ກະຊວງການຕ່າງປະເທດຈີນກ່າວວ່າ ຄັດຄ້ານການໃຊ້ "ສອງມາດຕະຖານ" ໃນການຕໍ່ຕ້ານລັດທິກໍ່ການຮ້າຍ
ວັນທີ 31 ຕຸລາຜ່ານມານີ້, ທ່ານນາງຮົ໋ວຊຸ່ນຢິງ, ໂຄສົກກະຊວງການຕ່າງປະເທດຈີນກ່າວຢູ່ທີ່ນະຄອນຫຼວງປັກກິ່ງວ່າ: ຈີນຄັດຄ້ານການໃຊ້ "ສອງມາດຕະຖານ" ໃນການຕໍ່ຕ້ານລັດທິກໍ່ການຮ້າຍ, ຫວັງວ່າປະຊາຄົມໂລກແລະຝ່າຍຕ່າງໆທີ່ກ່ຽວຂ້ອງຈະສາມາດຮັບຮູ້ຕໍ່ການເຄື່ອນໄຫວກໍ່ການຮ້າຍຢ່າງຈະແຈ້ງ.
ຂ່າວແຈ້ງວ່າ, "ກອງປະຊຸມຜູ້ແທນອຸຍເກີໂລກ" ມີຄວາມສົງໄສຕໍ່ການແກ້ໄຂເຫດການຂອງຈີນໃນເຫດການ "28 ຕຸລາ", ໂດຍໄດ້ມີການຮຽກຮ້ອງໃຫ້ດຳເນີນການກວດກາຢ່າງເປັນອິດສະຫຼະຕໍ່ເຫດການດັ່ງກ່າວ, ແລະໄດ້ຕຳນິນະໂຍບາຍທາງຊົນເຜົ່າແລະສາສະໜາຂອງລັດຖະບານຈີນ.
ຕໍ່ເລື່ອງນີ້, ທ່ານນາງຮົ໋ວຊຸ່ນຢິງ ໄດ້ຕອບໂຕ້ວ່າ: ພະແນກຕຳຫຼວດນະຄອນຫຼວງປັກກິ່ງໄດ້ປະກາດຜົນການສືບສວນ-ສອບສວນເບື້ອງຕົ້ນກ່ຽວກັບເຫດການ "28 ຕຸລາ" ຢ່າງລະອຽດແລ້ວ. ເຈົ້າໜ້າທີ່ຕຳຫຼວດໄດ້ກຳນົດໃນເບື້ອງຕົ້ນວ່າ, ນີ້ແມ່ນເຫດການຫຼອນໂຈມຕີກໍ່ການຮ້າຍດ້ວຍຄວາມຮຸນແຮງ ໂດຍໄດ້ວາງແຜນໄວ້ລ່ວງໜ້າແລະມີການຈັດຕັ້ງ. ການຫຼອນໂຈມຕີກໍ່ການຮ້າຍດ້ວຍຄວາມຮຸນແຮງຕໍ່ປະຊາຊົນແລະນັກທ່ອງທ່ຽວຜູ້ບໍລິສຸດຄືແນວນີ້ ແມ່ນການກະທຳແບບຕ້ານກັບມະນຸດ, ຕ້ານກັບສັງຄົມ ແລະ ຕ້ານກັບອາລິຍະທຳ, ບໍ່ວ່າຜູ້ໃດກໍ່ຕາມຫາກແມ່ນຄົນບໍລິສຸດ ກໍລ້ວນແຕ່ຈະກ່າວປະນາມຢ່າງຮຸນແຮງຕໍ່ການກະທຳຄືແນວນີ້.
ກ່ຽວກັບຫຼັກໝັ້ນຂອງລັດຖະບານຈີນ, ທ່ານຮົ໋ວຊຸ່ນຢິງ ກ່າວວ່າ: ແຕ່ໃດມາ, ລັດຖະບານຈີນກໍຍຶດຖືຫຼັກໝັ້ນທີ່ຕໍ່ຕ້ານຢ່າງເດັດດ່ຽວແລະໂຈມຕີຢ່າງເຂັ້ມງວດຕໍ່ລັດທິກໍ່ການຮ້າຍ . ພວກຂ້າພະເຈົ້າຄັດຄ້ານການໃຊ້ "ສອງມາດຕະຖານ" ໃນບັນຫາຕໍ່ຕ້ານລັດທິກໍ່ການຮ້າຍ, ຄັດຄ້ານການຖືເອົາລັດທິກໍ່ການຮ້າຍໄປຕິດພັນກັບປະເທດໃດໜຶ່ງ, ຊົນເຜົ່າໃດໜຶ່ງ ແລະສາສະໜາໃດໜຶ່ງ ໂດຍໄດ້ກຳນົດເອົາໄວ້ເປັນພິເສດ. ຄົນຈຳນວນໜ້ອຍທີ່ສຸດໄດ້ຖືການກະທຳກໍ່ການຮ້າຍດ້ວຍຄວາມຮຸນແຮງຂອງພວກກໍ່ການຮ້າຍຈຳນວນໜ້ອຍໄປຕິດພັນກັບບັນຫາຊົນເຜົ່າ ແລະ ສາສະໜາຂອງຈີນ, ຈົນກະທັ້ງຖືເປັນຂໍ້ອ້າງເພື່ອກ່າວໂຈມຕີນະໂຍບາຍຊົນເຜົ່າແລະສາສະໜາຂອງຈີນ, ນີ້ແມ່ນການກະທຳທີ່ຜິດພາດທີ່ສຸດ, ກໍແມ່ນການກະທຳທີ່ມີຈຸດປະສົງທີ່ແອບແຝງຕ່າງຫາກ.
ທ່ານນາງຮົ໋ວຊຸ່ນຢິງ ກ່າວເນັ້ນວ່າ: ເພື່ອບັນລຸຈຸດປະສົງແບ່ງແຍກຈີນ ແລະ ສ້າງຕັ້ງ "ປະເທດຕວກກີສະຖານຕາເວັນອອກ" ຢູ່ເຂດຊິ່ນຈ່ຽງຂອງຈີນ, ອິດທິກຳລັງກໍ່ການຮ້າຍ "ຕວກກີສະຖານຕາເວັນອອກ"ໄດ້ດຳເນີນການເຄື່ອນໄຫວແບ່ງແຍກມາເປັນໄລຍະຍາວນານແລ້ວ, ໂດຍໄດ້ມີການສົມຮູ້ຮ່ວມຄິດກັບອິດທິກຳລັງກໍ່ການຮ້າຍສາກົນ ເພື່ອຢາກດຳເນີນການເຄື່ອນໄຫວກໍ່ການຮ້າຍດ້ວຍຄວາມຮຸນແຮງຢູ່ຈີນ, ໂດຍມີເຈດຕະນາຢາກທຳລາຍການພັດທະນາແລະຄວາມສະຫງົບຂອງຈີນ. ຈີນຫວັງວ່າປະຊາຄົມໂລກແລະຝ່າຍຕ່າງໆທີ່ກ່ຽວຂ້ອງຈະສາມາດຮັບຮູ້ຕໍ່ເລື່ອງນີ້ຢ່າງຈະແຈ້ງ, ກໍຫວັງວ່າສື່ມວນຊົນຈະສາມາດຮັບຮູ້ເລື່ອງຄວາມເປັນຈິງແລະລັກສະນະທາດແທ້ທີ່ກ່ຽວຂ້ອງຢ່າງພາວະວິໄສ, ມີຄວາມທຸ່ນທ່ຽງ ແລະ ຮອບດ້ານ ໃນເວລາລາຍງານແລະວິຈານເຫດການທີ່ກ່ຽວຂ້ອງ.
