ການເຈລະຈາຊັ້ນສູງດ້ານເສດຖະກິດການຄ້າລະຫວ່າງຈີນ-ເອີຣົບຄັ້ງທີ 4 ໄດ້ບັນລຸຄວາມຮັບຮູ້ທີ່ເປັນເອກະສັນກັນຫລາຍປະການ
ວັນທີ 24 ຕຸລານີ້, ການເຈລະຈາຊັ້ນສູງດ້ານເສດຖະກິດການຄ້າລະຫວ່າງຈີນ-ເອີຣົບຄັ້ງທີ 4 ໄດ້ຈັດຂຶ້ນຢູ່ນະຄອນຫລວງບຣຸກແຊນ ປະເທດແບນຊິກ ໂດຍມີທ່ານມ໋າຄ໋າຍ, ຮອງນາຍົກລັດຖະມົນຕີຈີນ, ທ່ານໂອລີ ເຣນ, ຮອງປະທານຄະນະກໍາມະການສະຫະພາບເອີຣົບ ແລະທ່ານຄາເຣນ ເດ ກຸດ, ກໍາມາທິການການຄ້າ ຄະນະກໍາມະການສະຫະພາບເອີຣົບ ຮ່ວມກັນເປັນປະທານຂອງການເຈລະຈາຄັ້ງນີ້.
ທ່ານມ໋າຄ໋າຍກ່າວວ່າ, ປັດຈຸບັນນີ້ສະຖານະການດ້ານເສດຖະກິດໃນທົ່ວໂລກມີຄວາມສັບສົນຫລາຍ, ຈີນກັບເອີຣົບລ້ວນແຕ່ຢູ່ໄລຍະສໍາຄັນຂອງການຊຸກຍູ້ການປັບປຸງໂຄງປະກອບແລະສົ່ງເສີມການເຕີບໂຕຢ່າງໝັ້ນທ່ຽງຂອງເສດຖະກິດ. ສອງຝ່າຍຄວນເພີ່ມທະວີການປະສານງານດ້ານນະໂຍບາຍເສດຖະກິດມະຫາພາກ ແລະຊຸກຍູ້ການເຕີບໂຕຂອງເສດຖະກິດຮ່ວມກັນ.
ຝ່າຍເອີຣົບກ່າວວ່າ, ການທີ່ອົງກອນເສດຖະກິດໃຫຍ່ເອີຣົບກັບຈີນເພີ່ມທະວີການປະສານງານດ້ານນະໂຍບາຍເສດຖະກິດມະຫາພາກ, ແກ້ໄຂບັນຫາການຄ້າການລົງທຶນຢ່າງເໝາະສົມຜ່ານການເຈລະຈາແລະການຮ່ວມມື ມີຄວາມສໍາຄັນທີ່ສຸດຕໍ່ສອງຝ່າຍເອີຣົບກັບຈີນ ກໍຄືເສດຖະກິດທົ່ວໂລກ.
ສອງຝ່າຍໄດ້ໃຫ້ຄໍາໝັ້ນສັນຍາໃນການຍຶດໝັ້ນການເປີດຕະຫລາດ, ຄັດຄ້ານລັດທິປົກປ້ອງການຄ້າທຸກປະເພດ, ຄວບຄຸມແລະແກ້ໄຂການຂັດແຍ້ງດ້ານການຄ້າໃຫ້ດີໂດຍຜ່ານການເຈລະຈາແລະການປຶກສາຫາລື ແລະເພີ່ມທະວີການຮ່ວມມືໃນຂົງເຂດຕ່າງໆຕື່ມອີກ ເຊັ່ນດ່ານພາສີ, ການກວດກາຄຸນນະພາບ, ສິດຊັບສິນທາງບັນຍາ, ການບິນພົນລະເຮືອນ ແລະອື່ນໆ. ຊຸກຍູ້ການຮ່ວມມືດ້ານການຄ້າເຕັກໂນໂລຊີລະດັບສູງໃຫ້ໄດ້ຮັບຄວາມຄືບໜ້າຢ່າງແທ້ຈິງ.
