ຈີນກັບຝຣັ່ງຈະຊຸກຍູ້ການພົວພັນສອງຝ່າຍໃຫ້ກ້າວຂຶ້ນສູ່ລະດັບໃໝ່ໂອກາດການສ້າງການພົວພັນທາງການທູດຄົບຮອບ 50 ປີ
ວັນທີ 27 ມັງກອນ ປີ 2014 ເປັນວັນລະນຶກການສ້າງຕັ້ງການພົວພັນທາງການທູດລະຫວ່າງຈີນກັບຝຣັ່ງຄົບຮອບ 50 ປີ. ວັນທີ 25 ຕຸລານີ້, ທ່ານຫລິວໄຫສິ່ງ, ຫົວໜ້າກົມ ເອີຣົບກະຊວງການຕ່າງປະເທດຈີນກ່າວວ່າ, ສອງປະເທດກໍາລັງຮ່ວມມືກັນຢ່າງໃກ້ຊິດກ່ຽວກັບການຈັດກິດຈະກໍາສະເຫລີມສະຫລອງວັນດັ່ງກ່າວ ແລະທໍາຄວາມພະຍາຍາມເພື່ອຊຸກຍູ້ການພົວພັນສອງຝ່າຍໃຫ້ກ້າວຂຶ້ນສູ່ລະດັບໃໝ່.
ໃນໄລຍະໜຶ່ງປີມານີ້, ທ່ານໂລເຣັດ ຟາປີໂອສ, ລັດຖະມົນຕີວ່າການກະຊວງການຕ່າງປະເທດຝຣັ່ງໄດ້ເດີນທາງມາຢ້ຽມຢາມຈີນຫລາຍຄັ້ງ ແລະໄດ້ຕີລາຄາສູງຕໍ່ການພົວພັນສອງຝ່າຍ. ຕໍ່ເລື່ອງນີ້, ທ່ານຫລິວໄຫສິ່ງກ່າວວ່າ, ການພົວພັນລະຫວ່າງຈີນ-ຝຣັ່ງໄດ້ຢືນຢູ່ແຖວໜ້າຂອງການພົວພັນລະຫວ່າງຈີນກັບປະເທດຝ່າຍຕາເວັນຕົກ ໂດຍສະເພາະກັບປະເທດໃຫຍ່ມາໂດຍຕະຫລອດ. ສອງປະເທດມີການພົວພັນທີ່ມີຄວາມໄວ້ເນື້ອເຊື່ອໃຈເຊິ່ງກັນແລະກັນໃນດ້ານການເມືອງແລະຍຸດທະສາດ, ມີການພົວພັນທີ່ເພິ່ງພາອາໃສແລະຊ່ວຍຊູຍູ້ໜູນກັນໃນດ້ານເສດຖະກິດ, ມີການພົວພັນທີ່ຖອດຖອນບົດຮຽນກັນໃນດ້ານວັດທະນະທໍາ. ສະນັ້ນ, ໂອກາດການສ້າງການພົວພັນທາງການທູດຄົບຮອບ 50 ປີ, ສອງປະເທດຈະຊຸກຍູ້ການພົວພັນສອງຝ່າຍໃຫ້ກ້າວຂຶ້ນສູ່ລະດັບໃໝ່.
ທ່ານຫລິວໄຫສິ່ງກ່າວຕື່ມວ່າ, ກິດຈະກໍາສະເຫລີມສະຫລອງຈະດໍາເນີນເປັນເວລາ 1 ປີ, ໃນໄລຍະຈັດກິດຈະກໍາຄັ້ງນີ້, ນອກຈາກຈະຈັດງານວາງສະແດງແລະຄອນເສີດຢ່າງເປັນປະຈໍາແລ້ວ, ສອງປະເທດຍັງຈະຈໍາໜ່າຍສະແຕມແລະປຶ້ມຮູບພາບຂອງການເຄື່ອນໄຫວອີກຈໍານວນໜຶ່ງ.
