ໂທລະສັບມືຖືຂອງນາຍົກລັດຖະມົນຕີເຢຍລະມັນຖືກອາເມລິກາຕິດຕາມລັກຟັງເປັນເວລາ 10 ກວ່າປີ ແຕ່ທ່ານໂອບາມາທໍາທ່າບໍ່ຮູ້ຈັກເລື່ອງນີ້
ກໍລະນີໂທລະສັບມືຖືຂອງທ່ານນາງແອງເຈີລາ ເມີເຄ, ນາຍົກລັດຖະມົນຕີເຢຍລະມັນຖືກອົງການຂ່າວລັບຂອງອາເມລິກາຕິດຕາມລັກຟັງສືບຕໍ່ມີຂ່າວໃໝ່ອີກ. ບົດລາຍງານຂ່າວຫລ້າສຸດຂອງສື່ມວນຊົນເຢຍລະມັນແຈ້ງວ່າ, ອົງການຂ່າວລັບຂອງອາເມລິກາໄດ້ຕິດຕາມລັກຟັງໂທລະສັບມືຖືຂອງນາງເມີເຄເປັນເວລາ 10 ກວ່າປີມາແລ້ວ, ສ່ວນທ່ານບາຣັກ ໂອບາມາ, ປະທານາທິບໍດີອາເມລິກາກໍໄດ້ຮູ້ຈັກເລື່ອງນີ້ຢ່າງໜ້ອຍນັບແຕ່ປີ 2010, ແຕ່ຫາກທໍາທ່າເສີຍຕໍ່ເລື່ອງນີ້.
ວັນທີ 23 ຕຸລານີ້, ນາງເມີເຄນເຄີຍໂທໄປຫາທ່ານໂອບາມາ, ປະທານາທິບໍດີອາເມລິກາ ເພື່ອຊັກຖາມທ່ານໂອບາມາກ່ຽວກັບເລື່ອງທີ່ມືຖືຂອງຕົນຖືກຕິດຕາມລັກຟັງ ແລະກ່າວປະທ້ວງຕໍ່ການກະທໍາແບບນີ້. ໃນເວລານັ້ນ, ທ່ານໂອບາມາກໍຕອບນາງເມີເຄນວ່າ, ທ່ານບໍ່ຮູ້ຈັກເລື່ອງນີ້, ຖ້າວ່າຕົນເອງຮູ້ຈັກມາກ່ອນ, ກໍໃຫ້ກົມຮັກສາຄວາມປອດໄພແຫ່ງຊາດອາເມລິກາ ຫລື NSA ຍຸດຕິການລັກຟັງໃນທັນທີ່. ແຕ່ວາລະສານ Der Spiegel ຂອງເຢຍລະມັນແຈ້ງຂ່າວຫລ້າສຸດວ່າ, ອາເມລິກາໄດ້ເລີ່ມຕິດຕາມລັກຟັງນາງເມີເຄໃນປີ 2002 ແລະໄດ້ຕິດຕາມລັກຟັງເປັນເວລາ 11 ປີມາແລ້ວ, ເອກະສານລັບສະບັບໜຶ່ງຂອງ NSA ຊີ້ໃຫເຫັນວ່າ, ທ່ານໂອບາມາແມ່ນຮູ້ຈັກເລື່ອງນີ້ດີ, ຍິ່ງໄປກວ່ານັ້ນ, ກ່ອນທ່ານໂອບາມາຈະເດີນທາງໄປຢ້ຽມຢາມເຢຍລະມັນ, ກໍໄດ້ມີການລັກຟັງມາກ່ອນແລ້ວ.
ການກະທໍາທີ່ບໍ່ດີຂອງອາເມລິກາໃນບັນຫາຕິດຕາມລັກຟັງບໍ່ແມ່ນມີພຽງແຕ່ເລື່ອງນີ້ເທົ່ານັ້ນ. ວັນທີ 26 ຕຸລານີ້, ຜູ້ຊ່ຽວຊານສະເພາະດ່ານຂອງຍີ່ປຸ່ນຫລາຍທ່ານເປີດເຜີຍໃຫ້ຮູ້ວ່າ, ປະມານປີ 2011, NSA ທີ່ເປັນອົງການຂ່າວລັບຂອງອາເມລິກາເຄີຍສະເໜີກັບລັດຖະບານຍີ່ປຸ່ນວ່າ, ຫວັງວ່າຍີ່ປຸ່ນຈະໃຫ້ການປະສານສົມທົບໃນການຕິດຕາມລັກຟັງຂໍ້ມູນຂ່າວສານຂອງບຸກຄົນທີ່ນໍາໃຊ້ສາຍໄຍແກ້ວ ເຊັ່ນອີແມວແລະໂທລະສັບ. ແຕ່ຍີ່ປຸ່ນໄດ້ປະຕິເສດການຂໍຮ້ອງນີ້ດ້ວຍຂໍ້ອ້າງທີ່ວ່າມີການຈໍາກັດດ້ານກົດໝາຍແລະບຸກຄະລາກອນດ້ານຂ່າວລັບບໍ່ພຽງພໍ.
