ຮອງປະທານຄະນະກໍາມະການການທະຫານສູນກາງຈີນພົບປະກັບລັດຖະມົນຕີປ້ອງກັນປະເທດມາເລເຊຍ
ວັນທີ 30 ຕຸລານີ້, ທ່ານຟ້ານຊາງລຸງ, ຮອງປະທານຄະນະກໍາມະການການທະຫານສູນກາງຈີນໄດພົບປະກັບທ່ານຮິຊາມູດິນ ຮູແຊນ, ລັດຖະມົນຕີວ່າການກະຊວງປ້ອງກັນປະເທດມາເລເຊຍຢູ່ນະຄອນຫລວງປັກກິ່ງຂອງຈີນ.
ທ່ານຟ້ານຊາງລຸງກ່າວວ່າ, ການພົວພັນລະຫວ່າງຈີນ-ມາເລເຊຍໄດ້ຖືກຍົກລະດັບເປັນການພົວພັນຄູ່ຮ່ວມມືຍຸດທະສາດຮອບດ້ານ, ສອງຝ່າຍຄວນສືບຕໍ່ແລກປ່ຽນກັນຢ່າງໃກ້ຊິດ, ສະໜັບສະໜູນເຊິ່ງກັນແລະກັນໃນບັນຫາທີ່ກ່ຽວພັນກັບຜົນປະໂຫຍດໃຈກາງຂອງແຕ່ລະຝ່າຍ, ເອົາໃຈໃສ່ສິ່ງທີ່ສອງຝ່າຍໃຫ້ຄວາມສໍາຄັນເຊິ່ງກັນແລະກັນ, ແກ້ໄຂບັນຫາທີ່ອ່ອນໄຫວຢ່າງເໝາະສົມ, ສອງກອງທັບຈີນ-ມາເລເຊຍຄວນຍຶດໝັ້ນຕ່າງຝ່າຍຕ່າງມີຜົນປະໂຫຍດ, ຊຸກຍູ້ຄວາມໄວ້ເນື້ອເຊື່ອໃຈກັນດ້ານຍຸດທະສາດ ແລະລົງເລິກການຮ່ວມມືທີ່ແທ້ຈິງຢ່າງບໍ່ຢຸດຢັ້ງ, ທໍາຄວາມພະຍາຍາມຮ່ວມກັນເພື່ອຊຸກຍູ້ການພົວພັນລະຫວ່າງສອງປະເທດໃຫ້ພັດທະນາຢ່າງຮອບດ້ານ ແລະຮັກສາສັນຕິພາບແລະສະຖຽນລະພາບຂອງພາກພື້ນກໍຄືສາກົນ.
ທ່ານຮິຊາມູດິນກ່າວວ່າ, ມາເລເຊຍກັບຈີນເປັນປະເທດບ້ານໃກ້ເຮືອນຄຽງທີ່ດີ, ກອງກໍາລັງປະກອບອາວຸດມາເລເຊຍຍິນດີສືບຕໍ່ເພີ່ມທະວີການໄປມາຫາສູ່ແລະແລກປ່ຽນ ກັນກັບກອງທັບຈີນ, ຮັດແໜ້ນການຮ່ວມມື, ຊຸກຍູ້ການພົວພັນລະຫວ່າງສອງປະເທດໃຫ້ພັດທະນາຢ່າງຮອບດ້ານ.
ວັນທີ 29 ຕຸລານີ້, ທ່ານຊາງວ້ານຊວນ, ທີ່ປຶກສາແຫ່ງລັດ ທັງເປັນລັດຖະມົນຕີວ່າການກະຊວງປ້ອງກັນປະເທດຈີນກໍໄດ້ພົບປະເຈລະຈາກັບທ່ານຮິຊາມູດິນ, ລັດຖະມົນຕີປ້ອງກັນປະເທດມາເລເຊຍ.
