ຊີຣີຍື່ນບັນຊີລາຍການອາວຸດເຄມີທີ່ຈະທໍາລາຍໃຫ້ແກ່ອົງການເກືອດຫ້າມອາວຸດເຄມີແລ້ວ
ວັນທີ 27 ຕຸລານີ້, ອົງການເກືອດຫ້າມອາວຸດເຄມີທີ່ມີສໍານັກງານໃຫຍ່ຢູ່ນະຄອນລາໄຮ ປະເທດໂຮນລັງ ເປີດເຜີຍວ່າ, ວັນທີ 24 ຕຸລານີ້, ຊີຣີໄດ້ຍື່ນບັນຊີລາຍການອາວຸດເຄມີທີ່ຈະຖືກທໍາລາຍສະບັບທໍາອິດໃຫ້ແກ່ອົງການເກືອດຫ້າມອາວຸດເຄມີແລ້ວ. ບັນຊີລາຍການສະບັບນີ້ລວມມີສອງພາກສ່ວນ ຄື ພາກສ່ວນທີໜຶ່ງແມ່ນສະພາບອາວຸດເຄມີຂອງຊີຣີໃນປັດຈຸບັນ, ພາກສ່ວນທີສອງແມ່ນແຜນການທໍາລາຍອາວຸດເຄມີເຫລົ່ານນີ້ແລະອຸປະກອນທີ່ກ່ຽວຂ້ອງ. ບັນຊີລາຍການສະບັບນີ້ໄດ້ມີການມອບກ່ອນກໍານົດ 3 ມື້ເຊິ່ງເປັນເວລາກໍານົດຂອງອົງການເກືອດຫ້າມອາວຸດເຄມີກໍານົດໃຫ້, ນີ້ຈະເປັນພື້ນຖານໃຫ້ແກ່ການທໍາລາຍອາວຸດເຄມີຂອງຊີຣີແລະອຸປະກອນທີ່ກ່ຽວຂ້ອງຢ່າງເປັນລະບົບ, ທົ່ວເຖິ່ງແລະແທ້ຈິງ.
ຕາມມະຕິທີ່ກ່ຽວຂ້ອງຂອງສະພາຄວາມໝັ້ນຄົງອົງການສະຫະປະຊາຊາດ, ການທໍາລາຍ ອາວຸດເຄມີຂອງຊີຣີແບ່ງເປັນສອງຂັ້ນຕອນ ຄື ຂັ້ນຕອນທີໜຶ່ງ, ທໍາລາຍອຸປະກອນຜະລິດອາວຸດເຄມີກ່ອນວັນທີ 1 ພະຈິກປີນີ້, ຂັ້ນຕອນທີສອງ, ແມ່ນການທໍາລາຍອາວຸດເຄມີຂອງຊີຣີທັງໝົດກ່ອນວັນທີ 30 ມິຖຸນາ ປີ 2014.
ນອກຈາກຖະແຫລງການດັ່ງກ່າວແລ້ວ, ອົງການເກືອດຫ້າມອາວຸດເຄມີຍັງບໍ່ໄດ້ມີການຕີລາຄາດ້ານອື່ນເທື່ອ. ເບິ່ງລວມແລ້ວ, ໃນບັນຫາທໍາລາຍອາວຸດເຄມີຂອງຊີຣີ, ອົງການເກືອດຫ້າມອາວຸດເຄມີມີຄວາມພໍໃຈສົມຄວນຕໍ່ເຈົ້າໜ້າທີ່ຊີຣີທີ່ໄດ້ໃຫ້ການຮ່ວມມືເປັນຢ່າງດີ.
