ຂ່າວທີ່ວ່າສະຖານທູດອາເມລິກາຕິດຕາມລັກຟັງເຈົ້າໜ້າທີ່ຊັ້ນສູງຂອງອິນໂດເນເຊຍໄດ້ເກີດກະແສຕໍ່ຕ້ານຢ່າງຮຸນແຮງຢູ່ອິນໂດເນເຊຍ
ວັນທີ 29 ຕຸລາແລ້ວນີ້, ໜັງສືພິມ the Sydney Morning Herald ລາຍງານວ່າ,ອາເມລິກາໄດ້ລັກຟັງໂທລະສັບແລະຕິດຕາມ ລະບົບສື່ສານໂດຍນໍາໃຊ້ອຸປະກອນຕິດຕາມທີ່ຕິດຕັ້ງຢູ່ສະຖານທູດອາເມລິກາປະຈໍາອິນໂດເນເຊຍ, ຜູ້ທີ່ຖືກຕິດຕາມລັກຟັງລວມມີ ທ່ານສຸສິໂລ ບໍາບັງ, ປະທານາທິບໍດີອິນໂດເນເຊຍແລະເຈົ້າໜ້າທີ່ຊັ້ນສູງຄົນອື່ນໆ. ປັດຈຸບັນນີ້, ອາເມລິກາຍັງບໍ່ທັນມີປະຕິກິລິຍາຕອບໂຕ້ຕໍ່ບົດລາຍງານນີ້ເທື່ອ. ບົດລາຍງານນີ້ໄດ້ເກີດກະແສຕໍ່ຕ້ານຢ່າງຮຸນແຮງຢູ່ອິນໂດເນເຊຍ, ສື່ມວນຊົນຫລາຍແຫ່ງ, ເຈົ້າໜ້າທີ່ແລະນັກວິຊາການຫລາຍທ່ານຂອງອິນໂດເນເຊຍລ້ວນແຕ່ໄດ້ກ່າວປະນາມເລື່ອງນີ້ຢ່າງຮຸນແຮງ ໂດຍໄດ້ຮຽກຮ້ອງໃຫ້ລັດຖະບານຈົ່ງໃຊ້ທ່າທີທີ່ແຂງແຮງເພື່ອກ່າວປະນາມອາເມລິກາແລະໃຫ້ອາເມລິກາເປັນຜູ້ຮັບຜິດຊອບ ຍິ່ງໄປກວ່ານັ້ນ, ກໍຮຽກຮ້ອງໃຫ້ສົ່ງເຈົ້າໜ້າທີ່ການທູດອາເມລິກາທີ່ກ່ຽວຂ້ອງກັບຄືນປະເທດແລະຮຽກເຈົ້າໜ້າທີ່ການທູດອິນໂດເນເຊຍປະຈໍາອາເມລິກາກັບຄືນປະເທດ.
ຕໍ່ເລື່ອງນີ້, ວັນທີ 30 ຕຸລາແລ້ວນີ້, ທ່ານມາຕີ ນາຕາເລກາວາ, ລັດຖະມົນຕີວ່າການກະຊວງການຕ່າງປະເທດອິນໂດເນເຊຍໄດ້ຮຽກທ່ານໂບ, ອຸປະທູດສະຖານທູດອາເມລິກາປະຈໍາອິນໂດເນເຊຍເຂົ້າພົບ ໂດຍໄດ້ຮຽກຮ້ອງໃຫ້ຝ່າຍອາເມລິກາຈົ່ງອະທິບາຍເຫດການທີ່ຕັ້ງສະຖານີຕິດຕາມລັກຟັງຢູ່ສະຖານທູດອາເມລິກາປະຈໍາອິນໂດເນເຊຍ ແລະໄດ້ກ່າວວ່າ, ການຕິດຕາມລັກຟັງຂອງອາເມລິກາ "ເປັນສິ່ງທີ່ບໍ່ສາມາດຍອມຮັບໄດ້", ອິນໂນເນເຊຍສະແດງການປະທ້ວງຢ່າງຮຸນແຮງຕໍ່ເລື່ອງນີ້.
ທ່ານຟາກີຣີ, ນັກຄົ້ນຄວ້າການເມືອງຂອງສະຖາບັນວິທະຍາສາດອິນໂດເນເຊຍກ່າວວ່າ, ການທະທໍາທີ່ຕິດຕາມລັກຟັງເປັນການຢຽບຢໍ່າທໍາລາຍຢ່າງເປີດແປນຕໍ່ສິດທິມະນຸດ, ມັງເປັນການທໍາລາຍອະທິປະໄຕຂອງປະເທດຢ່າງຮ້າຍແຮງ, ພາບພົດເທິງເວທີສາກົນຂອງອາເມລິກາກໍໄດ້ຮັບຜົນກະທົບຍ້ອນເຫດການນີ້, ຫລາຍປະເທດເຊິ່ງລວມທັງອິນໂດເນເຊຍກໍຈະບໍ່ມີການເຊື່ອຖືຕໍ່ການກະທໍາຂອງອາເມລິກາຕໍ່ໄປອີກ.
