ບົດລາຍງານຂອງອົງການສະຫະປະຊາຊາດກ່າວວ່າ ຊາວອົບພະຍົບຊີຣີທີ່ໄປລີບັງມີຫລາຍກວ່າ 8 ແສນຄົນ
ວັນທີ 27 ຕຸລານີ້, ສໍານັກງານຂ້າຫລວງໃຫຍ່ເພື່ອຊາວອົບພະຍົບອົງການສະຫະປະຊາຊາດໄດ້ເປີດເຜີຍບົດລາຍງານຢູ່ນະຄອນຫລວງເບຣຸດຂອງລີບັງ ວ່າ ມາຮອດປັດຈຸບັນນີ້ ຊາວອົບພະຍົບຊີຣີທີ່ໜີໄປລີບັງມີຫລາຍກວ່າ 8 ແສນຄົນ.
ບົດລາຍງານກ່າວວ່າ, ໃນຊາວອົບພະຍົບຊີຣີເຫລົ່ານີ້, ມີປະມານ 7 ແສນຄົນໄດ້ລົງທະບຽນຢູ່ອົງການສະຫະປະຊາຊາດເພື່ອຊາວອົບພະຍົບ ແລະຍັງມີປະມານ 9 ໝື່ນຄົນກໍາລັງລໍຖ້າການລົງທະບຽນຢູ່. ພວກເຂົາກໍາລັງໄດ້ຮັບການປົກປ້ອງແລະໄດ້ຮັບການຊ່ວຍເຫລືອຈາກລັດຖະບານລີບັງແລະອົງການສາກົນທີ່ກ່ຽວຂ້ອງເຊັ່ນອົງການສະຫະປະຊາຊາດແລະອື່ນໆ.
ວັນທີ 18 ຕຸລານີ້, ຢູ່ ນະຄອນຫລວງເບຣຸດ, ທ່ານມິເຊນ ສຸໄລມານ, ປະທານາທິບໍດີລີບັງໄດ້ຮຽກຮ້ອງໃຫ້ປະຊາຄົມໂລກຈົ່ງໃຫ້ການຊ່ວຍເຫລືອທີ່ຫລາຍກວ່າເກົ່າແກ່ລີບັງເພື່ອຊ່ວຍເຫລືອຊາວອົບພະຍົບຊີຣີ. ທ່ານຊີ້ອອກວ່າ, ປະຊາຄົມໂລກຍັງບໍ່ທັນໄດ້ຮັບຜິດຊອບດ້ານການເງິນຢ່າງພຽງພໍໃນການຊ່ວຍເຫລືອຊາວອົບພະຍົບຊີຣີ, ການຮັບຜິດຊອບການຈັດສັນຊາວອົບພະຍົບຊີຣີຍັງເປັນພຽງຮູບການເທົ່ານັ້ນ.
