ຈີນແລະອິນເດຍກ່າວຢໍ້າວ່າ ຈະບໍ່ໃຊ້ຄວາມສາມາດດ້ານການທະຫານຕໍ່ກັນ
ວັນທີ 24 ຕຸລານີ້, ທ່ານນາງຮວ໋າຊຸນຢິ໋ງ, ໂຄສົກກະຊວງການຕ່າງປະເທດຈີນກ່າວວ່າ, ສັນຍາວ່າດ້ວຍການຮ່ວມມືດ້ານການປ້ອງກັນຊາຍແດນທີ່ຈີນກັບອິນເດຍລົງນາມຮ່ວມເມື່ອບໍ່ດົນມານີ້ໄດ້ກ່າວຢໍ້າວ່າ ຈະບໍ່ໃຊ້ຄວາມສາມາດດ້ານການທະຫານຕໍ່ກັນ ແລະໄດ້ໃຫ້ຄໍາໝັ້ນສັນຍາວ່າຈະສືບຕໍ່ຮັກສາສັນຕິພາບ, ສະຖຽນລະພາບແລະຄວາມສະຫງົບຂອງເຂດຄວບຄຸມຕົວຈິງຕາມເຂດຊາຍແດນຈີນ-ອິນເດຍ.
ນາງຮວ໋າຊຸນຢິ໋ງກ່າວຕື່ມວ່າ, ຝ່າຍຈີນໄດ້ໃຫ້ຄວາມສໍາຄັນຕໍ່ເລື່ອງຄວາມສົນໃຈຂອງຝ່າຍອິນເດຍມາໂດຍຕະຫລອດ. ພາຍໃຕ້ຄວາມພະຍາຍາມຮ່ວມກັນຂອງສອງຝ່າຍ, ສອງປະເທດໄດ້ຮ່ວມກັນລົງນາມໃນບົດບັນທຶກຄວາມເຂົ້າໃຈກ່ຽວກັບການເພີ່ມທະວີການຮ່ວມມືດ້ານແມ່ນໍ້າຂ້າມຊາຍແດນ ໃນໄລຍະທ່ານມານໂມຮານ ຊິງ, ນາຍົກລັດຖະມົນຕີອິນເດຍຢ້ຽມຢາມຈີນ ໂດຍໄດ້ເຫັນດີເພີ່ມທະວີການຮ່ວມມືດ້ານແມ່ນໍ້າຂ້າມຊາຍແດນຕື່ມອີກ, ດໍາເນີນການຮ່ວມມືດ້ານການແຈ້ງຂໍ້ມູນອຸທົກກະສາດແລະການແກ້ໄຂເຫດການຮັບມືສຸກເສີນພາຍໃຕ້ກົນໄກລະດັບວິຊາການທີ່ມີຢູ່ໃນປັດຈຸບັນ ແລະໄດ້ແລກປ່ຽນຄໍາຄິດຄໍາເຫັນເຊິ່ງກັນແລະກັນກ່ຽວກັບບັນຫາທີ່ສອງຝ່າຍສົນໃຈຮ່ວມກັນ. ຝ່າຍອິນເດຍໄດ້ສະແດງຄວາມຂອບໃຈຕໍ່ຈີນທີ່ໄດ້ທໍາຄວາມພະຍາຍາມໃນການສະສະໜອງຂໍ້ມູນດ້ານອຸທົກກະສາດຂອງແມ່ນນໍ້າຂ້າມຊາຍແດນແລະການແກ້ໄຂເຫດການສຸກເສີນ.
