ທະນາຄານກາງເອີຣົບເລີ່ມກວດກາຂະແໜງການທະນາຄານຢ່າງຮອບດ້ານ
ເມື່ອບໍ່ດົນມານີ້, ລັດຖະມົນຕີວ່າການກະຊວງການເງິນສະຫະພາບເອີຣົບໄດ້ຮັບຮອງຍັດຕິກົນໄກດຽວເພື່ອຕິດຕາມກວດກາຂະແໜງການທະນາຄານ ໂດຍໄດ້ຢືນຢັນໃຫ້ທະນາຄານກາງເອີຣົບແລະອົງການຕິດຕາມກວດກາຂອງປະເທດສະມາຊິກຮ່ວມກັນປະກອບເປັນອົງປະກອບຕິດຕາມກວດກາຕົ້ນຕໍຂອງກົນໄກດັ່ງກ່າວ. ວັນທີ 23 ຕຸລານີ້, ທະນາຄານກາງເອີຣົບປະກາດຢ່າງເປັນທາງການວ່າ ເລີ່ມປະຕິບັດແຜນກວດກາຂະແໜງການທະນາຄານຢູ່ເຂດໃຊ້ເງິນເອີໂຣຢ່າງຮອບດ້ານ ເພື່ອປະຕິບັດໜ້າທີ່ຕິດຕາມກວດກາຢ່າງເປັນທາງການພາຍຫລັງສໍາເລັດການກວດກາແລ້ວ. ທ່ານມາລີໂອ ດະລາກີ, ຜູ້ວ່າການທະນາຄານກາງເອີຣົບກ່າວວ່າ, ແຜນການກວດການີ້ເປັນ"ບາດກ້າວທີ່ສໍາຄັນຕໍ່ອະນາຄົດຂອງເສດຖະກິດເອີຣົບແລະເຂດໃຊ້ເງິນເອີໂຣ, ຫວັງວ່າການກວດກາຂະແໜງການທະນາຄານຈະສາມາດເພີ່ມຄວາມເຊື່ອໝັ້ນຂອງພາກສ່ວນເອກະຊົນຕໍ່ຄວາມໝັ້ນທ່ຽງແລະສະພາບການຕິດໜີ້ຂອງທະນາຄານຢູ່ເຂດທີ່ໃຊ້ເງິນເອີໂຣ".
ທະນາຄານກາງເອີຣົບໄດ້ອອກຖະແຫລງການໃນມື້ດຽວກັນວ່າ, ແຜນການກວດກາຂະແໜງການທະນາຄານຮອບດ້ານຢູ່ເຂດທີ່ໃຊ້ເງິນເອີໂຣຈະລວມມີສາມດ້ານ ຄື ການກວດກາຄວາມສ່ຽງໄພດ້ານການຕິດຕາມກວດກາ, ການກວດກາຄຸນນະພາບຊັບສິນ ແລະການທົດສອບຄວາມກົດດັນ. ວຽກງານກວດກາດັ່ງກ່າວຈະນໍາໂດຍທະນາຄານກາງເອີຣົບ ແລະມີ ອົງການຕິດຕາມກວດກາຂອງປະເທດສະມາຊິກເຂົ້າຮ່ວມ, ພ້ອມນັ້ນຈະໄດ້ຮັບການສະສະໜັບສະໜູນຈາກອົງການຝ່າຍທີສາມທີ່ບໍ່ຂຶ້ນກັບຝ່າຍໃດ. ຜົນການກວດກາຈະເປີດເຜີຍກ່ອນທະນາຄານກາງເອີຣົບຈະປະຕິບັດໜ້າທີ່ຕິດຕາມກວດກາໃນເດືອນພະຈິກ ປີ 2014 ໜ້ານີ້.
