ກອງປະຊຸມໃຫຍ່ອົງການສະຫະປະຊາຊາດໄດ້ຮັບຮອງມະຕິເປັນເວລາ 22 ປີລຽນຕິດໂດຍ ຮຽກຮ້ອງໃຫ້ອາເມລິກາຍົກເລີກການປິດລ້ອມຕໍ່ກູບາ
ວັນທີ 29 ຕຸລານີ້, ກອງປະຊຸມໃຫຍ່ຄັ້ງທີ 68 ຂອງອົງການສະຫະປະຊາຊາດໄດ້ຜ່ານມະຕິດ້ວຍບັດເຫັນດີຫລາຍຖ້ວມທົ້ນໂດຍຮຽກຮ້ອງໃຫ້ອາເມລິກາຍົກເລີກການປິດລ້ອມດ້ານເສດຖະກິດ, ການຄ້າແລະການທະນາຄານຕໍ່ກູບາເປັນເວລາເຄິ່ງສະຕະວັດໂດຍທັນທີ່. ນີ້ແມ່ນກອງປະຊຸມໃຫຍ່ອົງການສະຫະປະຊາຊາດໄດ້ຮັບຮອງມະຕິປະເພດນີ້ຢ່າງລຽນຕິດເປັນເລລາ 22 ປີມາແລ້ວ.
ໃນມະຕິໄດ້ກ່າວວ່າ, ກອງປະຊຸມໃຫຍ່ອົງການສະຫະປະຊາຊາດໄດ້ຮຽກຮ້ອງໄປເຖິງປະເທດຕ່າງໆບໍ່ຄວນປະກາດນໍາໃຊ້ແລະປະຕິບັດກົດໝາຍແລະມາດຕະການປະເພດນີ້, ພ້ອມກັນນັ້ນ, ເຕືອນໃຫ້ປະເທດທີ່ມີແລະປະຕິບັດກົດໝາຍແລະມາດຕະການປະເພດນີ້ໃຫ້ນໍາໃຊ້ບາດກ້າວທີ່ຈໍາເປັນໂດຍອີງຕາມລະບຽບກົດໝາຍຂອງປະເທດຕົນ ເພື່ອຍົກເລີກແລະລົບລ້າງກົດໝາຍແລະມາດຕະການດັ່ງກ່າວ.
ກ່ອນຈະລົງຄະແນນສຽງ, ທ່ານຫວາງໝິນ, ຮອງຜູ້ຕາງໜ້າຖາວອນຂອງຈີນປະຈໍາອົງການສະຫະປະຊາຊາດກ່າວວ່າ, ການປິດລ້ອມດ້ານເສດຖະກິດ, ການຄ້າແລະການທະນາຄານຂອງອາເມລິກາຕໍ່ກູບາໄດ້ເປັນການລະເມີດວັດຖຸປະສົງ, ຫລັກການຂອງກົດບັດອົງການສະຫະປະຊາຊາດ ແລະມະຕິທີ່ກ່ຽວຂ້ອງຂອງກອງປະຊຸມໃຫຍ່ອົງການສະຫະປະຊາຊາດ, ໄດ້ທໍາລາຍເສດຖະກິດກູບາຢ່າງຮ້າຍແຮງ ແລະເຮັດໃຫ້ປະຊາຊົນກູບາປະສົບຄວາມຫຍຸ້ງຍາກຢ່າງຫລວງຫລາຍ. ຈີນເຕືອນໃຫ້ອາເມລິກາຢຸດຕິການປິດລ້ອມຕໍ່ກູບາໂດຍໄວ.
ນອກນີ້, ໃນກອງປະຊຸມໃຫຍ່ອົງການສະຫະປະຊາຊາດຄັ້ງນີ້, ຜູ້ຕາງໜ້າຂອງອົງການແລະປະເທດຕ່າງໆ ເຊັ່ນ "ກຸ່ມ 77 ປະເທດ+ຈີນ", ຂະບວນການບໍ່ຮ່ວມກຸ່ມ ຫລື NAM, ອົງການຮ່ວມມືອິດສະລາມ, ປະຊາຄົນປະເທດອາເມລິກາລາຕິນແລະປະເທດຂົງເຂດກາຣິບຽນແລະອື່ນໆໄດ້ປະກອບຄໍາຄິດຄໍາເຫັນ ໂດຍໄດ້ເຕືອນໃຫ້ອາເມລິກາຍຸດຕິການປິດລ້ອມຕໍ່ກູບາໂດຍທັນທີ່.
