ສະຫະພາບເອີຣົບຮຽກຮ້ອງໃຫ້ອາເມລິກາຈົ່ງເພີ່ມທະວີການປົກປ້ອງສິດສ່ວນຕົວເພື່ອສ້າງຄວາມໄວ້ເນື້ອເຊື່ອໃຈກັນຄືນໃໝ່ລະຫວ່າງສອງຝ່າຍ
ວັນທີ 29 ຕຸລານີ້, ນາງວີເວຍເນ ເຣດິງ, ຄະນະກຳມະການສະຫະພາບເອີຣົບທີ່ຮັບຜິດຊອບວຽກງານດ້ານຍຸດຕິທຳ, ສິດທິມະນຸດ ແລະ ວຽກງານພົນລະເມືອງ ໄດ້ກ່າວຄຳປາໄສ, ໂດຍຕຳນິອາເມລິກາທີ່ໄດ້ຕິດຕາມລັກຟັງທີ່ແນ່ໃສ່ເອີຣົບ ເຊິ່ງເປັນການທຳລາຍຄວາມໄວ້ເນື້ອເຊື່ອໃຈກັນລະຫວ່າງສອງຝັ່ງມະຫາສະໝຸດອັດລັງຕິກ. ນາງໄດ້ຮຽກຮ້ອງໃຫ້ຝ່າຍອາເມລິກາຈົ່ງເພີ່ມຄວາມເຂັ້ມງວດໃນການປົກປ້ອງສິດສ່ວນຕົວເພື່ອສ້າງຄວາມໄວ້ເນື້ອເຊື່ອໃຈກັນຄືນໃໝ່, ຖ້າບໍ່ດັ່ງນັ້ນ, ກໍອາດຈະກະທົບເຖິງການເຈລະຈາລະຫວ່າງສອງຝ່າຍກ່ຽວກັບ "ສັນຍາການພົວພັນຄູ່ຮ່ວມການຄ້າແລະການລົງທຶນຂ້າມມະຫາສະໝຸດອັດລັງຕິກ" ຝ່າຍອາເມລິກາຄວນສ້າງຄວາມໄວ້ເນື້ອເຊື່ອໃຈກັນແບບນີ້ຄືນໃໝ່, ຖ້າບໍ່ດັ່ງນັ້ນ, ລັດຖະສະພາເອີຣົບກໍອາດຈະຢັບຢັ້ງສັນຍາສະບັບນີ້.
ນອກນີ້, ໃນມື້ດຽວກັນ, ຄະນະຜູ້ແທນຄະນະກຳມາທິການການຕ່າງປະເທດຂອງລັດຖະສະພາເອີຣົບ ໄດ້ພົບປະກັບທ່ານເວນດີ ເຊີມານ, ລັດຖະມົນຕີຊ່ວຍວ່າການກະຊວງການຕ່າງປະເທດອາເມລິກາທີ່ຮັບຜິດຊອບວຽກງານການເມືອງ, ເພື່ອຂໍຄວາມຍຸດຕິທຳໃນບັນຫາການຕິດຕາມລັກຟັງທີ່ເກີດຂຶ້ນ. ແຕ່ໃນວັນທີ 29 ຕຸລານີ້, ທ່ານກິດ ອາເລັກຊັນເດີ, ຫົວໜ້າກົມຄວາມປອດໄພແຫ່ງຊາດອາເມລິກາ ໄດ້ເປັນພະຍານຢູ່ລັດຖະສະພາອາເມລິກາ ໂດຍກ່າວວ່າ, ຫວ່າງມໍ່ໆມານີ້, ສື່ມວນຊົນເອີຣົບລາຍງານຂ່າວກ່ຽວກັບອົງການຂ່າວລັບອາເມລິກາທີ່ຕິດຕາມລັກຟັງໂທລະສັບຂອງພົນລະເມືອງເອີຣົບນັ້ນ ແມ່ນເລື່ອງທີ່ຜິດພາດ. ທ່ານຍັງໄດ້ປະຕິເສດວ່າ ໂຄງການຕິດຕາມລັກຟັງຂອງອາເມລິກາແມ່ນແນໃສ່ພົນລະເມືອງເອີຣົບ, ແຕ່ທ່ານບໍ່ໄດ້ກ່າວເຖິງລາຍລະອຽດແຕ່ຢ່າງໃດ.
