ສື່ມວນຊົນອາເມລິກາເປີດເຜີຍວ່າກົມຮັກສາຄວາມປອດໄພແຫ່ງຊາດອາເມລິກາໄດ້ລັກເຈາະເຂົ້າສູນຂໍ້ມູນຂອງ Yahoo ແລະ Google ຢ່າງລັບໆ
ວັນທີ 30 ຕຸລານີ້, ໜັງສືພິມ Washington Post ຂອງອາເມລິກາໄດ້ລາຍງານໂດຍອ້າງອີງເອກະສານລັບທີ່ເປີດເຜີຍໂດຍທ້າວເອັດວາດ ສະໂນເດັນ ວ່າ, ກົມຮັກສາຄວາມປອດໄພແຫ່ງຊາດອາເມລິກາ ຫລື NSA ໄດ້ລັກເຈາະເຂົ້າສູນຂໍ້ມູນຂອງ Yahoo ແລະ Google ທີ່ເປັນບໍລິສັດອິນເຕີເນັດຂອງອາເມລິກາເພື່ອລັກເອົາຂໍ້ມູນໂດຍຜ່ານໂຄງການຕິດຕາມຂ່າວລັບອີກຊະນິດໜຶ່ງທີ່ບໍ່ແມ່ນໂຄງການປຣິຊຶມ.
ນອກຈາກນີ້, ໃນຫລາຍມື້ມານີ້, ເລື່ອງອັບອາຍຂາຍໜ້າທີ່ກ່ຽວຂ້ອງກັບອາເມລິກາຕິດຕາມລັກຟັງຜູ້ນໍາແລະປະຊາຊົນຂອງປະເທດພັນທະມິດໄດ້ນັບມື້ນັບຮ້າຍແຮງຂຶ້ນ. ວັນທີ 29 ຕຸລານີ້, ທ່ານນາງດຽນເນ ເຟັນສເຕັນ, ປະທານຄະນະກໍາມະການຂ່າວລັບສະພາສູງອາເມລິກາກ່າວວ່າ, ທໍານຽບຂາວໄດ້ໃຫ້ຄໍາໝັ້ນສັນຍາວ່າຈະບໍ່ຕິດຕາມລັກຟັງປະເທດພັນທະມິດອີກ. ຕໍ່ເລື່ອງນີ້, ວາລະສານ Foreign Policy ຂອງອາເມລິກາເຜີຍແຜ່ບົດຄວາມວ່າ, ທໍານຽບຂາວໄດ້ມີທ່າທີທີ່ແຕກຕ່າງກັນຢ່າງເດັ່ນຊັດໃນການປະຕິບັດຕໍ່ປະເທດພັນທະມິດແລະປະເທດທີ່ບໍ່ແມ່ນພັນທະມິດໃນການແກ້ໄຂບັນຫາເລື່ອງອັບອາຍຂາຍໜ້າໂຄງການປຣິຊຶມຂອງຕົນ. ຕໍ່ປະເທດທີ່ບໍ່ແມ່ນພັນທະມິດເຊັ່ນເບຼຊິນ, ແມັກຊິກ, ລັດເຊຍ, ອີຣານ ແລະອື່ນໆ, ລັດຖະບານອາເມລິກາ "ຄົງຈະຫລຸດພົ້ນອອກຈາກຄວາມຫຍຸ້ງຍາກງ່າຍກວ່າ ", ແຕ່ຕໍ່ເຢຍລະມັນທີ່ເປັນປະເທດພັນທະມິດທີ່ສໍາຄັນ, ອາເມລິກາໄດ້ມີທ່າທີກົງກັນຂ້າມ. ມີຊ່ຽວຊານໄດ້ກ່າວວ່າ, ຄວາມໜ້າເຊື່ອຖືຂອງອາເມລິກາກໍາລັງປະເຊີນໜ້າກັບວິກິດການທີ່ບໍ່ເຄີຍມີມາກ່ອນ.
