ລັດຖະສະພາອາເມລິກາຈະກວດກາໂຄງການຕິດຕາມຂ່າວລັບທຸກໂຄງການ
ວັນທີ 28 ຕຸລານີ້, ນາງເດຍເນ ເຟນສະເຕນ, ປະທານຄະນະກຳມະການຂ່າວລັບພິເສດ ສະພາສູງອາເມລິກາ ກ່າວວ່າ: ນາງເອງຄັດຄ້ານອົງການຂ່າວລັບອາເມລິກາຕິດຕາມລັກຟັງຜູ້ນຳຂອງປະເທດພັນທະມິດ, ລັດຖະສະພາຈະກວດກາໂຄງການຕິດຕາມຂ່າວລັບທຸກໂຄງການ.
ໃນມື້ດຽວກັນ, ນາງເຟນສະເຕນ ໄດ້ອອກຖະແຫຼງການ ໂດຍກ່າວວ່າ: ນາງຄັດຄ້ານຢ່າງຈະແຈ້ງກ່ຽວກັບກົມຄວາມປອດໄພແຫ່ງຊາດອາເມລິກາ ຫຼື NSA ຕິດຕາມລັກຟັງຜູ້ນຳຂອງປະເທດພັນທະມິດອາເມລິກາ ເຊັ່ນ ຝຣັ່ງ, ແອສປາຍ, ເມັກຊິກ ແລະເຢຍລະມັນເປັນຕົ້ນ. ນາງ ກ່າວວ່າ: ທຳນຽບຂາວໄດ້ກ່າວຕໍ່ນາງເອງວ່າຈະບໍ່ສືບຕໍ່ວຽກງານເກັບກຳຂ່າວລັບທີ່ແນໃສ່ພັນທະມິດຂອງອາເມລິກາອີກ, ນາງສະແດງການສະໜັບສະໜູນຕໍ່ເລື່ອງນີ້.
ຫວ່າງມໍ່ໆມານີ້, ສື່ມວນຊົນຂອງປະເທດເອີຣົບ ໄດ້ເປີດເຜີຍວ່າ, ອົງການຂ່າວລັບອາເມລິກາໄດ້ຕິດຕາມລັກຟັງໂທລະສັບມືຖືຂອງທ່ານນາງແອງເຈີລາ ເມີເຄວ, ນາຍົກລັດຖະມົນຕີເຢຍລະມັນ ມາເປັນເວລາຍາວນານ, ແລະຕິດຕາມລັກຟັງໂທລະສັບຂອງພົນລະເມືອງຝຣັ່ງ ແລະ ແອສປາຍໃນບໍລິເວນກວ້າງຂວາງ. ລັດຖະບານຂອງເຢຍລະມັນ, ຝຣັ່ງ ແລະປະເທດອື່ນໆ ໄດ້ຮຽກຮ້ອງໃຫ້ລັດຖະບານໂອບາມາໃຫ້ການອະທິບາຍຕໍ່ການຕິດຕາມລັກຟັງຂອງອົງການຂ່າວລັບອາເມລິກາ.
ໜັງສືພິມ "ເອ ມູນໂດ" ຂອງແອສປາຍສະບັບອອກວັນທີ 28 ຕຸລາ ລາຍງານວ່າ, ອີງຕາມເອກະສານທີ່ທ້າວແອດວາດ ສະໂນແດນ, ຜູ້ເປີດເຜີຍໂຄງການຕິດຕາມລັກຟັງຂອງລັດຖະບານອາເມລິກາ ເປີດເຜີຍອອກມານັ້ນ ສະແດງໃຫ້ເຫັນວ່າ, NSA ໄດ້ຕິດຕາມລັກຟັງໂທລະສັບຂອງແອສປາຍ 60 ກວ່າລ້ານກໍລະນີພາຍໃນໜຶ່ງເດືອນ. ກະຊວງການຕ່າງປະເທດແອສປາຍໄດ້ສະແດງຄວາມບໍ່ພໍໃຈຕໍ່ເຫດການລັກຟັງດັ່ງກ່າວ, ແລະໄດ້ຮຽກທ່ານເອກອັກຄະລັດຖະທູດອາເມລິກາປະຈຳແອສປາຍເຂົ້າພົບໃນມື້ດຽວກັນ, ໂດຍຮຽກຮ້ອງໃຫ້ອາເມລິກາຈົ່ງໃຫ້ຄຳອະທິບາຍຕໍ່ເຫດການທີ່ເກີດຂຶ້ນ. ຕໍ່ມາ ກະຊວງການຕ່າງປະເທດແອສປາຍໄດ້ອອກຖະແຫຼງຂ່າວອີກ, ໂດຍກ່າວວ່າ ແອສປາຍໄດ້ຮຽກຮ້ອງໃຫ້ອາເມລິກາຈົ່ງໃຫ້ຄຳອະທິບາຍຕໍ່ເຫດການລັກຟັງໂທລະສັບຂອງແອສປາຍ ແລະສະໜອງຂໍ້ມູນທີ່ກ່ຽວຂ້ອງທັງໝົດຕາມຄວາມຈຳເປັນ. ຖ້າອາເມລິກາມີກະທຳຕິດຕາມລັກຟັງແທ້, ກໍຈະມີຜົນກະທົບຕໍ່ການພົວພັນອັນເປັນມູນເຊື້ອລະຫວ່າງສອງປະເທດແອສປາຍ-ອາເມລິກາ.
