ຜູ້ຮັບຜິດຊອບວຽກງານທໍາລາຍອາວຸດເຄມີຊີຣີຂອງອົງການສະຫະປະຊາຊາດກ່າວວ່າລັດຖະບານຊີຣີໄດ້ໃຫ້"ການຮ່ວມມືຢ່າງເຕັມທີ່"
ວັນທີ 22 ຕຸລານີ້, ທ່ານນາງສິກຣິດ ຄາກ, ຜູ້ຮັບຜິດຊອບວຽກງານທໍາລາຍອາວຸດເຄມີຊີຣີຂອງອົງການສະຫະປະຊາຊາດໄດ້ອອກຖະແຫລງການຜ່ານຫ້ອງການໂຄສົກອົງການສະຫະປະຊາຊາດວ່າ, ຂໍສະແດງຄວາມຂອບໃຈຕໍ່ລັດຖະບານຊີຣີທີ່ໄດ້ໃຫ້ "ການຮ່ວມມືຢ່າງເຕັມທີ່" ໃນວຽກງານທໍາລາຍອາວຸດເຄມີຊີຣີ, ພ້ອມນັ້ນກໍໄດ້ກ່າວເນັ້ນວ່າເວລາຂອງການປະຕິບັດແຜນ ທໍາລາຍອາວຸດເຄມີຊີຣີຮີບດ່ວນຫລາຍ.
ວັນທີ 16 ຕຸລານີ້, ທ່ານນາງຄາກຖືກແຕ່ງຕັ້ງໃຫ້ເປັນຜູ້ປະສານງານພິເສດຂອງ"ຄະນະຜູ້ແທນຮ່ວມອົງການສະຫະປະຊາຊາດ" ອົງການເກືອດຫ້າມອາວຸດເຄມີ. ນາງໄດ້ກ່າວໃນຖະແຫລງການວ່າ, ນາງໄດ້ເດີນທາງໄປເຖິງຊີຣີໃນວັນທີ 21 ຕຸລານີ້ ໂດຍອີງຕາມຂໍ້ຕົກລົງກ່ຽວກັບການທໍາລາຍອາວຸດເຄມີຊີຣີໂດຍໄວຂອງສະພາຄວາມໝັ້ນຄົງອົງການສະຫະປະຊາຊາດແລະອົງການເກືອດຫ້າມອາວຸດເຄມີ. ທ່ານນາງຄາກກ່າວວ່າ, ລັດຖະບານຊີຣີໄດ້ສະແດງຄວາມຕັດສິນໃຈຈະເຂົ້າຮ່ວມວຽກງານນີ້ໂດຍຜ່ານການເຂົ້າຮ່ວມສົນທິສັນຍາວ່າດ້ວຍການເກືອດຫ້າມອາວຸດເຄມີ.
ທ່ານນາງຄາກກ່າວຕື່ມວ່າ, ມາຮອດປັດຈຸບັນນີ້, ລັດຖະບານຊີຣີໄດ້ໃຫ້ການຮ່ວມມືຢ່າງເຕັມທີ່ແກ່ວຽກງານຂອງອົງການເກືອດຫ້າມອາວຸດເຄມີແລະໜ່ວຍງານຮ່ວມຂອງອົງການສະຫະປະຊາຊາດ, ນາງຍັງໄດ້ສະແດງຄວາມຂອບໃຈຕໍ່ການໃຫ້ຄວາມຮ່ວມມືຂອງລັດຖະບານຊີຣີແລະການຕ້ອນຮັບຢ່າງອົບອຸ່ນຂອງປະຊາຊົນຊີຣີ.
