງນາຍົກລັດຖະມົນຕີຈີນ-ລັດເຊຍຢ່າງເປັນປະຈໍາຄັ້ງທີ 18. ທ່ານໄດ້ກ່າວວ່າ, ຈີນຍິນດີທໍາຄວາມພະຍາຍາມຮ່ວມກັບລັດເຊຍ, ຄົ້ນຫາກໍາລັງບົ່ມຊ້ອນ, ປະດິດສ້າງວິທີໃໝ່, ແລະຊຸກຍູ້ການຮ່ວມມືຍຸດທະສາດລະຫວ່າງສອງປະເທດໃຫ້ໄດ້ຮັບຜົນສໍາເລັດຫລາຍກວ່າເກົ່າ. ທ່ານຫລີເຄີ້ສຽງຍັງໄດ້ສະແດງຄວາມຊົມເຊີຍຕໍ່ຈີນກັບລັດເຊຍທີ່ໄດ້ຮ່ວມມືຢ່າງສະໜິດແໜ້ນແລະຊ່ວຍເຫລືອເຊິ່ງກັນແລະກັນໃນການຕໍ່ຕ້ານໄພນໍ້າຖ້ວມໃນເຂດລ້ອງແມ່ນໍ້າໄຮ່ຫລົງຈ່ຽງ ແລະເຫັນວ່າເລື່ອງນີ້ໄດ້ສະແດງໃຫ້ເຫັນເຖິງການຮ່ວມມືຍຸດທະສາດແລະມິດຕະພາບອັນເລິກເຊິ່ງ ລະຫວ່າງສອງປະເທດຢ່າງເຕັມທີ່.
ທ່ານເມດເວເດຟ ກ່າວວ່າ, ການພົບປະລະຫວ່າງຂ້າພະເຈົ້າກັບທ່ານຫລີເຄີ້ສຽງໄດ້ຮັບໝາກຜົນອັນອຸດົມສົມບູນ. ຝ່າຍລັດເຊຍຍິນດີເປີດກວ້າງຂະໜາດການລົງທຶນດ້ານການຄ້າກັບຝ່າຍຈີນ, ເພີ່ມທະວີການແລກປ່ຽນແລະການຮ່ວມມືໃນຂົງເຂດຕ່າງໆ ເຊັ່ນ：ພະລັງງານ, ການບິນ, ກະສິກໍາ, ວັດທະນະທໍາ-ສັງຄົມ ແລະອື່ນໆ, ຮັດແໜ້ນການປະສານງານ ແລະຊຸກຍູ້ໃຫ້ການພົວພັນລັດເຊຍ-ຈີນສືບຕໍ່ກ້າວໄປໜ້າ. ທ່ານເມດເວເດຟຍັງໄດ້ເຊື້ອເຊີນທ່ານຫລີເຄີ້ສຽງໄປຢ້ຽມຢາມລັດເຊຍໃນປີໜ້າແລະເຂົ້າຮ່ວມການພົບປະລະຫວ່າງນາຍົກລັດຖະມົນຕີຈີນ-ລັດເຊຍຢ່າງເປັນປະຈໍາຄັ້ງທີ 19.
