ກະຊວງປ້ອງກັນປະເທດຈີນກ່າວວ່າ ການເປີດເຜີຍສະພາບຂອງກອງທັບເຮືອດໍານໍ້ານິວເຄຼຍບໍ່ກ່ຽວພັນກັບສະຖານະການຂອງພາກພື້ນໃນປັດຈຸບັນ
ວັນທີ 31 ຕຸລາແລ້ວນີ້, ທ່ານຢາງຢູຈູ່ນ, ໂຄສົກກະຊວງປ້ອງກັນປະເທດຈີນກ່າວຢູ່ປັກກິ່ງວ່າ, ເມື່ອບໍ່ດົນມານີ້, ເຈົ້າໜ້າທີ່ທະຫານຂອງຈີນໄດ້ເປີດເຜີຍສະພາບຈໍານວນໜຶ່ງຂອງກອງທັບເຮືອດໍານໍ້ານິວເຄຼຍ, ນີ້ບໍ່ກ່ຽວພັນກັບສະຖານະການຂອງພາກພື້ນໃນປັດຈຸບັນ.
ທ່ານຢາງຢູຈູ່ນກ່າວວ່າ, "ເມື່ອບໍ່ດົນມານີ້, ພວກຂ້າພະເຈົ້າໄດ້ເປີດເຜີຍສະພາບຈໍານວນໜຶ່ງຂອງກອງທັບເຮືອດໍານໍ້ານິວເຄຼຍ ເພື່ອເຮັດໃຫ້ປະຊາຊົນພາຍໃນປະເທດແລະປະຊາຄົມໂລກມີຄວາມເຂົ້າໃຈຫລາຍກວ່າເກົ່າຕໍ່ກອງທັບເຮືອດໍານໍ້ານິວເຄຼຍຂອງຈີນ".
ທ່ານຢາງຢູຈູ່ນກ່າວຕື່ມວ່າ, ຄຽງຄູ່ກັບການພັດທະນາຂອງເຕັກນິກວິທະຍາສາດ, ຝ່າຍຈີນຈະຄົ້ນຄວ້າແລະພັດທະນາອາວຸດຍຸດໂທປະກອນທີ່ລວມທັງເຮືອດໍານໍ້ານິວເຄຼຍ ໂດຍອີງຕາມຄວາມຕ້ອງການຂອງການຮັກສາຄວາມປອດໄພແຫ່ງຊາດ.
ໃນເວລາຕອບຄໍາຖາມທີ່ວ່າເຈົ້າໜ້າທີ່ທະຫານຂອງຈີນຖືກອົງການຂ່າວລັບຂອງອາເມລິກາຕິດຕາມລັກຟັງຫລືບໍ່, ທ່ານຢາງຢູຈູ່ນຕອບວ່າ, ອາເມລິກາໄດ້ຕິດຕາມລັກຟັງບາງປະເທດພັນທະມິດ, "ສະນັ້ນ, ສໍາລັບປະເທດທີ່ບໍ່ແມ່ນພັນທະມິດຄືຈີນຈະເປັນແນວໃດ, ບັນດາທ່ານຈະສາມາດຄິດອອກໄດ້ຢ່າງງ່າຍດາຍ".
ທ່ານກ່າວຕື່ມວ່າ, ກອງທັບຈີນມີລະບຽບແບບແຜນແລະລະບົບທີ່ເຂັ້ມງວດໃນດ້ານການຮັກສາຄວາມປອດໄພຂອງຂໍ້ມູນ, "ສະພາບທີ່ຖືກພາຍນອກຕິດຕາມລັກຟັງກໍເຮັດໃຫ້ພວກຂ້າພະເຈົ້າເພີ່ມຄວາມລະມັດລະວັງແລະສືບຕໍ່ເພີ່ມທະວີວຽກງານດ້ານຄວາມປອດໄພຂອງຂໍ້ມູນຂຶ້ນເຕີ່ມອີກ".
