ສື່ມວນຊົນເຢຍລະມັນລາຍງານວ່າ 5 ນະຄອນຂອງຈີນກໍຖືກອາເມລິກາຕິດຕາມລັກຟັງເຊັ່ນກັນ
ວັນທີ 28 ຕຸລານີ້, Spiegel Online TV ຂອງເຢຍລະມັນໄດ້ເຜີຍແຜ່ວີດີໂອກ່ຽວກັບສະຖານທູດອາເມລິກາປະຈໍາເຢຍລະມັນຊ່ວຍກົມປ້ອງກັນຄວາມປອດໄພແຫ່ງຊາດອາເມລິກາຕິດຕາມລັກຟັງລະບົບການສື່ສານຂອງລັດຖະບານເຢຍລະມັນ, ໃນວີດີໂອໄດ້ແຕ້ມແຜນທີ່ນະຄອນທີ່ຖືກອາເມລິກາຕິດຕາມລັກຟັງໃນທົ່ວໂລກໂດຍອີງຕາມຂໍ້ມູນລັບຂອງວາລະສານ Der Spiegel ຂອງເຢຍລະມັນໃຫ້ຮູ້ວ່າ ນະຄອນຫລວງປັກກິ່ງ, ນະຄອນຊຽງໄຮ້, ເສີງຕູ່, ຖາຍເປ ແລະຮົງກົງລ້ວນແຕ່ຢູ່ໃນບັນຊີລາຍຊື່ຂອງການຕິດຕາມລັກຟັງ.
ນອກຈາກຈີນແລ້ວ, ຢູ່ພາກພື້ນອາຊີຕາເວັນອອກ, ມີແຕ່ຍີ່ປຸ່ນ, ສ.ເກົາຫລີທີ່ເປັນພັນທະມິດຂອງອາເມລິກາ ແລະສິງກະໂປ, ບຼູໄນ, ມົງໂກລີ ແລະອື່ນໆ ບໍ່ຢູ່ໃນບັນຊີລາຍຊື່ທີ່ຖືກຕິດຕາມລັກຟັງ. ພາກພື້ນເອີຣົບກໍມີຫລາຍແຫ່ງຖືກຕິດຕາມລັກຟັງເຊັ່ນກັນ, ບໍ່ພຽງແຕ່ປະເທດເອີຣົບຕາເວັນອອກເຊັ່ນລັດເຊຍ, ເຊັກທີ່ຢູ່ບັນຊີລາຍຊື່ຕິດຕາມລັກຟັງເທົ່ານັ້ນ, ເຢຍລະມັນ, ຝຣັ່ງ, ອີຕາລີ ແລະປະເທດອື່ນໆກໍ່ຖືກອາເມລິກາຕິດຕາມລັກຟັງນໍາອີກໂດຍບໍ່ໄດ້ຖືກຍົກເວັ້ນ ຍ້ອນເປັນປະເທດສະມາຊິກຂອງອົງການສົນທິສັນຍາປ້ອງກັນອັດລັງຕິກເໜືອ ຫລື ນາໂຕ, ມີແຕ່ອັງກິດທີ່ເປັນພັນທະມິດແທ້ຈິງຂອງອາເມລິກາແລະປະເທດເອີຣົບເໜືອທີ່ບໍ່ມີອິດທິພົນສາກົນປານໃດຈຶ່ງບໍ່ຖືກຕິດຕາມລັກຟັງ.
ປັດຈຸບັນນີ້, ເຫດການທີ່ອາເມລິກາຕິດຕາມລັກຟັງໄດ້ເຮັດໃຫ້ປະເທດເອີຣົບສ່ວນຫລາຍເກີດຄວາມບໍ່ພໍໃຈຫລາຍຂຶ້ນ, ຍິ່ງໄປກວ່ານັ້ນ, ເຢຍລະມັນໄດ້ສົ່ງຄະນະຜູ້ແທນໄປອາເມລິກາເພື່ອໃຫ້ອາເມລິກາອະທິບາຍເລື່ອງນີ້, ສ່ວນທ່ານນາງເມີເຄວແລະຜູ້ນໍາອື່ນໆມີຈຸດຢືນທີ່ຈະເຊັນສັນຍາຫລີກເວັ້ນການຕິດຕາມລັກຟັງກັບອາເມລິກາໂດຍທັນທີ່.
