ກະຊວງປ້ອງກັນປະເທດຈີນກ່າວວ່າ ຍີ່ປຸ່ນຄວນຊອກຮູ້ແລະຍອມຮັບກິດຈະກໍາທາງການທະຫານຂອງປະເທດອື່ນໆທີ່ເໝາະສົມແລະຊອບກົດໝາຍ
ວັນທີ 31 ຕຸລາແລ້ວນີ້, ທ່ານຢາງຢູຈູ່ນ, ໂຄສົກກະຊວງປ້ອງກັນປະເທດຈີນໄດ້ເຕືອນໃຫ້ຝ່າຍຍີ່ປຸ່ນປ່ຽນຈິດໃຈທີ່ບໍ່ຖືກຕ້ອງ, ຕັ້ງຕົນເອງໃຫ້ຖືກທີ່ຖືກທາງ, ຊິນເຄີຍແລະຍອມຮັບກິດຈະກໍາທາງການທະຫານທີ່ສົມເຫດສົມຜົນແລະຊອບດ້ວຍກົດໝາຍຂອງປະເທດອື່ນ.
ໃນກອງປະຊຸມຂ່າວໃນມື້ດຽວກັນ, ມີນັກຂ່າວຖາມວ່າ, ວັນທີ 29 ຕຸລາແລ້ວນີ້, ທ່ານອິສຸໂນຣີ ໂອໂນເດຣາ, ລັດຖະມົນຕີວ່າການກະຊວງປ້ອງກັນປະເທດຍີ່ປຸ່ນໄດ້ກ່າວວ່າ, ການກະທໍາຂອງຈີນທີ່ແຊກແຊງ "ໝູ່ເກາະເຊັນກາກູ "（ໄດ້ແກ່ເກາະຕ້ຽວຢູຂອງຈີນແລະເກາະທີ່ຂຶ້ນກັບເກາະນີ້）ໄດ້ "ເປັນການຂົ່ມຂູ່ຕໍ່ສັນຕິພາບ", ລັດຖະບານຍີ່ປຸ່ນຈະປຶກສາຫາລືການດັດແກ້ກົດໝາຍວ່າດ້ວຍການຮັບປະກັນຄວາມປອດໄພພາຍໃນປີນີ້ ເພື່ອຮັບມືກັບບັນຫານີ້. ຂໍຖາມເຈົ້າໜ້າທີ່ທະຫານຂອງຈີນວ່າໄດ້ມີການຕີລາຄາແນວໃດຕໍ່ເລື່ອງນີ້?
ທ່ານຢາງຢູຈູ່ນຕອບວ່າ, ເກາະຕ້ຽວຢູເປັນດິນແດນຂອງຈີນ. ຜູ້ທີ່ເປັນການຂົ່ມຂູ່ໃຫ້ແກ່ສັນຕິພາບກໍແມ່ນຝ່າຍຍີ່ປຸ່ນເອງ.
ທ່ານກ່າວຕື່ມວ່າ, "ໃນປະຫວັດສາດ, ຍີ່ປຸ່ນເຄີຍປັ້ນແຕ່ງຄວາມຂີ້ຕົວະເພື່ອພັດທະນາກໍາລັງທະຫານຂອງຕົນ, ຍິ່ງໄປກວ່ານັ້ນ, ກໍເຄີຍກໍ່ສົງຄາມຮຸກຮານຕໍ່ປະເທດອື່ນ, ແຕ່ມາຮອດປັດຈຸບັນ, ຍັງບໍ່ໄດ້ສໍານຶກຄືນຕົນເອງຢ່າງເລິກເຊິ່ງ. ປະເທດອ້ອມຂ້າງແລະປະຊາຄົມໂລກຄວນມີຄວາມລະວັງເປັນຢ່າງສູງຕໍ່ການກະທໍາຂອງຍີ່ປຸ່ນ".
