ທ່ານບຼາຮິມີກ່າວວ່າ ຂະບວນການຂ້າມຜ່ານຂອງຊີຣີແມ່ນກໍານົດໂດຍຝ່າຍຕ່າງໆຂອງຊີຣີເທົ່ານັ້ນ
ວັນທີ 29 ຕຸລານີ້, ທ່ານລັກດາ ບຼາຮິມີ, ຜູ້ຕາງໜ້າພິເສດຮ່ວມວິກິດການຊີຣີຂອງອົງການສະຫະປະຊາຊາດ-ສັນນິບາດອາຣັບທີ່ກໍາລັງເດີນທາງໄປຢ້ຽມຢາມຊີຣີກ່າວວ່າ, ຝ່າຍຕ່າງໆທີ່ກ່ຽວຂ້ອງຂອງຊີຣີແມ່ນຜູ້ກໍານົດຂະບວນການຂ້າມຜ່ານຂອງຊີຣີ. ມື້ດຽວກັນ, ທ່ານບຼາຮິມີໄດ້ພົບປະກັບເຈົ້າໜ້າທີ່ລັດຖະບານຊີຣີ ເຊັ່ນ ທ່ານວາລິດ ມູອາເລມ, ຮອງນາຍົກລັດຖະມົນຕີທັງເປັນລັດຖະມົນຕີວ່າການ ກະຊວງການຕ່າງປະເທດຊີຣີ, ທ່ານອາລີ ໄຮດາ, ລັດຖະມົນຕີວ່າການກະຊວງວຽກງານຊົນເຜົ່າຊີຣີ ແລະທ່ານຟາຍຊານ ເມັກດາດ, ລັດຖະມົນຕີຊ່ວຍວ່າການກະຊວງການຕ່າງປະເທດຊີຣີ ກ່ຽວກັບວຽກງານກອງປະຊຸມສາກົນເຊີແນວວ່າດ້ວຍບັນຫາຊີຣີ ແລະໄດ້ຈັດການເຈລະຈາກັບຜູ້ຕາງໜ້າຝ່າຍຕໍ່ຕ້ານທັງພາຍໃນແລະຕ່າງປະເທດຊີຣີເຊັ່ນອົງການປະສານງານກໍາລັງປະຕິຮູບປະຊາທິປະໄຕແຫ່ງຊາດຊີຣີ ແລະອື່ນໆ.
ຂ່າວແຈ້ງວ່າ, ໃນການເຈລະຈາກັບທ່ານບຼາຮິມີ, ທ່ານມູອາເລມ, ລັດຖະມົນຕີວ່າການກະຊວງການຕ່າງປະເທດຊີຣີໄດ້ກ່າວຢໍ້າວ່າ, ຝ່າຍຊີຣີຈະເຂົ້າຮ່ວມການເຈລະຈາເຊີແນວຄັ້ງທີ 2, ແຕ່ທ່ານຍັງໄດ້ກ່າວເນັ້ນວ່າ, ປະຊາຊົນຊີຣີຈະບໍ່ຍອມຮັບການແຊກແຊງຈາກພາຍນອກທຸກຮູບການ, ການວາງແຜນກ່ຽວກັບອະນາຄົດດ້ານກາງເມືອງຂອງຊີຣີແລະການເລືອກຕັ້ງຜູ້ນໍາຊີຣີເປັນສິດພິເສດຂອງປະຊາຊົນຊີຣີ.
