ເວທີປຶກສາຫາລືສະມາຄົມອຸດສາຫະກໍາການຄ້າໂລກຄັ້ງທີ 4 ຈັດຂຶ້ນຢູ່ນະຄອນຫລວງປັກກິ່ງ
ວັນທີ 29 ຕຸລານີ້, ເວທີປຶກສາຫາລືສະມາຄົມອຸດສາຫະກໍາການຄ້າໂລກຄັ້ງທີ 4 ໄດ້ຈັດຂຶ້ນຢູ່ສູນປະຊຸມແຫ່ງຊາດ ນະຄອນຫລວງປັກກິ່ງຂອງຈີນ. ຫົວຂໍ້ຕົ້ນຕໍຂອງເວທີປຶກສາຫາລືຄັ້ງນີ້ແມ່ນ "ການຮ່ວມມືທີ່ໄວ້ເນື້ອເຊື່ອໃຈເຊິ່ງກັນແລະກັນ, ຕ່າງຝ່າຍຕ່າງມີຜົນປະໂຫຍດ", ຈຸດປະສົງແມ່ນສ້າງເວທີການເຈລະຈາແລະການປຶກສາຫາລືໃຫ້ແກ່ສະມາຄົມອຸດສາຫະກໍາການຄ້າຂອງໂລກ ເພື່ອຫລຸດຜ່ອນຄວາມຂັດແຍ້ງດ້ານການຄ້າສາກົນ, ຄົ້ນຄວ້າພິຈາລະນາກ່ຽວກັບບັນຫາເສດຖະກິດສາກົນ ແລະຄົ້ນຄວ້າພິຈາລະນາຊ່ອງທາງແກ້ໄຂແລະສະເໜີມາດຕະການການຮ່ວມມືໃນບາງຂະແໜງການ.
ໃນເວລາກ່າວປາຖະກະຖາໃນເວທີປຶກສາຫາລືຄັ້ງນີ້, ທ່ານຫລີຢີ້ຈົ່ງ, ປະທານສະມາຄົມຮ່ວມເສດຖະກິດອຸດສາຫະກໍາຈີນ ຊີ້ອອກວ່າ, ເສດຖະກິດຈີນແມ່ນດີສົມຄວນໃນດ້ານພື້ນຖານ ແລະປາກົດມີລັກສະນະຂັ້ນຕອນໃໝ່. ໃນອະນາຄົດ, ອຸດສາຫະກໍາຈະຍັງເປັນກໍາລັງຕົ້ນຕໍຂອງການເຕີບໂຕຂອງເສດຖະກິດຈີນ, ແຕ່ໄດ້ກ້າວເຂົ້າສູ່ໄລຍະສໍາຄັນທີ່ຕ້ອງຫັນປ່ຽນຮູບແບບແລະຍົກລະດັບຂຶ້ນ, ການຍົກສູງຄຸນນະພາບແລະເພີ່ມທະວີປະສິດທິຜົນເປັນທາງເລືອກທີ່ຈໍາເປັນ ທິດທາງການພັດທະນາໃນການຫັນປ່ຽນຮູບແບບແລະຍົກລະດັບຂອງເສດຖະກິດອຸດສາຫະກໍາຈີນ.
ຜູ້ນໍາສະມາຄົມຂະແໜງການ, ນັກວິຊາການ, ປະທານບໍລິສັດຂ້າມຊາດ 300 ກວ່າທ່ານທີ່ມາຈາກ 30 ກວ່າປະເທດແລະພາກພື້ນໄດ້ປະຊຸມຮ່ວມກັນເພື່ອປຶກສາຫາລືແລະແລກປ່ຽນຄໍາຄິດຄໍາເຫັນແລະບົດຮຽນເຊິ່ງກັນແລະກັນ.
