ເຈົ້າໜ້າທີ່ຕຳຫຼວດຈີນທັບມ້າງຄະດີຫຼອນໂຈມຕີກໍ່ການຮ້າຍດ້ວຍຄວາມຮຸນແຮງຄັ້ງວັນທີ 28 ຕຸລາ
ໂຄສົກພະແນກຕຳຫຼວດນະຄອນຫຼວງປັກກິ່ງຖະແຫຼງວ່າ, ເຈົ້າໜ້າທີ່ຕຳຫຼວດໄດ້ກຳ ນົດໃນເບື້ອງຕົ້ນວ່າ, ເຫດການ "28 ຕຸລາ" ແມ່ນຄະດີຫຼອນໂຈມຕີກໍ່ການຮ້າຍດ້ວຍຄວາມຮຸນແຮງທີ່ໄດ້ວາງແຜນຢ່າງລະອຽດລ່ວງໜ້າ ແລະ ມີການຈັດຕັ້ງ. ປັດຈຸບັນ ໄດ້ເກັບກຳສະພາບທີ່ກ່ຽວຂ້ອງຂອງຜູ້ຖືກສົງໄສໃນເບື້ອງຕົ້ນ ແລະຈັບຕົວຜູ້ຖືກສົງໄສ 5 ຄົນ.
ພາຍຫຼັງເກີດເຫດການມີເຈດຕະນາຂັບລົດແລ່ນຕຳໃສ່ຄົນເຮັດໃຫ້ມີຫຼາຍຄົນເສຍຊີວິດແລະບາດເຈັບໃນວັນທີ 28 ຕຸລານີ້, ເຈົ້າໜ້າທີ່ຕຳຫຼວດນະຄອນຫຼວງປັກກິ່ງໄດ້ດຳເນີນການເຄື່ອນໄຫວຢ່າງວ່ອງໄວ, ໂດຍໄດ້ປະສານງານກັບອົງການຕຳຫຼວດທ້ອງຖິ່ນຫຼາຍແຫ່ງເພື່ອສືບ ສວນ-ສອບສວນເຫດການຢ່າງເລິກເຊິ່ງ ແລະ ໄດ້ສືບຮູ້ວ່າ: ເວລາ 12 ໂມງປາຍຂອງວັນທີ 28 ຕຸລານີ້, ຜູ້ຖືກສົງໄສ 3 ຄົນໄດ້ຂັບລົດຈິບປ້າຍທະບຽນເຂດຊິນຈ່ຽງຄັນໜຶ່ງແລ່ນຜ່າເຂົ້າຖະໜົນສາງອານດ້ວຍຄວາມໄວສູງ ແລະ ມີເຈດຕະນາແລ່ນຕຳໃສ່ນັກທ່ອງທ່ຽວຢູ່ແຄມທາງ, ເຮັດໃຫ້ມີ 2 ຄົນເສຍຊີວິດ, 40 ຄົນບາດເຈັບ. ຕໍ່ມາ, ຜູ້ຖືກສົງໄສໄດ້ຂັບລົດຕຳໃສ່ຮາວຂົວຈິ່ນສູຍ, ແລະຈູດນ້ຳມັນແອັດຊັງທີ່ວາງໄວ້ໃນລົດ ເຮັດໃຫ້ລົດຈິບຄັນນັ້ນລຸກໄໝ້, ຜູ້ຖືກສົງໄສ 3 ຄົນໃນລົດເສຍຊີວິດຄາທີ່. ພາຍຫຼັງເກີດເຫດການດັ່ງກ່າວແລ້ວ, ເຈົ້າໜ້າທີ່ຕຳຫຼວດໄດ້ຄົ້ນພົບນ້ຳມັນແອັດຊັງໃນລົດແລະເຄື່ອງອຸປະກອນໃສ່ນ້ຳມັນແອັດຊັງ, ພ້າສອງດວງ, ທ່ອນເຫຼັກ, ແລະທຸງທີ່ພິມເນື້ອໃນກ່ຽວກັບສາສະໜາຫົວຮຸນແຮງນຳອີກ.
ພາຍໃຕ້ການປະສານສົມທົບຢ່າງແຂງແຮງຈາກອົງການຕຳຫຼວດເຂດຊິ່ນຈ່ຽງແລະທ້ອງຖິ່ນອື່ນໆ, ເຈົ້າໜ້າທີ່ຕຳຫຼວດນະຄອນຫຼວງປັກກິ່ງໄດ້ຈັບຜູ້ຖືກສົງໄສອີກ 5 ຄົນ. ປັດຈຸບັນ, ເຈົ້າໜ້າທີ່ຕຳຫຼວດກຳລັງດຳເນີນການສືບາວນ-ສອບສວນໃນຄະດີດັ່ງກ່າວຢູ່.
