ຂະແໜງການບໍລິການເປັນຈຸດຄໍ້າໃໝ່ຂອງການເຕີບໂຕຂອງເສດຖະກິດອາຊຽນ
ຕາມສະຖິຕິຫລ້າສຸດທີ່ກອງເລຂາອາຊຽນເປີດເຜີຍໃນອາທິດແລ້ວນີ້, ປີ 2012, ຂະແໜງການບໍລິການມີອັດຕາປະກອບສ່ວນສູງສຸດຕໍ່ການເຕີບໂຕຂອງຍອດມູນຄ່າຜະລິດຕະພັນພາຍໃນ ຫລື GDP ຂອງ 10 ປະເທດອາຊຽນ, ອຸດສາຫະກໍາແມ່ນຢູ່ອັນດັບທີ 2, ສ່ວນອັດຕາປະກອບສ່ວນຂອງກະສິກໍາຕໍ່ GDP ແມ່ນນັບມື້ນັບຫລຸດໜ້ອຍລົງໃນ 7 ປີທີ່ຜ່ານມາ. ໃນ 10 ປະເທດອາຊຽນ, ຂະແໜງການບໍລິການຂອງຟິລິບປິນມີອັດຕາປະກອບສ່ວນສູງສຸດຕໍ່ GDP, ບັນລຸເຖິງ 56,9%, ກໍາປູເຈຍຕໍ່າສຸດ, ກໍມີ 38,4%. ອັດຕາປະກອບສ່ວນຂອງຂະແໜງການບໍລິການໄດ້ເພີ່ມຂຶ້ນຢ່າງຕໍ່ເນື່ອງ ແລະກາຍເປັນປັດໄຈຕົ້ນຕໍໃນການຊຸກຍູ້ການເຕີບໂຕຂອງເສດຖະກິດອາຊຽນ. ໃນອົງກອນເສດຖະກິດອາຊຽນສ່ວນຫລາຍ, ອັດຕາປະກອບສ່ວນຂອງຂະແໜງການບໍລິການແລະອຸດສາຫະກໍາໄດ້ເກີນ 80%.
ທ່ານໄຮມີ ອີຣີສ, ຜູ້ອໍານວຍການການຄົ້ນຄວ້າເສດຖະກິດພາກພື້ນທະນາຄານມາລາຢູຂອງມາເລເຊຍກ່າວວ່າ, ຫລາຍປີມານີ້, ຄຽງຄູ່ກັບການເພີ່ມທະວີຂອງມາດຕາສ່ວນຂອງ ຂະແໜງການບໍລິການຂອງເສດຖະກິດມາເລເຊຍ, ລັດຖະບານມາເລເຊຍໄດ້ຜ່ອນຄາຍຄວາມຈໍາກັດຕໍ່ການລົງທຶນຕ່າງປະເທດໃນຂະແໜງການຕ່າງໆ ເຊັ່ນໂທລະຄົມ, ອາຊີວະສຶກສາລະດັບກາງ, ການຝຶກອົບຮົມເຕັກນິກ, ການບັນຊີ, ວຽກງານພາສີອາກອນ ແລະອື່ນໆ, ອະນຸຍາດໃຫ້ທຶນຕ່າງປະເທດມີຫຸ້ນສ່ວນ 100%. ນອກນີ້, ມາດຕະການສົ່ງເສີມການສ້າງລາຍຮັບດ້ານພາສີອາກອນກໍໄດ້ຄ່ອຍໃຫ້ສິດທິພິເສດຫລາຍກວ່າເກົ່າແກ່ຂະແໜງການບໍລິການ
ຄຽງຄູ່ກັບການພັດທະນາຂອງເສດຖະກິດຂອງປະເທດຕ່າງໆໃນອາຊຽນ, ຂະແໜງການບໍລິການນັບມື້ນັບສໍາຄັນຂຶ້ນກວ່າເກົ່າ, ໄດ້ກາຍເປັນພາກສ່ວນທີ່ໃຫຍ່ຂອງ GDP. ປະເທດອາຊຽນທີ່ມີລາຍໄດ້ອ່າວສູງເຊັ່ນສິງກະໂປ, ມາເລເຊຍ ແລະອື່ນໆກໍາລັງທໍາຄວາມພະຍາຍາມເພື່ອພັດທະນາຂະແໜງການບໍລິການລະດັບສູງ. ເຊັ່ນ ມາເລເຊຍມີທ່າແຮງແຂ່ງຂັນໃນດ້ານການບໍລິການດ້ານການທະນາຄານ, ການບັນຊີ, ທີ່ປຶກສາ, ວິສະວະກໍາ ແລະອື່ນ, ໃນອະນາຄົດຈະດໍາເນີນການປະຕິຮູບດ້ານຂະແໜງການບໍລິການຈໍານວນໜຶ່ງ, ຊຸກຍູ້ການພັດທະນາຂອງຂະແໜງການຕ່າງໆ ເຊັ່ນການບໍລິການດ້ານທີ່ປຶກສາດ້ານກົດໝາຍ, ການບໍລິການດ້ານການກໍ່ສ້າງ, ການບໍລິການດ້ານວິສະວະກໍາ ແລະອື່ນໆ.
ສະຖິຕິຊີ້ໃຫ້ເຫັນວ່າ, ເຖິງແມ່ນວ່າການເຕີຍໂຕຂອງເສດຖະກິດຂອງປະເທດອາຊຽນສ່ວນຫລາຍໃນປີ 2009 ໄດ້ຊ້າລົງຍ້ອນໄດ້ຮັບຜົນສະທ້ອນວິກິດການດ້ານການເງິນກໍຕາມ, ແຕ່ເບິ່ງລວມແລ້ວ, ໃນປີ 2005 ຫາປີ 2010, GDP ຂອງ 10 ປະເທດອາຊຽນໄດ້ຮັກສາທ່າອ່ຽງທີ່ເພີ່ມຂຶ້ນ.
