ທ່ານຫຼີເຄີ້ສຽງເນັ້ນໜັກການຊຸກຍູ້ການພົວພັນຈີນ-ອິນເດຍໃຫ້ໄດ້ຮັບການພັດທະນາຫຼາຍຍິ່ງຂຶ້ນດ້ວຍຈິດໃຈທີ່ເຊື່ອໝັ້ນ ຈິດໃຈໝັ້ນຄົງຖາວອນ ແລະຄວາມຕັດສິນໃຈເດັດຂາດ
ວັນທີ 23 ຕຸລານີ້, ທ່ານຫຼີເຄີ້ສຽງ, ນາຍົກລັດຖະມົນຕີຈີນໄດ້ພົບປະເຈລະຈາກັບທ່ານມານໂມຮານ ຊິງ, ນາຍົກລັດຖະມົນຕີອິນເດຍ ຢູ່ນະຄອນຫຼວງປັກກິ່ງ. ສອງຝ່າຍໄດ້ບັນລຸຄວາມເຫັນເປັນເອກະສັນກັນທີ່ສຳຄັນໃນການຊຸກຍູ້ການພົວພັນລະຫວ່າງຈີນ-ອິນເດຍໃຫ້ໄດ້ຮັບການພັດທະນາຢ່າງວ່ອງໄວແລະຮອບດ້ານໃນໄລຍະໃໝ່.
ທ່ານຫຼີເຄີ້ສຽງ ຊີ້ອອກວ່າ: ຈີນແລະອິນເດຍໃນຖານະທີ່ເປັນປະເທດບ້ານໃກ້ເຮືອນຄຽງແລະຄູ່ຮ່ວມມືທີ່ສຳຄັນ, ການພັດທະນາເປັນໂອກາດຂອງແຕ່ລະຝ່າຍ, ສອງປະເທດກ້າວເດີນໄປພ້ອມກັນ, ຮ່ວມມືກັນ ແລະ ຮ່ວມກັນວາງແຜນການພັດທະນາ, ບໍ່ພຽງແຕ່ຈະສາມາດເຮັດໃຫ້ພົນລະເມືອງຈຳນວນ 2 ຕື້ 500 ລ້ານຄົນຂອງສອງປະເທດມີຊີວິດການເປັນຢູ່ດີຂຶ້ນເທົ່ານັ້ນ, ແຕ່ຍັງຈະມີຜົນສະທ້ອນອັນເລິກເຊິ່ງຍາວໄກຕໍ່ອາຊີ ຕະຫຼອດທັງທົ່ວໂລກອີກດ້ວຍ. ຝ່າຍຈີນຍິນດີພະຍາຍາມຮ່ວມກັນກັບອິນເດຍ, ຊຸກຍູ້ການພົວພັນລະຫວ່າງສອງປະເທດໃຫ້ໄດ້ ຮັບການພັດທະນາຫຼາຍຍິ່ງຂຶ້ນ ດ້ວຍຈິດໃຈທີ່ເຊື່ອໝັ້ນ, ຈິດໃຈໝັ້ນຄົງຖາວອນ ແລະ ຄວາມຕັດສິນໃຈທີ່ເດັດຂາດ, ເຊິ່ງລວມທັງລົງເລິກການຮ່ວມມືດ້ານຄວາມໝັ້ນຄົງທາງຍຸດທະສາດ, ຂຸດຄົ້ນຄວາມສາມາດບົ່ມຊ້ອນຂອງການຮ່ວມມືດ້ານເສດຖະກິດການຄ້າ, ເພີ່ມທະວີການ ຮ່ວມມືດ້ານການກໍ່ສ້າງເຂດນິຄົມອຸດສາຫະກຳ ແລະ ພື້ນຖານໂຄງລ່າງ ເຊັ່ນ ທາງລົດໄຟເປັນຕົ້ນ, ຊຸກຍູ້ການກໍ່ສ້າງແລວເສດຖະກິດບັງກຼາເດັດ-ຈີນ-ອິນເດຍ-ມຽນມາ.
ທ່ານມານໂມຮານ ຊິງ ກ່າວວ່າ: ການຜູກພັນໄມຕີຈິດມິດຕະພາບກັບຈີນແມ່ນທິດທາງບູລິມະສິດຂອງນະໂຍບາຍການຕ່າງປະເທດຂອງອິນເດຍ, ຝ່າຍອິນເດຍຫວັງໃຫ້ລົງເລິກການພົວພັນລະຫວ່າງສອງປະເທດຈາກສາມດ້ານ, ຄື: ເພີ່ມທະວີຄວາມໄວ້ເນື້ອເຊື່ອໃຈດ້ານການເມືອງ, ເປີດກວ້າງຜົນປະໂຫຍດຮ່ວມ ແລະ ເພີ່ມຄວາມເຂົ້າໃຈກັນ, ຍົກລະດັບການຮ່ວມມືທີ່ແທ້ຈິງລະຫວ່າງສອງປະເທດໃຫ້ສູງຂຶ້ນຕື່ມອີກ, ປົກປັກຮັກສາສະຖຽນລະພາບແລະຄວາມຈະເລີນຮຸ່ງເຮືອງຂອງພາກພື້ນແລະຂອງໂລກ.
ໃນກອງປະຊຸມຂ່າວຂອງກະຊວງການຕ່າງປະເທດຈີນທີ່ຈັດຂຶ້ນໃນມື້ດຽວກັນ, ທ່ານນາງຮົ໋ວຊຸ່ນຢິງ, ໂຄສົກກະຊວງການຕ່າງປະເທດຈີນ ກ່າວວ່າ: ເທື່ອນີ້ຈີນ-ອິນເດຍເຊັນສັນຍາຮ່ວມມືດ້ານການປ້ອງກັນຊາຍແດນ, ແມ່ນເພື່ອຢືນຢັນເຖິງວິທີທີ່ດີແລະບົດຮຽນທີ່ດີດ້ວຍວິທີທາງກົດໝາຍ, ກຳນົດເປັນຄວາມຮຽກຮ້ອງຕ້ອງການແລະບັນທັດຖານຂອງສອງຝ່າຍໃນການແກ້ໄຂສະພາບທີ່ຄ້າຍຄືກັນໃນຕໍ່ໜ້າ, ນີ້ມີຄວາມໝາຍອັນສຳຄັນຕໍ່ການປັບປຸງແລະຮັດແໜ້ນໄມຕີຈິດມິດຕະພາບແລະຄວາມໄວ້ເນື້ອເຊື່ອໃຈກັນລະຫວ່າງສອງຝ່າຍ, ປົກປັກຮັກສາສັນຕິພາບແລະສະຖຽນລະພາບຕາມເຂດຊາຍແດນສອງປະເທດຕື່ມອີກ.
