ການຮ່ວມມືດ້ານທາງລົດໄຟຄວາມໄວສູງລະຫວ່າງຈີນ-ໄທມີອະນາຄົດອັນສົດໃສ
ວັນທີ 25 ຕຸລານີ້, ບໍລິສັດໃຫຍ່ທາງລົດໄຟຈີນກ່າວຢູ່ນະຄອນຫຼວງບາງກອກຂອງໄທວ່າ, ໃນຖານະທີ່ເປັນປະເທດທີ່ມີລະບົບທາງລົດໄຟຄວາມໄວສູງຂະໜາດໃຫຍ່ທີ່ສຸດຂອງໂລກ, ຈີນຈະດຳເນີນການຮ່ວມມືກັບໄທໃນໂຄງການທາງລົດໄຟຄວາມໄວສູງດ້ວຍເຕັກໂນໂລຊີທີ່ກ້າວໜ້າທີ່ສຸດແລະບົດຮຽນທີ່ດີທີ່ສຸດ, ເພື່ອສ້າງຄວາມສຸກໃຫ້ແກ່ປະຊາຊົນໄທແລະປະຊາຊົນຂອງພາກພື້ນນີ້.
ຫວ່າງກ່ອນນີ້ບໍ່ດົນ, ໃນໄລຍະທີ່ທ່ານ ຫຼີເຄີ້ສ໋ຽງ, ນາຍົກລັດຖະມົນຕີຈີນໄປຢ້ຽມຢາມໄທ, ບໍລິສັດໃຫຍ່ທາງລົດໄຟຈີນ ໄດ້ຈັດງານວາງສະແດງທາງລົດໄຟຈີນຢູ່ນະຄອນຫຼວງບາງ ກອກ, ທ່ານຫຼີເຄີ້ສ໋ຽງ ແລະ ທ່ານນາງຍິ່ງລັກ ຊິນນະວັດ, ນາຍົກລັດຖະມົນຕີໄທໄດ້ໄປຢ້ຽມຊົມໃນງານວາງສະແດງຄັ້ງນີ້, ຝ່າຍຕ່າງໆກໍໄດ້ໃຫ້ຄວາມສົນໃຈໃນລະດັບສູງ ແລະ ມີສຽງຕອບຮັບເປັນຢ່າງດີຕໍ່ນາຍົກລັດຖະມົນຕີສອງປະເທດຈີນ-ໄທທີ່ໄດ້ໄປຢ້ຽມຊົມໃນງານວາງສະແດງດັ່ງກ່າວ.
ອີງຕາມແຜນການກໍ່ສ້າງທາງລົດໄຟຄວາມໄວສູງຂອງກະຊວງຄົມມະນາຄົມຂົນສົ່ງຂອງໄທ, ໄທຈະສ້າງທາງລົດໄຟຄວາມໄວສູງ 4 ເສັ້ນໃຫ້ສຳເລັດພາຍໃນ 7 ປີຂ້າງໜ້ານີ້. ຮອດເວລານັ້ນ, ໄທຈະກາຍເປັນປະເທດທຳອິດໃນອາຊຽນທີ່ມີທາງລົດໄຟຄວາມໄວສູງ. ໃນແຜນ ການກໍ່ສ້າງ, ມີທາງລົດໄຟຄວາມໄວສູງ 3 ເສັ້ນຈະຜ່ານໄປຮອດມຽນມາ, ລາວ ແລະ ມະເລເຊຍ, ແລະຈະເຊື່ອມຕໍ່ນະຄອນຄຸນມິງຈີນ ແລະ ສິງກະໂປໃຫ້ເຂົ້າກັນອີກ.
ທ່ານໂຈ່ວລີ, ຫົວໜ້າພະແນກຄຸ້ມຄອງວິທະຍາສາດ-ເຕັກໂນໂລຊີ ບໍລິສັດໃຫຍ່ທາງ ລົດໄຟຄວາມໄວສູງຈີນ ກ່າວວ່າ, ຄຽງຄູ່ກັບການຈັດຕັ້ງປະຕິບັດແຜນການທາງລົດໄຟຄວາມໄວສູງ, ໄທຈະມີຕາໜ່າງລະບົບທາງລົດໄຟທີ່ທັນສະໄໝ ໂດຍນະຄອນຫຼວງບາງກອກເປັນໃຈກາງແລະຜ່ານໄປພາກຕ່າງໆຂອງທົ່ວປະເທດ ແລະ ຕິດຕໍ່ກັບປະເທດອ້ອມຂ້າງຂອງໄທ, ນີ້ຈະເປັນການຊຸກຍູ້ການພັດທະນາຂອງຂະແໜງການທີ່ກ່ຽວຂ້ອງ, ຊຸກຍູ້ຄວາມຈະເລີນຂອງຂະແໜງການທ່ອງທ່ຽວແລະຂະແໜງອະສັງຫາລິມະຊັບຕາມສອງຟາກທາງ, ເພີ່ມຕຳແໜ່ງການປະກອບອາຊີບ, ສ້າງຄວາມສຸກໃຫ້ແກ່ປະຊາຊົນທ້ອງຖິ່ນຫຼາຍຍິ່ງຂຶ້ນ.
ເວົ້າສຳລັບພາກພື້ນແລ້ວ, ທ່ານໂຈ່ວລີ, ຫົວໜ້າພະແນກຄຸ້ມຄອງວິທະຍາ ສາດ-ເຕັກໂນໂລຊີ ບໍລິສັດໃຫຍ່ທາງລົດໄຟຄວາມໄວສູງຈີນ ກ່າວວ່າ, ໃນຖານະທີ່ເປັນປະເທດທີ່ສຳຄັນຂອງພາກພື້ນອາຊຽນ, ໄທມີຖານະເປັນຊຸມທາງຄົມມະນາຄົມຂອງພາກພື້ນອີກ. ການກໍ່ສ້າງທາງລົດໄຟຄວາມໄວສູງຈະເພີ່ມທະວີຖານະໃຈກາງທາງພູມສາດຂອງໄທ, ຊຸກຍູ້ການຄ້າ, ການທ່ອງທ່ຽວ ແລະ ການແລກປ່ຽນດ້ານວັດທະນະທຳ-ສັງຄົມລະຫວ່າງປະເທດອ້ອມຂ້າງ. ນອກນີ້, ໂຄງການທາງລົດໄຟສາຍອາຊີທີ່ຝ່າຍຕ່າງໆພວມຮ່ວມກັນພະຍາຍາມວາງແຜນກໍ່ສ້າງນັ້ນ ກໍຈະມີຜົນດີຕໍ່ການເພີ່ມທະວີການເຊື່ອມຈອດເຊິ່ງກັນແລະກັນລະຫວ່າງບັນດາປະເທດອາຊີຕາເວັນອອກສຽງໃຕ້, ເລັ່ງລັດການຮ່ວມມືແລະພັດທະນາເສດຖະກິດຂອງອະນຸພາກພື້ນແມ່ນ້ຳຂອງຕື່ມອີກ.
