ລັດຖະບານເຢຍລະມັນກ່າວວ່າຍິນດີສົນທະນາກັບທ່ານສະໂນເຕັນໂດຍກົງ
(GMT+08:00) 2013-11-02 13:40:10 cri
ຫລັງຈາກສະມາຊິກລັດຖະສະພາເຢຍລະມັນໄດ້ພົບປະກັບທ່ານແອເວີດ ສະໂນເຕັນຢູ່ນະຄອນຫລວງມົສກູຂອງຣັດເຊຍໂດຍທາງລັບແລ້ວ, ທ່ານເຟຼຕຼີຮີ ລັດຖະມົນຕີວ່າການກະຊວງພາຍໃນເຢຍລະມັນກໍ່ໃຫ້ສຳພາດຕໍ່ນັກຂ່າວວ່າ, ລັດຖະບານເຢຍລະມັນຍິນດີສົນທະນາກັບທ່ານສະໂນເຕັນໂດຍກົງ. ນີ້ແມ່ນລັດຖະບານເຢຍລະມັນສົ່ງສັນຍານໂດຍກົງໄປຍັງທ່ານສະໂນເຕັນເປັນຄັ້ງທຳອິດ.
ປັດຈຸບັນ, ພັກສັງຄົມປະຊາທິປະໄຕທີ່ເຂົ້າຮ່ວມການເຈລະຈາການສ້າງຄະນະລັດຖະບານຊຸດໃຫມ່ກໍ່ສະເຫນີວ່າ, ດ້ານຫນຶ່ງຫວັງວ່າທ່ານສະໂນເຕັນສາມາດໃຫ້ຄຳຢືນຢັນໃນການສຳຫລວດເຫດການລັກຟັງ, ອີກດ້ານຫນຶ່ງກໍ່ຈະຮັກສາຄວາມປອດໄພຂອງທ່ານສະໂນເຕັນ, ແລະບໍ່ຄວນກະທົບເຖິງການພົວພັນທາງການຕ່າງປະເທດລະຫວ່າງເຢຍລະມັນກັບອາເມລິກາ.
ຍ້ອນການເຜີຍແປທ່ານສະໂນເຕັນ, ຈິ່ງເຮັດໃຫ້ການລັກຟັງຢ່າງຜິດກົດຫມາຍຫລາຍຢ່າງຂອງລັດຖະບານອາເມລິກາຖືກເປີດເຜີຍຕໍ່ພາຍນອກ, ເຊິ່ງລວມທັງເຫດການລັກຟັງການລົມໂທລະສັບມືຖືຂອງທ່ານາງເມີເຄວ ນາຍົກລັດຖະມົນຕີເຢຍລະມັນ. ຫາງສຽງເຢຍລະມັນກໍ່ພາກັນອອກສຽງຂອບໃຈແລະຮຽກຮ້ອງໃຫ້ປົກປ້ອງທ່ານສະໂນເຕັນ, ຫວັງວ່າເຢຍລະມັນສາມາດສະຫນອງບ່ອນຫລີກໄພໃຫ້ແກ່ທ່ານສະໂນເຕັນ.
ກະຊວງຍຸດຕິທຳຂອງເຢຍລະມັນກ່າວວ່າ, ລັດຖະບານອາເມລິກາໄດ້ຮຽກຮ້ອງຕໍ່ເຢຍລະມັນເພື່ອຢາກສົ່ງທ່ານສະໂນເຕັນຄືນໃຫ້ອາເມລິກາກ່ອນແລ້ວ, ສະນັ້ນ, ເຢຍລະມັນບໍ່ສາມາດປົກປ້ອງຄວາມປອດໄພຂອງທ່ານສະໂນເຕັນໄດ້. ແຕ່ນັກວິຊາການດ້ານຕຸລາການຈຳນວນຫນຶ່ງພັດເຫັນວ່າ, ຫລັງຈາກໄດ້ເສຍຫນັງສືຜ່ານແດນຂອງອາເມລິກາແລ້ວ, ທ່ານສະໂນເຕັນໄດ້ກາຍເປັນຜູ່ທີ່ປາສະຈາກສັນຊາດ, ສະນັ້ນ, ລັດຖະບານເຢຍລະມັນແມ່ນສາມາດສະຫນອງບ່ອນຢູ່ໃຫ້ແກ່ທ່ານສະໂນເຕັນຍ້ອນປົກປ້ອງຜົນປະໂຫຍດ້ານການເມືອງຂອງປະເທດຕົນ.
