ມາເລເຊຍແລະອິນໂດເນເຊຍປະທ້ວງການຕິດຕາມລັກຟັງຂອງອາເມລິກາຢ່າງຮຸນແຮງ
ໜັງສືພິມ "ຫລຽນເຫີຈາວປ້າວ" ຂອງສິງກະໂປລາຍງານວ່າ, ເມື່ອບໍ່ດົນມານີ້, ລັດຖະບານມາເລເຊຍແລະອິນໂດເນເຊຍຮູ້ສຶກຕື່ນຕົກໃຈແລະບໍ່ພໍໃຈຕໍ່ຂ່າວທີ່ວ່າອາເມລິກາໄດ້ຕິດຕັ້ງອຸປະກອນຕິດຕາມລັກຟັງຢູ່ສະຖານທູດອາເມລິກາປະຈໍານະຄອນຫລວງກົວລາລໍາເປີຂອງມາເລເຊຍແລະນະຄອນຫລວງຈາກາຕາຂອງອິນໂດເນເຊຍເພື່ອທໍາການສອດແນມ ແລະໄດ້ທໍາການປະທ້ວງຢ່າງຮຸນແຮງ.
ວາລະສານ Der Spiegel ຂອງເຢຍລະມັນລາຍງານວ່າ, ທ້າວເອັດວາດ ສະໂນເດັນ, ອະດີດພະນັກງານສັນຍາຈ້າງຂອງກົມຂ່າວລັບສູນກາງອາເມລິກາ ຫລື CIA ເປີດເຜີຍຂ່າວລັບອີກຄັ້ງໜຶ່ງໂດຍໄດ້ຊີ້ອອກວ່າ, ໃນການເຄື່ອນໄຫວຕໍ່ຕ້ານການກໍ່ການຮ້າຍ, ອາເມລິກາໄດ້ລັກຟັງລະບົບການສື່ສານແລະລະບົບໂທລະສັບ ໂດຍຜ່ານອຸປະກອນຕິດຕາມລັກຟັງທີ່ຕິດຕັ້ງຢູ່ສະຖານທູດອາເມລິກາປະຈໍາອາຊີຕາເວັນອອກ ແລະອາຊີຕາເວັນອອກສຽງໃຕ້.
ທ່ານອິສເມນ ສະບຼີ ຢາກອບ, ລັດຖະມົນຕີວ່າການກະຊວງກະສິກໍາແລະອິດສາຫະກໍາກະສິກໍາພື້ນຖານມາເລເຊຍໄດ້ກ່າວປະນາມວ່າການກະທໍາຂອງອາເມລິກາເປັນ "ການກະທໍາທີ່ໄຮ້ສິນທໍາ". ທ່ານກ່າວວ່າ, ລັດຖະບານມາເລເຊຍຄວນສະແດງການປະທ້ວງຕໍ່ອາເມລິກາໂດຍທັນທີ່ ແລະກ່າວປະນາມການກະທໍາຂອງລັດຖະບານອາເມລິກາ. ວັນທີ 30 ຕຸລານີ້, ທ່ານມາຕີ ແອມ. ນາຕາເລກາວາ, ລັດຖະມົນຕີວ່າການກະຊວງການຕ່າງປະເທດອິນໂດເນເຊຍໄດ້ສະແດງການປະທ້ວງຢ່າງຮຸນແຮງຕໍ່ອາເມລິກາ ໂດຍໄດ້ຕໍ່ວ່າທັກທ້ວງຕໍ່ອຸປະທູດສະຖານທູດອາເມລິກາປະຈໍາອິນໂດເນເຊຍຕໍ່ເລື່ອງນີ້. ທ່ານກ່າວວ່າ, ອິນໂດເນເຊຍບໍ່ສາມາດຍອມຮັບຂ່າວທີ່ແຈ້ງວ່າສະຖານທູດອາເມລິກາປະຈໍາອິນໂດເນໄດ້ຕິດຕັ້ງອຸປະກອນຕິດຕາມລັກຟັງດັ່ງກ່າວນີ້.
