ຜູ້ຊ່ຽວຊານສະເພາະດ້ານຂອງປາເລັສຕິນກ່າວວ່າ ບົດລາຍງານກ່ຽວກັບການຊັນນະສູດສົບໄດ້ຢັ້ງຢືນວ່າ ທ່ານອາຣາຟັດເຖິງແກ່ກຳບໍ່ແມ່ນຍ້ອນສານໂພໂລນຽມ
ວັນທີ 24 ຕຸລານີ້, ຜູ້ຊ່ຽວຊານສະເພາະດ້ານຂອງປາເລັສຕິນ ກ່າວວ່າ: ບົດລາຍງານກ່ຽວກັບການຊັນນະສູດສົບທ່ານຢັດເຊີ ອາຣາຟັດ, ອະດີດຜູ້ນຳປາເລັສຕິນ ໄດ້ປະຕິເສດຄວາມອາດເປັນໄປໄດ້ທີ່ທ່ານເຖິງແກ່ກຳຍ້ອນຖືກສານໂພໂລນຽມ, ແຕ່ກໍບໍ່ປະຕິເສດຄວາມອາດເປັນໄປໄດ້ທີ່ວ່າທ່ານອາດຈະຖືກສານພິດຊະນິດອື່ນ.
ມື້ດຽວກັນ, ທ່ານທາວຟິກ ຕີຣາພີ, ປະທານຄະນະກຳມະການກວດກາສາເຫດການເຖິງແກ່ກຳຂອງທ່ານອາຣາຟັດ ໄດ້ປະຕິເສດຕໍ່ການໃຫ້ທັດສະນະຕໍ່ເລື່ອງນີ້, ແຕ່ໄດ້ກ່າວວ່າ ລັດຖະບານປາເລັສຕິນຈະຈັດກອງປະຊຸມຖະແຫຼງຂ່າວກ່ຽວກັບຜົນກາຊັນນະສູດສົບ ໃນບໍ່ດົນຂ້າງໜ້ານີ້.
ເດືອນຕຸລາປີ 2004, ທ່ານອາຣາຟັດ ໄດ້ຈາກເມືອງຣາມາລາໄປຮັບການປິ່ນປົວຢູ່ໂຮງໝໍທະຫານເປີຊີປະເທດຝຣັ່ງ ແລະ ໄດ້ເຖິ່ງແກ່ກຳຢູ່ຝຣັ່ງໃນເດືອນພະຈິກປີດຽວກັນ. ເດືອນກໍລະກົດປີກາຍນີ້, ສື່ມວນຊົນໄດ້ເປີດເຜີຍວ່າໃນເຄື່ອງນຸ່ງຂອງທ່ານອາຣາຟັດໄດ້ຖືກກວດພົບສານໂພໂລນຽມທີ່ມີກຳມັນຕະພາບລັງສີລະດັບສູງ, ນີ້ໄດ້ພາໃຫ້ມີການສັນນິຖານວ່າທ່ານອາຣາຟັດອາດຈະຖືກສານພິດແລະພາໃຫ້ທ່ານເຖິງແກ່ກຳ. ພາຍຫຼັງມາ, ປາເລັສຕິນເຫັນດີໃຫ້ມີການຊັນນະສູດສົບເພື່ອຄົ້ນຫາສາເຫດທີ່ພາໃຫ້ທ່ານເຖິງແກ່ກຳ. ເດືອນພະຈິກປີກາຍນີ້, ຜູ້ຊ່ຽວຊານຂອງສະວິສ, ຝຣັ່ງ ແລະ ຣັດເຊຍ ໄດ້ນຳເອົາຕົວຢ່າງຊາກກະດູກຈາກສຸສານຂອງທ່ານອາຣາຟັດທີ່ຕັ້ງຢູ່ເມືອງລາມາລາປາເລັສຕິນ, ແລະໃຫ້ຜູ້ຊ່ຽວຊານໃນໜ່ວຍກວດການຳເອົາໄປກວດກາຢູ່ໃນປະເທດຂອງໃຜລາວ.
